Ida Schöpfer

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Ida Schöpfer-Bieri Ski Alpin
Nation SchweizSchweiz Schwiz
Geburtstag 29. Oktober 1929
Geburtsort Flüeli, Schwyz
Stärbedatum 7. Juni 2014
Stärbeort Flüeli, Schwyz
Karriere
Disziplin Abfahrt, Kombination,
Slalom, Riiseslalom
Status gstorbe
Medallienspiegel
Weltmeisterschaften 2 × Gold 1 × Silber 0 × Bronze
FIS Alpini Skiwältmeischterschafte

Gold Åre 1954 Abfahrt
Gold Åre 1954 Kombination
Silber Åre 1954 Slalom
 

D Ida Schöpfer-Bieri (* 29. Oktober 1929 z Flüeli; † 7. Juni 2014 au dert) isch e Schwyzer Skirännlaiferi gsii. Si isch zehfachi Schwyzer Maischteri gsii. Anne 1954 isch si Doppelwältmaischteri in dr Abfahrt un in dr Kombination wore.

Lääbe[ändere | Quälltäxt bearbeite]

D Schöpfer isch us ere altyygsässene Bärgbuurefamilie vu Flüeli (Kanton Lozärn) chuu. Zum erschte Mol uf Skier isch si im Alter vu vier Johr gstande. Speter isch dr Schuelwäg, wu si im Winter uf Skiern zrugglait het, all Dag Training gsii. Ihre erscht Ränne het si anne 1938 im Alter vu nyyn Johr gwunne. In dr Joh drnoo het d Schöpfer e Hufe Titel bi dr regionale Amtsskimaischterschafte un dr Zäntralschwyzerische Maischterschafte gsammlet.

Uf nationaler Ebeni het d Schöpfer zum erschte Mol anne 1948 uf si ufmerksam gmacht, wu si bi dr Schwyzermaischterschaft dr Kombinationsslalom vu dr Juniorine fir si entschide het.[1] Im Johr druf het si dr Gump in d Schwyzer Skinationalmannschaft gschafft. Aafangs 1950er Johr het si derno zue dr erfolgrychschte Fahreri vum Schwyzer Skirännsport avanciert. Zwische 1951 un 1954 het si zeh Titel bi dr nationale Maischterschafte gholt: 1951 im Riiseslalom, 1952 in dr Abfahrt, im Slalom un in dr Kombination, 1953 im Riiseslalom, in dr Abfahrt un in dr Kombination, 1954 im Riiseslalom, im Slalom un in dr Kombination.

Däre nationale Dominanz isch dr international Erfolg zerscht e wenig hintenoo ghinkt. Drotz ass si ne baar Achtigerfolgs gfyyrt het – wie dr dritt Blatz in dr Abfahrt vu dr SDS-Ränne 1949 oder em zweete Blatz im Riiseslalom bi dr vorolympische Wettkämpf 1951 am Holmenkollen – het s d Schöpfer aafangs nit gschafft, dr Schwyzer Dameskirännsport us syre internationale Zwootklassigkait uusezfiere. Bi dr Olympische Winterspiil z Oslo isch si mit eme zehte Blatz in dr Abfahrt un Rang 16 im Riiseslalom ai ni vu dr beschtblatzierte Schwyzerne gsii.

Des het si bi dr Skiwältmaischterschaft 1954 im schwedische Åre gänderet. Urspringli het dr Schwyzerisch Skiverband us finanziälle Grind gar kai Dameteam zue däne Titelkämpf welle schicke. Wu d Schöpfer droht het, ass si nie mee fir dr Verband an dr Start wett goh, hän d Funktionär ihri Haltig gänderet un hän sii un ihri Teamkollegi Madeleine Berthod mit em Zug uf Schwede raise loo. D WM isch zum Hegschtpunk in s Schöpfers Karriere wore. Zerscht het si im Abfahrtslauf di favorisiert Eschtrycheri Trude Klecker um ai Zehtelsekund dischtanziert un dodermit dr erscht WM-Titel fir s Schwyzer Dameteam syt dr Anny Rüegg im Slalom bi dr Wältmaischterschaft 1935 z Mürren, wämer dervu absiit, ass es Abfahrtsgold, wu d Hedy Schlunegger bi Olympia 1948 gholt het, aua s WM-Gold zellt. Uf ihre Paradestrecki, em Riiseslalom, isch si nume Achti woren, aber im Slalom het si mit ere seli guete zweete Lauf d Silbermedallie gwunne. Mit ihre Slalomlaischtig het si au d Kombinationswärtig mit dytligem Vorsprung vor ihrere Landsfrau Madeleine Berthod gwunne un isch dodermit Doppelwältmaischteri wore.

D Ida Schöpfer isch dodruf as erschti Frau zum Schwyzer Sportler vum Johr 1954 gwehlt wore. Dr Skiclub Flüeli het anne 2004 zue ihre Ehre ne „WM-Wuche“ organisiert, wu au Dokumänt un Gegeständ derby uusgstellt wore sin un wu au dr Karl Erb un dr Bernhard Russi mitgmacht hän. D Ida Schöpfer isch im Juni 2014 in ihrem Haimetort Flüeli im Alter vu 84 Johr gstorbe.[2]

Sportligi Erfolg[ändere | Quälltäxt bearbeite]

Olympische Winterspiil[ändere | Quälltäxt bearbeite]

  • Oslo 1952: 10. Abfahrt, 16. Riiseslalom

Wältmaischterschafte[ändere | Quälltäxt bearbeite]

  • Åre 1954: 1. Abfahrt, 2. Slalom, 1. Kombination

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. 42. Schweizerisches Skirennen St. Moritz. In: Jahrbuch des Schweizerischen Skiverbandes. Band XLII, 1948. S. 74.
  2. Ski-Weltmeisterin Ida Schöpfer verstorben, abgruefen am 15. Juni 2014
Information icon.svg Dä Artikel basiert uff ere fräie Übersetzig vu dere Version vum Artikel „Ida_Schöpfer“ vu de dütsche Wikipedia.

E Liste vu de Autore un Versione isch do z finde.