Gfäärdeti Arte

Us der alemannische Wikipedia, der freie Dialäkt-Enzyklopedy
Die Goldigi Chrott, wo mä am 15. Mai 1989 zum letschte Mol äini gsee het.

E gfäärdeti Art isch e biologischi Art, wo in Gfoor isch, vo dr Wält z verschwinde. D Wältnaturschutzunion International Union for Conservation of Nature and Natural Resources (IUCN) und anderi Inschtituzioone und Staate gän Rooti Liste uuse, wo alli Arte din vorchömme, wo d Existänz von ene iirer Mäinig nooch in Gfoor isch. Si underschäidet derbii verschiideni Grubbe vo Gfäärdig vo usgstorbe über kritisch bis zu gar nid gfäärdet. Vili Länder stütze sich bi iire Naturschutzmaassnaame of d Liste vo dr IUCN und schränke zum Bischbild d Jagd uf gfäärdeti Spezie ii, schütze Biotop, wo gfäärdeti Arte vorchömme, oder starte Brogramm, zum ene aktiv bim Überlääbe z hälfe.

Wil e groosse Däil vo de Wirbeldierarte wüsseschaftlig erfasst isch, cha mä bi dene relativ guet iischetze, weli Arte vom Usstärbe bedroot si. Bi Insekte, Bilz und Äizäller isch das seer vil schwiiriger.

Im Joor 2007 het d IUCN gschetzt, ass vo de Nacktsamige Pflanze, wo si 1021 Arte von ene erfasst het, 32 Brozänt gfäärdet si, vo 6433 Amfibiearte sig es 29 Brozänt, vo 5490 Säugerspezies si 21 Brozänt in Gfoor und vo 9998 bekannte Vogelarte 12 Brozänt. Im Vergliich isch dr Homo sapiens sapiens as LC (least concern) kategorisiert.

Dä Artikel basiert uff ere fräie Übersetzig vum Artikel „Endangered_species“ vu de änglische Wikipedia. E Liste vu de Autore un Versione isch do z finde.