Hamburger Symphoniker

Us der alemannische Wikipedia, der freie Dialäkt-Enzyklopedy

D Hamburger Symphoniker sy 1957 gründet worde. Dr erscht Houptdirigänt vom Hamburger Orcheschter isch dr Robert Heger gsy. Unger syne Nachfolger sy dr Imre Kertesz, dr Carlos Kalmar und dr Miguel Gómez-Martinez gsy. Am Afang vo der Sesong 2004/2005 isch der Andrey Boreyko dr nöi Houptdirigänt vom Orcheschter worde. Zwüsche ihm und de Hamburger Symponiker het sech en eimaligi und künschtlerisch ufregendi Zämearbeit entwicklet.

D Hamburger Symphoniker hei ds Privileg, dass si ds einzige Orcheschter mit Sitz i dr Laeiszhalle Hamburg sy. Ds Orcheschter het mit namhafte Dirigänte wi em Charles Mackerras, Christian Thielemann, Peter Ruzicka, Horst Stein, Ralf Weikert und Sebastian Weigle zämegschaffet. Es paar vo de wältbeschte Solischte, wi dr Christian Tetzlaff, d Elisabeth Leonskaja, dr Frank Peter Zimmermann, d Edita Gruberova, dr Placido Domingo und d Grace Bumbry sy mit em Orcheschter i de letschte Jahr ufträtte.

D Hamburger Symphoniker schpile regelmässig öppe 20 Opere und Ballet i jeder Sesong i dr Hamburger Staatsoper. Ds Orcheschter het internationali Anerkennig dür vil Konzärttournees nach Ängland, Italie, Frankrych, Schpanie, Skandinavie, Pole und id Türkei gwunne.

Ufnahme mit de Hamburger Symphoniker sy bi Dabrinsghaus und Grimm, edel classics und der Deutsche Grammophon erschine (Dütsche Schallplattepriis ECHO Klassik).

Syt vilne Jahr offeriert ds Orcheschter e sehr erfolgrychi Serie vo Chinderkonzärt. Di legendäre jährleche open-air Konzärt im Innehof vom Hamburger Rathuus sy immer usverchouft.

D Hamburger Symphoniker sy e sehr reschpektierti Komponänte vom europäische Kulturläbe.

Weblink[ändere | Quälltäxt bearbeite]