Georg Jakob Schneider

Dr Georg Jakob Schneider (* 18. Juni 1809 z Aistett; † 18. Dezämber 1883 z Badewyyler) isch e dytsche Architäkt gsii.

Lääbe un Wäärch

Dr Schneider isch e Suhn vum Johann Georg Schneider (1767–1852), eme Zimmermann, un däm syre Frau Ursula geb. Brandenberger (1771–1833) gsii. No dr Volksschuel het er au Zimmermann glehrt z Ämmedinge. Noch em Militeerdienst vu 1830 bis 1833 isch er uf s privat gfiert „architäktoonisch Zaicheninschtitut“ vum Christoph Arnold z Fryburg gange. Ab 1833 het er an dr Polytächnische Schuel Chaarlsrue bim Friedrich Eisenlohr Architäktuur studiert. Dää het em noch em Abschluss vum Stuudium d Böulaitig zum Neiböu vum Schloss Orteberg iberdrait. Derno het dr Schneider as Gwäärbhauptschuellehrer z Fryburg gschafft un het in däre Zyt e Hufe Blään vor allem fir Sinagooge un rebresäntatiivi Böute entwoorfe.

Dr Schneider, wu vyyl Blään fir Sinagooge in dr Ortenau entwoorfe het, het vyylmool neigootischi Foorme bruucht, zem Byschple bim Colombischlessli z Fryburg (1859–61), wu in änglisch-neigootischem Stiil ghalten isch. Au d Blään fir dr Böu vu dr Sinagoog z Kippene (1850/51) stamme vum Schneider. 1843 het er e Uusböu vu dr Sinagoog z Schmieheim blaant, 1853 e Umböu vu dr Sinagoog z Ruescht. Au d Sinagoog z Mille (1851/52) isch vum Schneider blaant woore, derzue au d Sinagoo z Ihringe (1861–63/64) un di Sinagoog z Fryburg, wu vu 1869 bis 1870 böue wooren isch. Dr Schneider het au Blään gliiferet fir e Umböu vum Schloss Langenstein, wu aber nit uusgfiert woore sin, un fir e Neiböu vum Schloss Gondelsheim, baidi hän em Carl Israel Vilhelm Graf Douglas gheert.

Am 27. Juli 1841 het dr Schneider d Christine Meier (* 1815) vu Aistett ghyroote, mit iire het er nyyn Chinder ghaa.

Schrifte

• Entwürfe theils ausgeführten Privat- und Gemeinde-Bauten, bestimmt für Gewerbeschulen und überhaupt für die Baugewerbe. Freiburg im Breisgau 1859

Literatur

• Bernhard Vedral: Georg Jakob Schneider (1809–1883). Gewerbeschulhauptlehrer und Architekt. In: Peter Schickl (Hrsg.): Gewerbeschule Freiburg 1837–1987. Festschrift zum 150jährigen Bestehen der Freiburger Gewerbeschulen. Freiburg i. Br. 1987, S. 192–196.
• Peter Kalchthaler: Freiburger Biographien. Freiburg i. Br. 2002, S. 142–143.
• Jürgen Stude: Georg Jakob Schneider. Der Baumeister der Synagogen. In: Geroldsecker Land 55, 2013, S. 27–40.

Weblink

 Commons: Georg Jakob Schneider – Sammlig vo Multimediadateie

Dä Artikel basiert uff ere fräie Übersetzig vu dere Version vum Artikel „Georg_Jakob_Schneider“ vu de dütsche Wikipedia. E Liste vu de Autore un Versione isch do z finde.