S Huus uf Burg

Us der alemannische Wikipedia, der freie Dialäkt-Enzyklopedy
Dialäkt: Baseldütsch
S Huus uf Burg am Münsterblatz 4. Rächts nääbedraa s Huus under de Linde.

S Huus uf Burg stoot am nördlige Egge vom Münsterblatz z Baasel. Es stammt us em 19. Joorhundert und isch im klassizistische Stiil baut.

D Liigeschaft[ändere | Quälltäxt bearbeite]

Uf dr Liigeschaft uf em Münsterbärg (in castro - «uf Burg») isch bis in s 19. Joorhundert e Huus vom bischöflige Domkapitel gstande und Nääbegeböid vo dr Johanneskapälle. Noch dr Reformazioon si die mäiste Bsitz vom Bistum und de ufglööste Chlööster vo dr Stadt übernoo und vom ene Schaffner verwaltet worde. D Geböid si vilmol verlodderet. Das isch au mit däm Doomherehuus bassiert, bis es in de 1840er Joor an e Brivaatpersoon verchauft worde isch.[1]

Dä het s alte Geböid lo abbräche und e Woonhuus im klassizistische Stiil lo baue. Es het drei Stöck überchoo, wo jeede Stock en anderi Struktur ghaa het. An dr Ostsite isch s über s Noochberhuus uuse gange, so dass es öbbe dobblet so grooss isch, as wie s vom Münsterblatz us usgseet.

Es isch 1885 dr Freiwillige Akademische Gsellschaft vermacht worde as Woonig für Brofässer und iiri Witwe. Namhafti Gleerti wie dr Theoloog Johann Jakob Grynäus häi dört gwoont, dr Astronoom Johann Jakob Huber, dr Romanisten Ernst Tappolet und dr Historiker Werner Kaegi.[2] Dr katholisch Theoloog Hans Urs vo Balthasar het dört e Zentrum iigrichdet, wo au dr Dichder Kuno Raeber as Studänt e zitlilang drbii gsi isch.[3]

D Paul-Sacher-Stifdig het s Huus lo umbaue und sid 1986 isch s Archiiv für zitgenössischi Muusig do dehäi.

Fuessnoote[ändere | Quälltäxt bearbeite]

  1. [1]
  2. Eugen A. Meier: Verträumtes Basel, Springer-Verlag,2013 S. 145
  3. :Paul Silas Peterson: The Early Hans Urs von Balthasar: Historical Contexts and Intellectual Formation, Walter de Gruyter GmbH & Co , 2015