Heini Strübin
Dr Heini Strübin, wo vor em Joor 1450 uf d Wält cho und anne 1517 z Lieschtel gstoorben isch, isch e Schwiizer Wirt und Politiker gsi.
Er isch vo Heerde im Baadische gsi und anne 1477 z Lieschtel ipürgeret worde, won er scho sid 1476 als Wirt erwäänt isch. Anne 1480 isch er in Stadtroot cho, und vo 1496 bis 1517 isch er dr Schultheiss vo Lieschtel gsi.
I dr Stadtgschicht isch er hüt no derfüür bekant, ass er us de Burgunderchrieg vo dr Schlacht bi Nancy e wärtvolli guldigi Schaale heiprocht het; me seit, es sig es Gräät vom burgundische Herzog Karl em Muetige gsi, und si isch eis vo de wärtvollschten Objäkt vom Dichter- und Stadtmuseum Lieschtel.
Am Huus, wo dr Strübin synerzyt drinn gwoont het, isch es grosses historischs Muurbild vom Lieschtel Künschtler Otto Plattner (1861–1951), und uff em Brunne vor em Kantonsmuseum Museum.BL stoot als Tänkmool e Bronzefigur vom Bildhauer Jakob Probst, wo dr Strübin zeigt.
Literatur
[ändere | Quälltäxt bearbeite]- Samuel Schüpbach-Guggenbühl: Strübin, Heinrich. In: Historisches Lexikon vo dr Schwiiz.