Zum Inhalt springen

Julian Assange

Us der alemannische Wikipedia, der freie Dialäkt-Enzyklopedy
dr Julian Assange, 2014
Unterschrift
Unterschrift

Dr Julian Paul Assange[1] [əˈsɑːnʒ] (* 3. Juli 1971[2] z Townsville, Queensland, Auschtralie as Julian Hawkins)[1] isch e auschtralische bolitische Aktivischt, inveschtigative Schurnalischt, Computerhacke, Brogrammierer un e Grinder un Sprächer vu dr Plattform WikiLeaks. Die sammlet Dokumänt vu Regimekritiker un Whistleblower us vylne Länder vu dr Wält un stellt si online z Verfiegig. Doderdur chunnt d Effetligkait an Informatione iber illegali un unethischi Aktivitete vu Regierige un Inschtituzione. Doderfir het dr Julian Assange verschideni Uuszaichniuge iberchuu, unter anderem dr Amnesty International Media Award (2009), dr Global Exchange Human Rights Award (2013), dr Stuegerter Friidesbryys (2020) un d Konrad-Wolf-Bryys (2023).

Läbe[ändere | Quälltäxt bearbeite]

Em Assange syy Eltere hän e Wanderzirkus bedribe. Syy Chindheit het dr Assange in dr Nechi vu dr auschtralische Ortschaft Byron Bay verbrocht, eme Zäntrum fir alternativi Chinschtler. Speter sin si uf d Insle Magnetic Island zoge.[3] No dr Drännig vun syyne Eltere isch dr Assange bi syyre Mueter ufgwagse. Si het anne 1979 e Musiker ghyrote. Us däre Eh isch em Assange syy Halbbrueder firi gange. Wu sich d Mueter wider vu ihrem zweete Mann drännt, het si mit ihre beider Chinder vilmol dr Wohnort gwägslet, zem Eine wel si Film drillt het, zem andere wel si zytwyys uf dr Flucht vor ere Sekte gsi isch,[4]. D Chinder hän wäge däm vilmol d Schuel gwägslet un hän au zytwyys statt däm Huusunterricht gha. Speter het dr Assange Physik studiert an d University of Melbourne.[1]

Erschti Brogrammiererfahrige het dr Assange uf eme C64 gsammlet, 1987 het er sich e Modem zuegleit.[3] Unter em Pseudonym „Mendax“ het er aagfange mit erschte Hacker-Aktivitete. Är un zwei wyteri Hacker hän sich zämmegschlosse un het e Gruppe grindet mit em Namme „International Subversives“. Wäg syyne Hacker-Aktivitete het d Australien Federal Police anne 1991 in syym Huus z Melbourne e Razzia durgfiert. 1992 isch dr Julian Assange in 24 Fell vun eme illegale Hacke fir schuldig bfunde wore. Är isch zuen ere Bueß in Hechi vu 2100 AUD un zuen ere Bewehrigsstrofe verurdeilt wore.[5]

In syyre Hacker-Zyt het er syy speteri Frau chänne glehrt. Anne 1989 sin si zämmezoge un hän e Suhn iberchuu. 1991 het s sich s Baar drännt. Noch eme johrelange Rächtsstryt hän sich dr Assange un syy Mueter mit syyre friejere Frau uf e gmeinsam Sorgerächt geinigt.[3]

Syt 2006 isch er fir Wikileaks aktiv. No syyre Uussag het er „im Internet Gäld verdient“ un het wäge däm ohni Bezahlig fir WikiLeaks chenne schaffe.[6] Wäg syyre Arbet fir Wikileaks isch er e baar Mol verhaftet, abghert, zensiert un au verchlagt wore, aber alliwyyl erfolglos.[7]

Ideä[ändere | Quälltäxt bearbeite]

Dr Assange stoht in Ideä vum Krypto-Anarchismus noch, wu ne Informationsasymmetri zwische Staat un Burger verdrätte un vu libertärem Gedankeguet uusgoht. Derwylscht e Staat in dr Lag sej, großi Deil vu dr Kommunikation vu syyne Burger z iberwache, versuecht er glyychzytig, vil Informatione vor däm gheim z halte. Di tächnische Innovatione vum Internet deete jetz d Megligkeit biete, die feschtgstellt Asymmetri umzchehre. Uf eire Syte chennte alli private Informatione mit kryptographische Mittel gschitzt wäre. Des hätt e großi Bschränkig vu staatlige Yyfluss- un Kontrollmegligkeite as Folg. Zem glyyche Ziil chennt mer uf dr andre Syte au dur di konsequänt Vereffentlichung vu Herrschaftswisse chuu. S Publikmache vu Herrschaftswisse deet Staatsorgan derzue veraaloo, ihri Kommunikationsfliss z reduziere, was e Verminderig vu dr Funktionsfähigkeit vum Gsamtsyschtem Staat deet bedyte. Doderzue meint dr Assange: „Leaking isch e inhärent antiautoritärI Tat. S isch e anarchistischi Tat.“[8]

Ermittligsverfahre[ändere | Quälltäxt bearbeite]

Haftbefähl z Schwede un Verhaftig z Großbritannie[ändere | Quälltäxt bearbeite]

Syt Augschte/Septämber 2010 isch z Schwede ne Verfahre geg dr Assange wäge sexuälle Vergoh glofe. Unterstitzer vum Assange hän s Verfahre as Schmierkampagne vu bolitische Gegner aagsää go WikiLeaks schade. D Staatsaawälti, wu z Schwede zueständig isch, d Marianne Ny, het derno im Dezämber 2010 bedont, ass si keim bolitische oder anderem Druck uusgsetzt sej.[9] No Mediebricht wäre sexuälli Vergoh vu dr Gsetz z Schwede im internationale Verglyych ussergwehnli wyt definiert;[10] D Marianne Ny isch scho vor em Fall as "besonders weitgehende Staatsanwältin" (Die Zeit) ufgfalle.[11]

Im Augschte hän zwoo Fraue, dr Assange bi dr schwedische Bolizei aazeigt. Dr Assange soll mit ene zerscht yyvernämmlige Sex ghaa haa (no eire vu dr Fraue un noch s Assanges Aawalt), was sich aber no däne Fraue zue sexuällem Missbruuch entwicklet heb. Im Mittelpunkt solle doderbyy no e Deil Mediebrichte d Froge stoh, eb dr Sex wyter yyvernämmli gsi isch, eb dr Assange sich gweigeret heb, e Kondom z bruche, eb er e Frau, wu gschlofe het, sexuäll beläschtigt oder sogar Sex mit ere gha het;[12] Sex mit eberem, wu schloft, wird no schwedischem Rächt nit as yyvernämmli aagsähne.[10]

Am 20. Augschte 2010 isch geg dr Assange e Haftbefähl wäge Vergwaltigung erloo wore, aber ei Dag speter wider ufghobe wore, wel d Ermittligsbeherde dr Vorwurf vun ere Vergwaltigung as uubegrindet aagsähne het. Am 1. Septämber 2010 het si unter ere neje Aachlegeri (Marianne Ny) d Ermittlige wider ufgnuu,[13] jetz wäg sexuäller Netigung un sexuäller Bläschtigung[14] Dr Assange sälber het d Vorwirf bstritte un het vu „dräckige Trick“ vu syyne Gegner gschwätzt.[15] Em Assange syy Aawalt het bedont, ass d boode Chlegerne no ihre eigene Uussag yyvernämmlige Sex mit syym Kliente ghaa hätte. Si hätte ihn erscht bschuldigt, wu s sich uusgstellt het, ass dr Assange mit boode Fraue sexuälli Kontakt ghaa heb.[16]

Dr Assange isch no dr Aachlagerhebig zerscht no fir drej Wuche z Schwede blibe fir e eventuälli Bfrogig;[11] no syym Aawalt sej er au zuen ere Uussag unter Eid bereit gsi.[16] No dr Aagabe vu dr Ny het dr Assange ere schließli persenli aagruefe, gi si froge, eb er us em Land derft uusreise, was si ihm do erlaubt heb.[11] Är isch derno "ganz offiziell" (Die Zeit) uf Großbritannie uusgreist.[11]

Am 18. Novämber 2010 het di schwedisch Staatsaawaltschaft nomol e Haftbefähl wäge Vergwaltigung, sexuälle Beläschtigung un Netigung erloo; s zueständig Amtsgricht het e international wirksame Haftbefähl bschlosse. Dr Assange isch in Bruefig gange. S zweithegscht schwedisch Gricht het dr Haftbefähl bstoh loo, het aber d Aachlagepinkt abgschwecht. Dr Vorwurf vu dr sexuälle Beläschtigung isch ganz gheje loo wore, dr Vorwurf vu dr Vergwaltigung abgmilderet in „weniger grobi Vergwaltigung.“[11]

Am 1. Dezember 2010 isch bekannt wore, ass Interpol[2] e „Red Notice“ gege dr Assange erloo het. Die „rote Mitdeilige“ heiße, ass di 188 Mitgliidsstaate s Land, wu dr urspringli Haftbefähl stammt, bi dr Suechi noch ere Person „mit Blick uf ihri Feschtnahm un Uusliferig“ solle unterstitze. S handlet sich doderbyy no Interpol nit um e internationale Haftbefähl. Dr Assange deet gsuecht wäre wäg dr Vergwaltigungsvorwirf, wu z Schwede gege ihn erhobe wore seje. Syy Aawalt het wenigi Stund vor dr Vereffetlichung vu dr Red Notice dur Interpol e Beruefigsgricht z Schwede aagruefe ghaa un d Ufhebig vum schwedische Haftbefähl beaadrait ghaa.[17][18]

Am 7. Dezember 2010 het sich dr Assange z London dr Bolizei gstellt un isch verhaftet wore.[19] Am 14. Dezämber 2010 het e Londoner Gricht entschide, dr Assange gege ne Kaution vu 200.000 britische Bfund (ca. 240.000 € bzw. 301.000 CHF) frejzloo. Zuesätzli miesste zwei Burge 40.000 Bfund z Verfiegig stelle. Derzue miesst er e elektronischi Fueßfessle drage un wyteri Bedingige yyhalte. Di britische[20][21] Staatsaawaltschaft het Beruefig gege d Frejlossig yygleit.[22] Am 16. Dezämber 2010 het dr High Court z London entschide, dr Assange zue dr ufgfierte Bedingige uf Kaution us dr Haft z entloo.[23] No am nämlige Dag het dr Assange s Gfängnis verloo.[24][25] Dr Journalist Vaughan Smith het em Assange Härbärg gee un em effetlig Unterstitzig zuegsait. Im Jänner 2011 het s e 10-minitigi Verhandlig z Großbritannie gee, e wyteri Aaherig zuen ere meglige Uusliferig uf Schwede isch am 7. Februar 2011 gsi, d Verhandlig isch aber wyter verdagt wore.[26][27] Am 24. Februar 2011 het s Gricht entschide, ass dr Assange an Schwede derf uusgliferet wäre.[28] Dr Assange het dodergege Beruefig vor em Londoner High Court yyglait. S Verfahre het im Juli 2011 aagfange.[29] Am 2. Novämber 2011 het dr High Court entschide, dass dr Assange derf uusgliferet wäre.

Dr Assange het dodergege ne letschti Beruefig bim hegschte Gricht yyglait, em Supreme Court, wu am 16. Dezämber fir zuelässig erklert woren isch, wel dr juristisch Stryt grundsätzligi Bedytig heb.[30][31][32] Am 1. Februar 2012 het e zweedägigi Aaherig aagfange. Am 30. Mai het au des Gricht entschide, dass dr Assange derf uusgliferet wäre.[33] En Aadrag uf Neiufnahm vum Fall isch am 14. Juni 2012 abgwise wore.[34] Dr Assange isch derno in d Botschaft vu Ecuador gflichtet, ass er nit abgschobe wird un het dert um bolitisch Asyl bätte. Am 16. Augschte het dr ecuadorianisch Usseminischter Ricardo Patiño verchindet, ass em Assange Aysl gwehrt wird. E Verdrätter vum britische Usseminschterium het aber churz vorhär scho gsait ghaa, ass dr Assange verhaftet wurd, wänn er d Botschaft verloo diei.[35] Ab do het dr Assange in dr Botschaft gläbt.

Am 19. Mai 2017 het di schwedisch Staatsaawaltschaft verchindet, ass s Verfahre yygstellt wird.[36]

Uusliferigsverfahre an d USA[ändere | Quälltäxt bearbeite]

Anne 2010 het WikiLeaks zäme mit dr New York Times, em Guardian un em Spiegel Uusziig us Militärprotokoll vereffetligt, wu unter anderem Chriegsverbräche vu dr USA in dr Chrieg z Afghanischtan un im Irak belait hän.[37] Im Juli 2010 het WikiLeaks anderi intärni Dokumänt vu dr US-Strytchreft un -Beherde vereffetligt. D Chriegsdaagbiecher vum Chrieg z Afghanischtan, wu s doodin het, un d Chreigsdaagbiecher vum Irakchrieg, wu im Oktober 2010 vereffetgligt wore sin, hän noch eme UN-Sunderberichterstatter iber Folter, em Nils Melzer, „muetmaßligi Chriegsverbräche un Korruption“ ufdeckt.[38] Ass die Militärprotokoll ufeglait wore sin, het wältwyt fir Ufsäh gsorgt

D US-Regierig het dodruf Ermittlige gege dr Assange yyglaitet. Dr Assange het d Uusliferig in d USA gferchtet, un het si dr Uusliferig vu Großbritannie an Schwede widersetzt, indäm er im Juli 2012 syni elektronisch Fueßfessel abglait het un in di ecuadorianisch Botschaft z London gflichtet isch. Ecuador het erm bolitisch Asyl gee, het s em mneglig gmacht, ass er in dr Botschaft het chenne blybe un het em di ecuadorianisch Staasburgerschaft gee. Di negschte sibe Johr het dr Assange dert as bolitische Flichtling gläbt.

Im April 2019 het em dr nei ecuadorianisch Bresidänt Lenín Moreno s Asyl un d Staatsburgerschaft entzoge. Churz druf isch dr Assange in dr ecuadorianische Botschaft vu dr britische Bolizei feschtgnuu wore un wäg em Verstoß gege Kautionsuflage zuen ere Haftstrof vu fufzg Wuche verurdailt wore. D USA het im nämlige Monet en Aadrag uf d Uusliferig gstellt. Uf d Pinkt in dr Aachlag stoht theoretisch e kumulierti Strof vu bis zue 175 Johr Haft, au d Dodesstrof isch bis zue dr Zuesicherig vu dr USA im April 2024 nit uusgschlosse gsii.[39][38][40][41][42][43][44]

Wun er die fascht aijehrig Haftstrof im Septämber 2019 abghockt ghaa het, isch dr Assange wäg em Uusliferigsaadrag vu dr USA in Haft blibe. D Ermittlige z Schwede zue Sexualdelikt sin scho im Mai 2017 yygstellt wore.[45] Im Jänner 2021 het e Londoner Gricht enschide, ass dr Assange nit an d USA uusgliferet wird.[46] Im Dezämber 2021 het e Beruefigsgricht z London die Entschaidig aber ufghebt.[47] Di Barlemäntarisch Versammlig vum Europarot het im Jänner 2020 aistimmig fir di „sofortig Freilossig“ vum Julian Assange un d Verhinderig vu syre Uusliferig an D USA gstimmt.[48] Im Juni 2022 het di britisch Regierig d Uusliferig an d USA zuegloo.[49] Sy Verdaidigung het Beruefig yygee, wäge däm isch er als z Großbritannie im Hochsicherhaitsgfängnis HMP Belmarsh gsii. Dr auschtralisch Premierminischter Anthony Albanese un internationali Mediehyyser, dodrunter dr Guardian, Le Monde un d New York Times, hän d US-Regierig im Novämber 2022 ufgforderet, d Strofverfolgig vum Assange yyzstelle.[50][51] D USA hän des abglähnt. Im Juni 2023 isch dr Aadrag uf Beruefig vum ebershcte Grichtshof High Court London abgwise wore.[52] Wu s nomol e Aaherig gee het, hän di britische Richter im Merz 2024 aber entschide, ass Assange vorerscht nit an d USA deerf uusgliferet wäre un e Beruefigsverfahre als megli blybt.[53][54]

Am Apirl 2024 hän d US-Aawält des zuegsait, was dr britisch High Court gforderet het, nämlöi ass si dr Assange vor US-Gricht uf s Rächt uf Mainigsfreihait cha beruefe un ass ihm kai Dodeasstrof droht.[55]

Ändi Juni 2024 het si dr Assange no johrelange Verhandlige mit em US-Juschtizminischterium uf e Handel gainigt: Är isch us dr Haft entloo wore un het si fi schuldig erklert wäg dr Vereffetlichung vu Militärghaimnis.[56] Är isch zue fimf Johr un zwee Monet Haft verurdailt wore, die Zytspanne, wun er z London scho in Haft ghockt isch. Dodruf isch er in synin aschtralisch Haimet uusgraist.

Bryys un Uuszeichnige[ändere | Quälltäxt bearbeite]

  • 2008 Freedom of Expression Award fir dr Assange un WikiLeaks vu dr Organisation Index on Censorship.
  • 2008 The Economist New Media Award
  • 2009 Amnesty International Media Award (New Media) fir „Kenya: The Cry of Blood – Extra Judicial Killings and Disappearances“
  • 2010 Sam Adams Award fir dr Assange un WikiLeaks
  • 2010 Time Person of the Year, Reader's Choice
  • 2011 Goldmedaille fir Fride un Grächtigkait vu dr Sydney Peace Foundation
  • 2011 Martha Gellhorn Prize for Journalism
  • 2011 Preis Blanquerna as beschte Kommunicator vu dr Fakultet fir Kommunikation, Ramon-Llull-Uniwersitet/Generalitat de Catalunya
  • 2012 Big Brother Awards Hero of Privacy
  • 2013 Global Exchange Human Rights Award, People's Choice
  • 2013 Yoko Ono Lennon Courage Award for the Arts
  • 2013 New York Festivals World's Best TV & Films Silver World Medal
  • 2013 Medaille fir Mänscherächt vum brasilianische Prässeverband Associação Brasileira de Imprensa (ABI) zäme mit Edward Snowden, Glenn Greenwald, Chelsea Manning, Mordechai Vanunu un Aaron Swartz
  • 2014 Union of Journalists in Kazakhstan Top Prize
  • 2014 Helde vu dr Informationsfreihait vu Reporter ohni Gränze
  • 2019 GUE/NGL Whistleblower Bryys fir Schurnalischte, Whistleblower & Verdaidiger vum Rächt uf Information
  • 2019 The Gavin MacFadyen Award 2019
  • 2020 Stuegerter Fridesbryys
  • 2022: Dr.-Karl-Renner-Publizischtikbryyspreis
  • 2022: Günter-Wallraff-Bryys
  • 2022: Weizenbaum-Bryys fir Fride un gsellschaftligi Verantwortig
  • 2023: Konrad-Wolf-Bryys

Schrifte[ändere | Quälltäxt bearbeite]

  • Suelette Dreyfus, Julian Assange: Underground: Tales of hacking, madness and obsession on the electronic frontier. Mandarin, Kew, Australia, 1997, ISBN 1-86330-595-5 (underground-book.net).
  • Julian Assange: Conspiracy as Governance. 2006.
  • Suelette Dreyfus, Julian Assange: Underground. Die Geschichte der frühen Hacker-Elite. Tatsachenroman. Haffmans & Tolkemitt, Berlin 2011, ISBN 978-3-942989-00-8 (Originaltitel: Underground: Tales of hacking, madness and obsession on the Electronic Frontier.).
  • Julian Assange, Andrew O’Hagan: Julian Assange: The Unauthorised Autobiography. Canongate Books, Edinburgh 2011, ISBN 978-0-85786-384-3.
  • Jacob Appelbaum, Julian Assange, Andy Müller-Maguhn, Jérémie Zimmermann: Cypherpunks. Freedom and the Future of the Internet. OR Books, New York 2012, ISBN 978-1-939293-00-8 (englisch).
  • Jacob Appelbaum, Julian Assange, Andy Müller-Maguhn, Jérémie Zimmermann: Cypherpunks. Unsere Freiheit und die Zukunft des Internets. Campus Verlag, Frankfurt, New York 2013, ISBN 978-3-593-39913-3.
  • Julian Assange: When Google Met WikiLeaks. OR Books, New York City 2014, ISBN 978-1-939293-57-2 (englisch).
  • Yylaitig zue: The WikiLeaks Files: The World According to US Empire. Verso Books, 2015, ISBN 978-1-78168-874-8.
  • Pamela Anderson, Julian Assange, u. a.: In Defense of Julian Assange. Hrsg.: Tariq Ali, Margaret Kunstler. OR Books, New York City 2019, ISBN 978-1-68219-221-4 (englisch).

Literatur[ändere | Quälltäxt bearbeite]

  • Daniel Domscheit-Berg: Inside WikiLeaks. Meine Zeit bei der gefährlichsten Website der Welt. Econ, Berlin 2011, ISBN 978-3-430-20121-6.
  • Heinrich Geiselberger (Hrsg.): WikiLeaks und die Folgen. Netz, Medien, Politik. Die Hintergründe. Die Konsequenzen. Sonderdruck. Suhrkamp, Berlin 2011, ISBN 978-3-518-06170-1.
  • Carsten Görig, Kathrin Nord: Julian Assange. Der Mann, der die Welt verändert. Scorpio-Verlag, Berlin u. a. 2011, ISBN 978-3-942166-28-7.
  • David Leigh, Luke Harding: WikiLeaks. Inside Julian Assange’s War on Secrecy. Guardian Books, London 2011, ISBN 978-0-85265-239-8.
    • dytsch vum Henning Hoff: WikiLeaks. Julian Assanges Krieg gegen Geheimhaltung. Leske, Düsseldorf 2013, ISBN 978-3-942377-08-9. (Reihe: Edition Weltkiosk)
  • Marcel Rosenbach, Holger Stark: Staatsfeind WikiLeaks. Wie eine Gruppe von Netzaktivisten die mächtigsten Nationen der Welt herausfordert. Deutsche Verlags-Anstalt u. a., München u. a. 2011, ISBN 978-3-421-04518-8.
  • Alexander Star (Hrsg.): Open Secrets. WikiLeaks, War and American Diplomacy. With an introduction by Bill Keller. The New York Times Company, New York NY 2011, ISBN 978-0-615-43957-0.
  • Thilo Marauhn, Sven Simon: Diplomatisches Asyl für Julian Assange? Betrachtung der Rechtslage zu Auslieferung und Botschaftsasyl, Zeitschrift für das Juristische Studium (ZJS) 5/2012, 593 (PDF)
  • Nils Melzer: Der Fall Julian Assange, Geschichte einer Verfolgung. Piper Verlag, München 2021, ISBN 978-3-492-07076-8.

Weblink[ändere | Quälltäxt bearbeite]

 Commons: Julian Assange – Sammlig vo Multimediadateie

Interviews[ändere | Quälltäxt bearbeite]

Fueßnotte[ändere | Quälltäxt bearbeite]

  1. ↑ 1,0 1,1 1,2 Raffi Khatchadourian: No Secrets. Julian Assange’s mission for total transparency. In: The New Yorker, 7. Juni 2010.
  2. ↑ 2,0 2,1 Wanted ASSANGE, Julian Paul in: Interpol, abgruefen am 1. Dezämber 2010
  3. ↑ 3,0 3,1 3,2 Jetzt.de: Der Mann mit den weißen Haaren, abgruefen am 4. Dezämber 2010.
  4. ↑ Why the world needs WikiLeaks, TED, AlJazeeraEnglish [1], ab Spielminute 14:30
  5. ↑ Julian Assange Biographie. Abgruefen am 8. Dezämber 2010.
  6. ↑ Referänz-Fähler: Uugiltige <ref>-Tag; s isch kei Täxt fir s Ref mit em Name Wikileaks-Oekonomie aagee wore.
  7. ↑ Julian Assange Archivlink (Memento vom 21. April 2012 im Internet Archive). In: The Centre for Investigative Journalism, abgruefen am 1. Juni 2010.
  8. ↑ Niklas Hofmann: Der Gegenverschwörer, Süddeutsche Zeitung, 3. Dezämber 2010, S. 15.
  9. ↑ keine Autorenangabe (8. Dezember 2010). The curious sex case against Julian Assange. new.com.au (abgruefen am 9. Dezämber 2010)
  10. ↑ 10,0 10,1 Malin Rising/Associated Press (8. Dezämber 2010). Assange rape case spotlights Sweden's liberal laws. Yahoo News (abgerufen 9. Dezember 2010)
  11. ↑ 11,0 11,1 11,2 11,3 11,4 André Anwar. (7. Dezämber 2010). Die Frau, die Assange jagt. Die Zeit online (abgruefen 9. Dezämber 2010)
  12. ↑ kei Autorenaagab (8. Dezämber 2010). The curious sex case against Julian Assange. new.com.au (abgruefen am 9. Dezämber 2010)
    Malin Rising/Associated Press (8. Dezember 2010). Assange rape case spotlights Sweden's liberal laws. Yahoo News (abgruefen am 9. Dezämber 2010)
  13. ↑ Die Welt: Erneute Ermittlungen gegen Wikileaks-Gründer , 1. Septämber 2010
  14. ↑ änglischsprochigi Medie: sexual coercion and sexual molestation, no Robert Booth (7. Dezämber 2010). Pressure mounts on WikiLeaks as net tightens around founder Julian Assange. The Guardian (abgruefen am 9. Dezämber 2010)
  15. ↑ Falsche Vergewaltigungsvorwürfe: Haftbefehl gegen WikiLeaks-Chef aufgehoben - SPIEGEL ONLINE - Nachrichten - Netzwelt
    FAZ: CIA-Papier veröffentlicht - Fall Assange relativiert
  16. ↑ 16,0 16,1 Die Presse: Haftbefehl gegen Wikileaks Gründer Assange erlassen, 18. Novämber 2010.
  17. ↑ Interpol setzt Wikileaks-Gründer auf Fahndungsliste in: AFP vum 1. Dezämber 2010
  18. ↑ WikiLeaks-Gründer wird international gesucht in: Spiegel Online vum 1. Dezämber 2010
  19. ↑ Britische Polizei setzt Julian Assange fest in: Spiegel Online vum 7. Dezämber 2010
  20. ↑ Julian Assange bail decision made by UK authorities, not Sweden in: The Guardian vum 15. Dezämber 2010
  21. ↑ Statement from Director of Prosecution, Ms. Marianne Ny in: anklagare.se, Archiv vum 16. Dezämber 2010
  22. ↑ Assange bleibt vorerst in Haft. Spiegel Online, 14. Dezember 2010, abgruefen am 15. Dezember 2010.
  23. ↑ WikiLeaks-Gründer Assange kommt frei. Spiegel Online, 16. Dezember 2010, abgruefen am 16. Dezember 2010.
  24. ↑ Mäldig bi Agence France-Presse. Abgruefen am 16. Dezember 2010. (Site cha nüme abgrüeft wärde; Suche im Webarchiv)[2] [3] Vorlage:Toter Link/www.google.com
  25. ↑ Frankfurter Allgemeine Zeitung online vum 16. Dezämber 2010. Abgruefen am 16. Dezember 2010.
  26. ↑ Entscheidung über Auslieferung von Assange vertagt. Schweizer Fernsehen, 11. Februar 2011, abgruefen am 11. Februar 2011.
  27. ↑ Focus Online am 8. Februar 2011: Julian Assange: Verhandlung über Auslieferung kann sich hinziehen. Abgruefen am 8. Februar 2011.
  28. ↑ Assange kann nach Schweden ausgeliefert werden. Spiegel Online, 24. Februar 2011, abgruefen am 24. Februar 2011.
  29. ↑ Wikileaks-Gründer kämpft gegen Auslieferung. Neue Zürcher Zeitung, 12. Juli 2011, abgruefen am 12. Juli 2011.
  30. ↑ Berliner Morgenpost am 2. November 2011: Assange darf ausgeliefert werden. Abgruefen am 2. November 2011.
  31. ↑ Spiegel Online am 2. November 2011: Assange darf nach Schweden ausgeliefert werden. Abgruefen am 2. November 2011.
  32. ↑ Spiegel Online am 5. Dezember 2011: Assange wird vorerst nicht ausgeliefert. Abgruefen am 5. Dezember 2011.
  33. ↑ Spiegel Online am 30 Mai 2012: WikiLeaks-Gründer: Oberstes Gericht stimmt für Assange-Auslieferung. Abgruefen am 30. Mai 2012.
  34. ↑ Spiegel Online am 14. Juni 2012: Julian Assange darf nach Schweden ausgeliefert werden. Abgruefen am 14. Juni 2012.
  35. ↑ WikiLeaks-Gründer: Ecuador gewährt Assange Asyl Archivlink (Memento vom 3. April 2014 im Internet Archive) bi Spiegel Online, 16. Augschte 2012.
  36. ↑ Schweden stellt Ermittlungen gegen Assange ein, Spiegel Online, 19. Mai 2017
  37. ↑ Britische Regierung macht Weg frei für Auslieferung von Julian Assange an die USA, Der Spiegel, 17. Juni 2022.
  38. ↑ 38,0 38,1 Holger Stark, Kai Biermann: 175 Jahre Knast / Briten und Amerikaner behandeln den WikiLeaks-Gründer Julian Assange wie einen Schwerverbrecher. In: Die Zeit, 5. Februar 2020.
  39. ↑ Referänz-Fähler: Uugiltige <ref>-Tag; s isch kei Täxt fir s Ref mit em Name jw-2024 aagee wore.
  40. ↑ Heribert Prantl zu Julian Assange – „Es gilt, für jemanden einzutreten, dem übelst mitgespielt wird“. Abgruefen am 29. Juli 2020.
  41. ↑ London lehnt Auslieferung Assanges bei drohender Todesstrafe ab. Abgruefen am 28. April 2023.
  42. ↑ https://www.welt.de/kultur/plus250218660/Julian-Assange-Als-der-Richter-nach-Todesstrafe-fragt-geht-ein-Raunen-durch-den-Saal.html
  43. ↑ Daniel Zylbersztajn-Lewandowski: Wikileaks-Gründer Julian Assange: Nächste Station Straßburg? In: taz.de. 22. Februar 2024, abgruefen am 7. März 2024.
  44. ↑ Sarah Vojta: Julian Assange: Entscheidung über Berufungsantrag von Assange soll im Mai fallen. In: Die Zeit. 17. April 2024, ISSN 0044-2070 (zeit.de [abgerufen am 18. April 2024]).
  45. ↑ Julian Assange: Schweden stellt Ermittlungen gegen WikiLeaks-Gründer ein. In: Der Spiegel. 19. Mai 2017, abgruefen am 7. Februar 2023.
  46. ↑ Barbara Barkhausen Sydney: »Sie wollen ihn umbringen« (neues deutschland). Abgruefen am 6. April 2021.
  47. ↑ Referänz-Fähler: Uugiltige <ref>-Tag; s isch kei Täxt fir s Ref mit em Name Aufhebung Auslieferungsverbot aagee wore.
  48. ↑ Harald Neuber: Mitglieder des Europarates rufen zu Hilfe für Julian Assange auf. Abgruefen am 22. April 2022.
  49. ↑ Wikileaks: Britische Regierung bewilligt Auslieferung von Julian Assange, Zeit Online, 17. Juni 2022.
  50. ↑ Australiens Premier fordert von USA Ende der Strafverfolgung von Julian Assange. Abgruefen am 1. Dezember 2022.
  51. ↑ Internationale Medien: USA sollen Assange-Verfolgung beenden. In: Tagesschau (ARD). Abgruefen am 1. Dezember 2022.
  52. ↑ WikiLeaks-Gründer: Assanges Antrag auf Berufung abgelehnt. Abgruefen am 10. Juni 2023.
  53. ↑ https://www.sueddeutsche.de/politik/assange-grossbritannien-usa-1.6490924
  54. ↑ Meike Laaff, Lisa Hegemann: Julian Assange: Die Frage nach der Todesstrafe. In: Die Zeit. 26. März 2024, ISSN 0044-2070 (zeit.de [abgerufen am 26. März 2024]).
  55. ↑ Sarah Vojta: Julian Assange: Entscheidung über Berufungsantrag von Assange soll im Mai fallen. In: Die Zeit. 17. April 2024, ISSN 0044-2070 (zeit.de [abgerufen am 17. April 2024]).
  56. ↑ Überblick zum Fall Assange: 2006 fing alles an. In: Die Tageszeitung: taz. 25. Juni 2024, ISSN 0931-9085 (taz.de [abgerufen am 26. Juni 2024]).
Dä Artikel basiert uff ere fräie Übersetzig vum Artikel „Julian_Assange“ vu de dütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Julian_Assange&oldid=1057518"