Johann Baptist Trenkle

Us der alemannische Wikipedia, der freie Dialäkt-Enzyklopedy

Dr Johann Baptist Trenkle (* 26. Oktober 1826 z Fryburg; † 10. Februar 1891 z Charlsrue) isch e badische Archivar un Haimetforscher gsii.

Lääbe[ändere | Quälltäxt bearbeite]

Dr Trenkle isch e Suhn vun eme Fryburger Bröuereibsitzer gsii. Noch em Abitur am Fryburger Lyceum anne 1846 het er an dr Uniwersitet Fryburg zerscht Räächtswisseschafte un derno Kameralwisseschafte studiert. Wel sy Vater finanziäll in Not groten isch, het er s Studium e Zytlang mieße unterbräche un fir d Familie sorge. Im Novämber 1860 isch er Kameralpraktikant wore un het e Volontariat am Hauptstyyramt z Fryburg gmacht. Anne 1861 het er z Charlsrue e Stell as Regischtrator aagfange am Großherzogli Badische Landesarchiv unter em Archivrot Joseph Bader, wu bi ihm s Inträssi an dr badische Gschicht gweckt het. Anne 1869 isch dr Trenkle zum Sekreteer am Großherzoglige Verwaltigsgrichtshof ernännt wore, scho um des Zyt isch er chranklächt gsii. D Stell am Verwaltigsgrichtshof het er bis zue sym vorzytige Ruestand zum 9. August 1890 ghaa. Grad emol e halb Johr speter isch er im Alter vu 64 Johr gstorbe.

Näbe sym Beruef het dr Trenkle e Hufe Biecher un Ufsätz zue dr badische Wirtschafts-, Induschtry-, Kultur-, Literatur- un Chilchegschicht gschribe. Är het unter anderem Artikel publiziert in dr Zytschrift vum Fryburger Gschichtsverain, dr Zytschrift vum Brysgauverain „Schauinsland“ un in dr Alemannia, in dr Fryburger Zytig un dr Charlsruer Zytig, dr Charlsruer Nochrichte oder au im Karlsruher Adreßkalender un im Fryburger Diözesanarchiv.

Anne 1881 het er unter em Titel Die alemannische Dichtung seit J. P. Hebel e Anthology vu dr alemannische Dialäktdichtig uusegee. Är het au sälber im Dialäkt gschribe, unter anderem het er s alemannisch Värsspiil Die Sichelhenke (1881) gschribe.

Uusgläseni Schrifte[ändere | Quälltäxt bearbeite]

  • Freiburgs gesellschaftliche, theatralische und musikalische Jnstitute und Unterhaltungen. Freiburg. Wangler 1856
  • Geschichte der Schwarzwälder Industrie. Karlsruhe 1874.
  • Die alemannische Dichtung seit J. P. Hebel. Ein Beitrag zur Geschichte der deutschen mundartlichen Dichtung. J. Lang, Tauberbischofsheim 1881
  • Beiträge zur Geschichte der Umgegend Karlsruhes. 2 Bd., Karlsruhe 1881-1882
  • Der Korker Waldbrief von 1496. Karlsruhe 1882.
  • Vom nördlichen Schwarzwalde. Kulturgeschichtliches. Baden 1886
  • Über süddeutsche geistliche Schulcomödien. 1866

Literatur[ändere | Quälltäxt bearbeite]

  • Friedrich von Weech: Johann Baptist Trenkle, in: Friedrich von Weech (Hrsg.): Badische Biographieen. Vierter Theil, Karlsruhe 1891, S. 467 f. (Digitalisat).
  • A.R.: † Johann Baptist Trenkle. In: Freiburger Zeitung vom 15. Februar 1891 Digitalisat vu dr UB Fryburg

Weblink[ändere | Quälltäxt bearbeite]

Wikisource Johann Baptist Trenkle im dütschsprochige Wikisource