Gsamtschuel

Us der alemannische Wikipedia, der freie Dialäkt-Enzyklopedy

D Gsamtschuel isch e Schuelform, wo d Differänzierig id Schuel verlageret wird und s si nüme git zwüsche verschidnige Schuelforme.

D Gsamtschuel z Dütschland isch e Form vonere witerfüehrende Schuel, wo Chinder nach der Grundschuel mindeschdens bis zur 9. oder 10. Klass chöi bsueche. Si isch in mehrere Bundesländer en Alternative zum traditionelle drüglidrige Schuelsyschdem (mit Houptschuel, Realschuel, Gymnasium) worde. Dr wäsentlichi Unterschied zum härchömmleche Schuelsyschdem isch, dass bi der Gsamtschuel d Differänzierig i d Schuel verlageret wird und nümme zwüsche verschidnige Schuelformen beschdot. Nach der 10. Klass cha ad Gsamtschuel e gymnasiali Oberschduefe aschliesse, während e Deil vo de Schüeler i brueflechi Usbildigsgäng usserhalb vo der Gsamtschuel wächslet.

Wird d Gsamtschuel ned näbem drüglidrige Schuelsyschdem, sondern as alleinigi Schuelform mindeschdens bis zur 9. Klass etabliert, redet me vo Einheitsschuel. Das isch das, wo d Schuelreformer z Dütschland urschbrünglech hei welle. Faktisch aber si bis hüt nume Gsamtschuele zuesätzlech zu de bereits vorhandene Schuelforme gschaffe worde, was bewirkt het dass sech s Schulsystem no schdercher glideret het. As politisch realisierbare Wäg zeichnet sech derzit di integrativi Sekundarschuel ab, wo d Houptschuel, d Realschuel und d Gsamtschuel wot zämelege und en eigeni Oberschduefe het. Immer meh Bundesländer übernäme das „Zwöi-Wäg-Modäll“ vom witerfüehrende Schuelsystem vom Bildigsforscher Klaus Hurrelmann, wo faktisch en Umsetzig vo der Gsamtschuel isch näbem Gymnasium, wo s no witer git. E witeri Alternative, wo sech in vilne Bundesländer düresetzt, isch d Gmeinschaftsschuel, wo Schüelerinne und Schüeler vo der Grundschuel a d Möglechkeit git, dass si ihri gsamti Schuelzit bis zum Abitur inere einzige Schuel blibe.

Z Öschdrich gits derzit – usser Alternativschuelkonzäpt – ke Gsamtschuel. Nur z Wien gits sit 1972 es paar Gsamtschuele, wo im Rahme vomene Schuelversuech igrichdet worde si. Dä Schuelversuech isch am Afang uf zäh bis fünfzäh Jahr plant gsi, 1986 isch er aber uf unbeschdimmti Zit verlengeret worde. Dür das hei di wenige Wiener Gsamtschuele aber ke offizielle Schdatus (offiziell sis Houptschuelene) und chönnte ou jederzit beändet wärde. Über e durhafti Ifüehrig vo der Gsamtschuel parallel näbe de n andere Schueltype wie der Houptschuel und em Gymnasium wird aber sit öppe 2004 vil diskutiert, en entschbrächende Beschluss isch aber noni gfasst worde.

Ou i der Schwiz gits kes entschbrächends Konzept.

Dä Artikel basiert uff ere fräie Übersetzig vu dere Version vum Artikel „Gesamtschule“ vu de dütsche Wikipedia. E Liste vu de Autore un Versione isch do z finde.