Hardturm

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
dr Hardturm z Züri

Dr Hardturm isch es Bouwäärch usem Mittelalter z Züri.

Er isch s eltischte no bewoonte Huus i dr Stadt. Er chunt us em 13. Joorhundert; in ere Urkunde vo ane 1336 heisst er «hus in dem harde.

Dr Naame Hard isch en uralte mundartliche Fluernaame für Waldpiet und für teils groodeti Allmände mit Waldstückli druff.[1] Me cha vil do drzue läse bim Schwyzerischen Idiotikon im Artikel «Hard».[2]

Der Turm isch am Egge vo der üssere Schutzmuure wyt vor dr Stadt Züri am Port vo dr Limet uf em Sylfäld usse gsy; dere Muur kweer über s Land bis zu den Uuslöifer vom Üetlibäärg übere het me z Züri «Letzi» gseit.

Dr starch gmuuret Turm gseht uus wie en Burgturm. Im undere Teil sind d Muure, wo men ussenoche uus grosse Findlingsschteine gmuuret het, drüehalb Meter tick, und obedra no bis zu zwöiehalb Meter. Früener het das feschte Huus numen en Ygang höch über em Bode gha, wie me s bi sonige Türm zur Sicherheit immer gmacht het. Hüt isch ussedraa e Stägeturm about. Sit em 16. Joorhundert isch dr Turm privaat, und drno sind drin inne Woonrüüm und ussedraa die chlyne Erker und d Tachfäischter ane bout woorde. Ane 1964 isch s schöne alte Bouwäärch unter Tänkmoolschutz choo.

Vom Turm isch dr Naame vom Zürcher Hard-Kwartier abgleitet. Und au em Tschuttplatz Hardturm und em Hardturmviadukt, wo grad näbem Turm über d Limet goot, het me wäge iim so gseit.

Weblink[ändere | Quälltäxt bearbeite]

 Commons: Hardturm – Sammlig vo Multimediadateie

Fuessnoote[ändere | Quälltäxt bearbeite]

  1. Alexnader Frick: Wald und Gebüsch in unseren Flurnamen. uf ortsnamen.ch
  2. Lueg im Artikel Hard bim Schwyzerischen Idiotikon.