Jungle Street Groove und Beat on the Street

S Logo vom Jungle Street Groove

Dialäkt: Baseldütsch

S 13. Jungle Street Groove am 4. Septämber 2010

S Jungle Street Groove (abkürzt JSG) und dr Beat on the Street (abkürzt BOTS) si Paraade für alternativi elektronischi Muusig z Baasel, äänlig wie d Street Parade z Züüri oder wie s d Love Parade z Dütschland gsi isch. Im Geegesatz zu dene bäide si si aber chliiner und wärde nit kommerziell bedriibe. S JSG und dr BOTS finde abwäggselnd jedes Joor Ändi August/Aafangs Septämber am ene Samschdig statt.

Gschicht

S JSG het im Joor 1995 spontaan aagfange, wo öbbe 100 Lüt gege d Atomtest vo Frankriich demonstriert häi und drbii häi afo danze. 1996 het s erste offizielle JSG mit äim Waage und öbbe 300 Lüt stattgfunde. Noodinoo isch dr Umzug gwaggse und 2004 si scho 12 Groovetrucks und öbbe 7'000 Persone drbiigsi.

Im Joor 2005 het s JSG nit in dr üüblige Form stattgfunde. Im Organisazionstiim het s Mäinigsverschiidehäite gee und e Däil vo de Mitgliider het e Gegeveraastaltig, dr Beat on the Street, organisiert. Sit denn häi si sich aber wider versöönt, und jetz findet äi Joor die äinte und s neggste Joor die anderi Paraade statt.

D Muusig

Was vo de DJs oder läiv uf de Groovetrucks gspiilt wird, si Jungle, Drum and Bass, Breakbeats und Minimal Techno, vilmol au vom ene MC begläitet.

D Rute

D Paraade het sich ursprünglig uf em Münsterblatz am Fümfi am Nomiddaag organisiert. E halbi Stund spööter het si aagfange, isch über d Wettstäibrugg und denn im Rhii nooch bis zur Kasärne gange und öbbe am halb Nüüni zoobe umegsi. Nochhäär het s denn no äi oder zwäi offizielli Afterparties gee. Sit 2012 findet d Paraade nume no im Chläibaasel statt.

Weblingg

• Dr offiziell Film über d Paraade 2010

Fuessnoote

Dä Artikel basiert uff ere fräie Übersetzig vum Artikel „Jungle_Street_Groove“ vu de dütsche Wikipedia. E Liste vu de Autore un Versione isch do z finde.