Fryburger Barockorcheschter

s Ensemblehuus z Fryburg, Sitz vzm Fryburger Barockorcheschter, im Meerz 2015

S Fryburger Barockorcheschter (FBO) isch e uf historisch-informierti Uffierigsprxis spezialisiert Orcheschter mit Sitz z Fryburg, wu vor allem Musik us em 17., 18. Joorhundert un dr eerschte Helfti vum 19. Joorhunderts spiile duet. S Orcherschter isch vu dr Räächtsfoorm här e Gsellschaft vum buurgerlige Räächt.

Musikalisch Wiirke

S FBO isch anne 1987 us studäntische Initiative vu dr Fryburger Musikhochschuel, nit zletscht vu Schueler*ne vum Rainer Kussmaul grindet woore. S spiilt reegelmääßig aigeni Kunzärtraie im Kunzärthuus Fryburg, in dr Liederhalle Stuegert un dr Berliner Philharmonie. S FBO isch uf internazionaale Kunzärtraise unterwägs un giltet hite as „eines der besten Alte-Musik-Ensembles der Welt“.

Nääbe Yyspiilige un Uffierige vu dr Musik vum Barock, wun em dr Name gee het, stehen au all Ritt Wäärch us dr Klassik un Romantik uf em Brogramm un s git au „Uusfliig“ in di Nei Musik (zem Byschpel uf dr. Eschinger Musikdääg 2006).

S FBO duet in dr grooße Kunzärtsääl vu dr Wält ufdrätte (u. a. Wigmore Hall, Lincoln Center, Concertgebouw Amsterdam, Palau de la Música Catalana, Kölner Philharmonie, Wiener Musikverein, Philharmonie de Paris), vylmol zäme mit Chinschtler*ne wie Christian Gerhaher, Philippe Jaroussky, Cecilia Bartoli, Thomas Quasthoff oder em RIAS Kammerchor. Doderby wird s unterstitzt vu Solischte wie dr Spezialischte fir historischi Taschteninschtrumänt Andreas Staier, Kristian Bezuidenhout oder Alexander Melnikow un dr Gyygeri Isabelle Faust un dr Gambischti Hille Perl.

Dr Barockgyyger Gottfried von der Goltz un dr Pianischt un Tschembalischt Kristian Bezuidenhout daile si di di chinschtlerisch Laitig. Reegelmääßig wird s Orcheschter au vu namhafte Gaschtdirigänt*ine wie René Jacobs, Trevor Pinnock, Philippe Herreweghe, Ton Koopman, Ivor Bolton un Pablo Heras-Casado glaitet.

E chlaini Formazioon spiilt as Fryburger BarockConsort vor allem Chammermusik us em 17. un 18. Joorhundert. Zum Repertoire gheere unter anderem Wäärch vu Heinrich Ignaz Franz Biber, Johann Heinrich Schmelzer oder Antonio Bertali.

Zaalryychi CD-Ufnaame sin yygschpiilt woore, unter anderem mit Kumpesizioone vu Johann Sebastian Bach, Georg Friedrich Händel, Antonio Vivaldi, Georg Philipp Telemann, Joseph Haydn, Wolfgang Amadeus Mozart, Franz Schubert, Robert Schumann un Felix Mendelssohn Bartholdy. S Orcheschter vereffetligt bim franzeesische Label harmonia mundi un em Label vum Carus-Verlag. Meereri vu däne Yyspiilige sin uuszaichnet woore.

Anne 2013 het s Ensemble dr Orcheschterpart in ere fir s Fäärnsee produzierte Inszenierig vu Idomeneo gspiilt, Reschy het dr Stéphan Aubé gfiert, gsunfge hän unter anderem dr Gaëlle Arquez un d Sophie Karthäuser.

Syt Mai 2012 het s Orcheschter sy Haimet zäme mit em ensemble recherche im nei böuene Ensemblehuus Fryburg mit Biro- un Proobryym näbe dr alte Stadthalle un in dr Noochberschaft zue dr Musikhochschuel.

Weblink

• Offiziälli Websyte vum Fryburger Barockorcheschter
• Interview mit den beiden Konzertmeistern Petra Müllejans und Gottfried von der Goltz in klassik.com, 2007

Fueßnote

Dä Artikel basiert uff ere fräie Übersetzig vu dere Version vum Artikel „Freiburger_Barockorchester“ vu de dütsche Wikipedia. E Liste vu de Autore un Versione isch do z finde.