S Hallebaad Rialto

47.5500916666677.5833666666667

S Hallebaad Rialto

Dialäkt: Baseldütsch

S Hallebaad Rialto isch en öffentligs Hallebaad an dr Birsigstrooss 60 / Viaduktstrooss 43–45 in dr Stadt Baasel. Es gältet as e Baasler Kulturguet, wo regionali Bedütig het. S Hallebaad wird vom Erzieigsdepartemänt vom Kanton Baasel-Stadt verwaltet.

Iirichdige

Im Hallebaad het s e Schwümmbeggi, wo 10 uf 25 Meter grooss und zwüsche 1,4 und 3,6 Meter dief isch mit eme Sprungbrätt, und e Beedli zum Schwümme leere. Es biete au Wellnessdienst aa wien e Whirlpool, e Biosauna, e Solarium oder e Sunneterrasse. Für Sportler het s Kraftgräät, Dischdennis und anders.

S Geböid

S Rialto isch vo 1932 bis 1934 vo de Archidekte Emil Bercher und Eugen Tamm baut worde und isch vo dusse ganz mit wisse Blättli verkläidet. Dr Bau het s Thema vo dr Baadfunkzioon ufgriffe, wo Hügiene, Sport und Erhoolig verbindet. Zu sällere Zit isch das vil diskutiert worde.

S Geböid bestoot us drei Baukörper, und das isch d Folg vo Zwäck und Topografii. Unde isch dr Soggel mit dr wite, stützefreije Schwümmhalle, im Middelstück oobedraa, wo mit em Wiadukt verbunde isch, e Restorant und anderi Iirichdige und zooberst uf drei Stöck e Woonblock.

Kwelle

• «Die Badeanstalt ‹Rialto› in Basel» in Der Baumeister, 32. Jahrgang, Dez. 1934, Heft 12
• Architektur in Basel: Hallenschwimmbad Rialto / Viaduktstrasse 60 uf mybasel.ch, abgrüeft am 22. Novämber 2014