Freibärge

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

As Freibärge (französisch: Franches-Montagnes) wird e Region im Südweste vom Kanton Jura bezäichnet. Au Gebiet nääbedraa im Kanton Bärn wärde geografisch zu dere Landschaft zelt. D Freibärge bilde es Hoochblatoo im Jura, wo uf ere durchschnittlige Hööchi vo 1'000 m ü. M. liit und öbbe 200 Kwadratkilometer gross isch. Politisch ghööre si zum Bezirk Bezirk Freibärge (Franches-Montagnes). Dr wichdigst Ort isch Saignelégier.

d Landschaft bi Le Bémont

S Hoochblatoo vo de Freibärge isch öbbe 25 Kilometer lang, maximal 9 Kilometer bräit und goot vo La Chaux-de-Fonds im Südweste bis zum Delschbärger Becki im Nordoste. Begränzt wird d Landschaft im Norde und Nordweste vom diefe Daal vom Doubs, im Weste vo de Combe de Valanvron, im Süde vo de Hööchene vom Montagne du Droit. Im Oste göön d Freibärge nodinoo in d Zone vom Daal vo Tavannes und vom Iizugsgebiet vo dr Sorne über, wo e dütlig sterkers Rölief häi.

S Hoochblatoo isch charakterisiert dur meereri Hööchene, wo parallel in dr Richdig vo Westsüdwest uf Ostnordost ligge. Zwüsch deene befinde sich wite Mulde, wo s vilmol Moos, Sümpf und chlyni Seeè het. D Höchenunderschiid si chlii; d Mulde lige mäistens uf 950 bis 1020 Meter, wääred d Hööchene bis uf 1050 bis 1100 Meter uufe gönd. Dr höggst Punkt vo de Freibärg isch dr Point de Vue westlig vo Les Breuleux, wo 1'185 m hooch isch.

Uf öbben eme Fünftel vom Gebiet stöön Danne- und Fichtewälder, öbbe 36 Prozänt vo dr Flechi si so genannti Waldwäide oder Wytwäide, d pâturages boisés; das sin tüpischi Wäide vom Hoochjura mit mächdige Fichte, wo äinzeln oder in Gruppe ume stöön. 40 Prozänt si Matte oder Ackerland, und dr Räst Siidligsflechene. D Matte und s Wäidland wärde a vilne Stelle dur Drochemuure vonenander drennt.

Weblingg[ändere | Quälltäxt bearbeite]

47.2043316.979786Koordinaten: 47° 12′ 16″ N, 6° 58′ 47″ O; CH1903: 565235 / 228257