Johann Rudolf Frey

Dialäkt: Baseldütsch

Dr Johann Rudolf Frey (* 2. Dezämber 1781 z Baasel, † 8. Novämber 1859 z Baasel) isch e Baasler Politiker gsi.

Dr Frey isch dr Soon vom Groossroot und Handelsmaa Hans Rudolf Frey und dr Anna Maria Iiseli gsi. Er het e Handelsleer gmacht und isch im Usland umegräist. 1805 het er d Margaretha Stückelberger, d Dochder vom Kaufmaa Johann Rudolf Stückelberger ghürootet. 1821 isch er Vizebresidänt vom Zivil- und Appellazioonsgricht vom Kanton Baasel worde.

Vo 1827 aa isch er as Konservative im Chläine Root gsässe und isch 1829 e Mitgliid vo dr Spezialkommission für Handel und Transit worde. Vo 1830 bis 1849 isch er Bürgermäister vo Baasel gsi und het die nöi Kantonsverfassig am 28. Februar 1831 iigfüert. In vile Beziejige isch die zimlig liberaal gsi, het aber die alte Zumftwaalkräis biibhalte und het de Bevölkerigszaale kä Rächnig dräit. D Laag im Baaselbiet het sich rapid verschlächteret, bis es 1833 zur Däilig vom Kanton Basel choo isch. Dr Frey het dr Kanton Baasel-Landschaft nid für überlääbensfäig ghalte, het aber müesse iigsee, ass er drotz alle Schwiirikäite schliesslig doch z rächt choo isch.

Zwüsche 1831 und 1845 isch dr Frey im Zwäijooresrhüthmus Gsandte bi dr Daagsatzig gsi. 1843 het er bi dr Organisazioon vom Sonderbund vermiddlet. Dr Kanton Baasel-Stadt isch zwar vo dr Ideologii us de reakzionääre Innerschwizer Kantöön noochgstande, isch aber nöitral bliibe, wo dr Sonderbundschrieg usbroche isch und het sini Drubbe erst am 6. Novämber 1847 dr Daagsatzig zur Verfüegig gstellt.

Kwelle

• Kathrin Weber: Frey, Johann Rudolf. In: Historisches Lexikon vo dr Schwiiz.