Internazionali Filmfeschtspiil vu Cannes

s Logo vu dr Filmfeschtspiil

Notiz us em Johr 1939 mit dr Entschaidig vu dr franzesische Regierig, chimftig nimi bi dr Internazionale Filmfestchspiil vu Venedig mitzmache un derfir e aige Feschtival z Biarritz, z Cannes oder z Nizza uuszriichte

dr Rot Deppig

Di Internazionale Filmfeschtspiil vu Cannes (franzöösisch le Festival de Cannes) zelle zue dr wältwyt wiichtigschte Filmfeschtival. Si wäre syter anne 1946 all Johr im Mai an der Côte d’Azur veraastaltet. Hauptveraastaltigsort z Cannes isch s Palais des Festivals et des Congrès. As Hauptpryys fir dr beschte vum Internazionale Wettbewärb wird di Guldi Balme vergee.

Gschicht

Kunzipiert wore sin d Filmfeschtspiil uf Initiative vum franzesische Bildigs- un Kulturminischter Jean Zay. Urspringli scho fir s Johr 1939 blant, hän di eerschte Internazionale Filmfeschtspiil vu Cannes dur dr Zweet Wältchrieg zum eeschte Mool vum 20. Septämber bis 5. Oktober 1946 stattgfunde. 1948 un 1950 isch s Feschtival wäge Finanzierigsschwirigkaite uusgfalle.

Anne 1955 isch dr bescht Film zum eerschte Mool mit dr Guldine Balme uuszaichnet wore. D Trophäe, wu di franzesisch Juwelieri Lucienne Lazon entworfe ghaa het, het dr bis dert vergee „Grand Prix“ abgleest.

Wäg dr Pariser Mai-Uurueje isch d Feschtival 1968 am 19. Mai abbroche wore. Scho am Voroobe isch dr Louis Malle as Mitgliid vu dr Jury zruggdrätte. Dr Malle, dr François Truffaut, dr Claude Berri, dr Jean-Gabriel Albicocco, dr Claude Lelouch, dr Roman Polański un dr Jean-Luc Godard sin in Große Saal vum Palais des Festivals vordrunge un hän gforderet, ass d Vorfierig unterbroche wird us Solidaritet mit dr Arbaiter*ne un Studände*ne, wu gstraikt hän D Akzion isch au as Antwort druf gwärtet wore, ass dr Henri Langlois churz vorhär as Diräkter vu dr Cinémathèque française entloo woren isch.

Bi dr 50. Filmfeschtspiil vu Cannes isch dr Ingmar Bergman mit dr „Balme vu dr Balme“ uuszaichnet wore.

Hite giltet Cannes as ais vu dr wiichtigschte Filmfeschtival vu dr Wält mit em hegschte Prestige.

Wettbewärb un Pryys

D Filmpryys vu dr Internazionale Filmfeschtspiil wäre vun ere Jury vergee, wu all Johr nei zämegstellt wird un in dr Hauptsach us Filmschaffende bstoht. Dr wichtigscht Pryys isch di Guldi Balme (Palme d’Or), wu dr bescht Film vum Wettbewärb dermit uuszaichnet wird. Anderi Pryys, wu vu dr Jury vergee wäre, sin dr Groß Pryys vu dr Jury (Grand prix du jury), dr Pryys vu dr Jury (Prix du Jury) un dr Spezialpryys vu dr Jury. Dernäbe git s Pryys in dr Ainzelkategorie wybligi Darstelleri, männlige Darsteller, Reschy un Draibuech.

D Trophäe wäre vum Schwyzer Juwelier Chopard z Gämf härgstellt un gstiftet. Chopard verleent au dr Schmuck fir di Prominänte.

Anderi Jury zaichne do au Wettbewärbsfilm uus. Am wichtigschte sin dr FIPRESCI-Pryys vu dr internazionale Filmkritik (Prix de la FIPRESCI) un dr Pryys vu dr Ekumenische Jury (Prix du Jury oecuménique).

Näb em Hauptwettbewärb git s vu dr Feschtivalsyte här no dr Churzfilm-Wettbewärb mit dr Guldine Balme fir Churzfilm (Palme d’Or du court métrage), dr Wettbewärb Cinéfondation, wu Arbeite vu Filmstudänte*ne premiert wäre, un d Raie Un Certain Regard, wu syter 1998 dr Prix Un Certain Regard vergee wird.

Im Rame vu dr Internazionale Filmfeschtspiil dien d Verainigung vu dr Reschisseer Société des Réalisateurs de Films mit ire La Quinzaine des Réalisateurs au d Kritikerorganisazion Syndicat français de la critique de cinéma mit ire La Semaine Internationale de la Critique aigeni unabhängigi Parallelveraastaltige durefiere, wu au Pryys vergee wäre. Di Guldi Kamera (Caméra d’Or), wu syter 1978 fir e Erschtligswärch vergee wird, dient do as Chlammere, wel d Pryysdreeger*ne vun ere Jury us dr drei Veraanstaltigsdreeger us em Wettbewärbsprogramm vu dr drei Veraanstaltige uusgsuecht wird.

Di wiichtigschte Uuszaichnige im Iberblick:

Kategory	Originalname	vergee syter
Guldini Balme	Palme d’or	1955
Große Pryys vu dr Jury	Grand Prix	1959
Beschti Darstelleri	Prix d’interprétation féminine	1946
Beschte Darsteller	Prix d’interprétation masculine	1946
Beschti Reschy	Prix de la mise en scène	1946
Bescht Draibuech	Prix du scénario	1969
Pryys vu dr Jury	Prix du Jury	1952
Guldini Balme – Beschte Chuurzfilm	Palme d’or du court métrage	1953
Guldini Kamera – Beschte Debütfilm	Prix de la Caméra d’or	1978
Ehrebalme	Palme d’honneur	2011

Literatur

• Christian Jungen: Hollywood in Cannes: Die Geschichte einer Hassliebe, 1939–2008. Schüren, Marburg 2009, ISBN 978-3-89472-521-1
• Enno Patalas: Cannes. Eine Ordnung im Verfall. In: Filmkritik, Nr. 7, 1966, ISSN 0015-1572, S. 367–368
• Kenneth Turan: Sundance to Sarajevo. Film festivals and the world they made. University of California Press, Berkeley 2002, ISBN 0-585-46625-4, Kap. Cannes, S. 13–30. 

Weblink

 Commons: Internazionali Filmfeschtspiil vu Cannes – Album mit Multimediadateie

• Internazionali Filmfeschtspiil vu Cannes
• La Semaine Internationale de la Critique
• La Quinzaine des Réalisateurs
• Internazionali Filmfeschtspiil vu Cannes

Fueßnote

Dä Artikel basiert uff ere fräie Übersetzig vu dere Version vum Artikel „Internationale_Filmfestspiele_von_Cannes“ vu de dütsche Wikipedia. E Liste vu de Autore un Versione isch do z finde.