Karl VI. vo Frankriich

Us der alemannische Wikipedia, der freie Dialäkt-Enzyklopedy
Dr Köönig Karl VI. vo Frankriich, Buechmoolerei vom Boucicaut-Mäister

Dr Karl VI. dr Vilgliebti oder dr Waansinnig (franzöösisch Charles VI le Bien-Aimé oder le Fou; * 3. Dezämber 1368 z Bariis; † 21. Oktober 1422 z Bariis) isch vo 1380 bis 1422 Köönig vo Frankriich gsi.

Gschicht[ändere | Quälltäxt bearbeite]

Frankriich isch zu sinere Zit immer no vom Schwarze Dood vo 1348/49 gschwecht gsi und au dr Hundertjöörig Chrieg gege d Ängländer het sini Spuure hinderloo. Aber si Vater het s Land mit Erfolg reorganisiert und dr Bertrand du Guesclin am Chopf vo dr franzöösische Armee, het die änglische Drubbe us em Land verdriibe. Wil dr Karl as Chind het afo regiere und vo 1393 aa gäistesgstöört gsi isch, häi d Regänte und Berooter chönne mäche, was si häi welle. Aber am 17. Septämber 1394 het dr Karl sälber än Edikt uusegee, won er din behauptet, ass sich d Juude an de Christe wurde vergoo und ass dorum käni Juude me in sim Riich döfi lääbe.

Die politischi Laag im Land isch verworre gsi. Bardeije häi sich bildet und 1410 isch s zum Bürgerchrieg zwüsche de Armagnacs und de Bourguignons cho. 1413 häi d Armagnacs gwunne und z Bariis d Herrschaft übernoo.

S Land isch aber gspalte bliibe und das het dr Heinrich V. vo Ängland usgnützt. Er isch im Land iigfalle und het im Herbst 1415 d Franzoose bi Azincourt vernichtend gschlaage. 1417 het er d Normandi bsetzt.

Noch eme Gmetzel an de Armagnacs het d Köönigin Isabeau de Bavière d Macht übernoo. D Ängländer si bis nooch zu Bariis vorgrückt. Dr Dauphin het anstatt d Burgunder, wo wichdigi Verbündeti vo de Ängländer gsi si, uf die franzöösischi Site z zie, dr Herzoog vo Burgund 1419 ermordet. 1420 häi druf dr Karl VI. und d Isabeau dr Dauphin zugunste vo iirer Dochder Katharina enterbt. Im Verdraag vo Troyes häi si die mit em Heinrich V. vo Ängland verhürootet und dä isch eso dr franzöösisch Droonfolger worde. Er isch aber no vor em Karl VI. gstorbe und eso het si äijöörig Soon Heinrich VI. die franzöösisch Chroone gerbt. Aber au dr Dauphin het sich zum Köönig lo usrüefe, so dass Frankriich zwäi Köönig gha het.

Dr Karl VI. isch in dr Kathedrale vo Saint-Denis, begraabe worde. Wo d Köönigsgreeber vo Saint-Denis wäärend dr Franzöösische Revoluzioon isch si Graab am 17. Oktober 1793 ufdoo und blünderet worde, sini Überräst het mä im ene Massegraab usserhalb vo dr Chille beärdigt.

Litratuur[ändere | Quälltäxt bearbeite]

  • Heidrun Kimm: Isabeau de Baviere. Dissertation, Münche 1967.
  • Marie-Veronique Clin: Isabeau de Baviére. Münche 2001.
  • Champion/Thoisy: Bougogne, France, Angleterre au traité Troyes. 1943.

Weblingg[ändere | Quälltäxt bearbeite]

 Commons: Karl VI. vo Frankriich – Sammlig vo Multimediadateie
Vorgänger Amt Nochfolger
Karl V. Dauphin vo Viennois
1368–1380
Karl
Köönig vo Frankriich

1380–1422
Karl VII.