Juan Antonio Samaranch

Us der alemannische Wikipedia, der freie Dialäkt-Enzyklopedy
dr Juan Antonio Samaranch z 1998

Dr Juan Antonio Samaranch (katalanisch Joan Antoni Samaranch i Torelló, syt 1991 Marqués de Samaranch;[1] * 17. Juli 1920 z Barcelona; † 21. April 2010 ebd.) isch e spanische Sportfunktionär gsi.

Dr Samaranch isch 1966 Mitglid vum Internationale Olympische Komitee (IOC) wore un Sportminischter unter em Franco. Am 16. Juli 1980 isch er as sibte Presidänt vum IOC Noofolger vum Michael Morris, 3. Baron Killanin wore. Är het des Amt 21 Johr gha, bis es anne 2001 dr Belgier Jacques Rogge ibernuu het.

Läbe[ändere | Quälltäxt bearbeite]

dr Samaranch 2007 bi dr Liichtathletik-WM z Osaka.

Dr Samaranch isch us ere ryyche Familie chuu, wu in Textilinduschtri aktiv isch. In syyre Heimetstadt Barcelona isch er uf di Dytsch Schuel gange, voreb er z Großbritannie un in dr Vereinigte Staate Betribswirtschaft studiert het un dernääbe uf e Managementschuel gangen isch.[1]

Är isch Aahänger vum Francisco Franco gsi un Mitglid vu däm syyre faschistische Bartei Movimiento Nacional.[1] As Sportler het er sälber Yyschunschtlauf gmacht, derzue Rollhockey, wun ere zerscht fir Espanyol Barcelona in dr 1950er Johr spanische Nationaldorwart gsi isch un speter di spanisch Nationalmannschaft dreniert gha het. Rollhockey het er au gferderet dur d Organisation un d Finanzierig vu dr Wältmeischterschafte 1951 un 1954 z Barcelona.[1]

Ghyrote isch er syter anne 1955 mit dr Maria Teresia Salisachs Rowe gsi, ere Fryndin vum Franco syyre Dochter Carmen. Dr Samaranch het mit ere zwei Chinder gha, syy Frau isch anne 2000 gstorbe.[1]

In lokale un regionale sportbolitische Ämter isch dr Samaranch syt 1955 aktiv gsi, voreb e dr Franco 1966 zum spanische Staatssekretär fir Sport ernännt un derno au wyter gferderet gha het.[1] Syt 1967 isch er im spanische Barlemänt ghockt, syt 1973 isch er Bresidänt vum katalanische Regionalbarlemänt z Barcelona gsi un Leiter vu dr Brovinzialverwaltig.[1] Scho in dr Transition z Spanie het s Brotescht gege dr Samaranch un syy Roll unter dr Franco-Diktatur gee.[1] In däre Ibergangszyt isch er 1977 spanische Botschafter z Moskau wore.

Dr Samaranch isch am 21. April 2010 gstorbe no re schwäre Härzchranket.

Schrifte[ändere | Quälltäxt bearbeite]

  • Juan Antonio Samaranch Torello: Memorias Olímpicas. 2002.
  • The Samaranch Years. 1980–1994 Towards Olympic Unity. IOC, Lausanne 1995, ISBN 92-9105-021-0 (Interviews von Robert Parienté).

Weblink[ändere | Quälltäxt bearbeite]

 Commons: Juan Antonio Samaranch – Sammlig vo Multimediadateie

Fueßnote[ändere | Quälltäxt bearbeite]

  1. 1,0 1,1 1,2 1,3 1,4 1,5 1,6 1,7 Juan Antonio Samaranch Torello. Spanischer Sportfunktionär und Diplomat; Präsident des IOC (1980–2001). In: Internationales Biographisches Archiv 04/2002 vum 14. Jänner 2002, ergänzt um Nochrichte dur s Munzinger-Archiv-Journal bis 45/2009 (Munzinger-Archiv). Abgruefe am 13. Novämber 2009.