S Huus zur Krääje

Us der alemannische Wikipedia, der freie Dialäkt-Enzyklopedy

Koordinate: 47° 33′ 25,8″ N, 7° 34′ 59,2″ O; CH1903: 610875 / 267392

S Huus zur Krääje
Dialäkt: Baaseldütsch

S Huus zur Krääje isch s ehemoolige Gsellschaftshuus vo dr Vorstadtgsellschaft zur Krääije an dr Spaalevorstadt 13 z Baasel. Es gältet as e Baasler Kulturguet, wo für d Regioon vo Bedütig isch.

Es isch hüte in brivate Händ.

Baugschicht[ändere | Quälltäxt bearbeite]

D Liiegeschaft wird scho 1297 in ere Urkunde erwäänt. Si het scho denn «Zur Krääije» oder «Zum Krääjebärg» ghäisse. Wo im 14. Joorhundert die üsseri Stadtmuure baut worde isch und Vorstadtgsellschafte politischi und milidäärischi Rolle übernoo häi, häi sich die, wie d Zümft vor iine Gsellschaftshüüser zuedoo. D Vorstadtgsellschaft in dr Spaalevorstadt het 1399 s Huus zur Krääije kauft. 1442 het si sich e nöis Huus baut und vom alte Huus s Huuszäiche, d Krääje uf em Fünfbärg, übernoo.

1816 het d Gsellschaft e nöis Huus im Empire-Stiil baut. Dr Mooler Maximilian Neustück het d Fassaade vom dreistöckige Geböid aagmoolt. Zwüschen em erste und zwäite Stock het er e Bild vom Rütlischwur und vom Dood vom Gessler in dr Hoole Gass gmoolt. Zwüsche de Fänster oobedraa si d Wabbe vo de 22 Kantöön.

Im spöötere 19. Joorhundert häi d Zümft und d Vorstadtgsellschafte d Rolle müesse ufgee, wo si bis denn gspiilt häi. 1913 het d Vorstadtgsellschaft zur Kräije iir Huus dr Stadt verkauft und spööter e Häim in dr alte Doorwächterstuube vom Spaledoor gfunde.

Verschidnigi Veräin und Ämter si für e Zit im Huus zur Krääije iizooge: dr Veräin zur Verbräitig vo Guete Schrifte und denn s Füürweer-Inspektorat. Hüte isch s Huus Brivatbsitz und im Bardeer isch d «Suppestube zur Krääje».

Kwelle[ändere | Quälltäxt bearbeite]