Franco Costanzo

Us der alemannische Wikipedia, der freie Dialäkt-Enzyklopedy
Franco Costanzo
Personalia
Name Franco Costanzo
Wänn uf d Wält choo 5. Septämber 1980
Wo uf d Wält choo Río Cuarto, Argentinie
Größi 187 cm
Position Goali
Dialäkt: Baseldütsch

Dr Franco Costanzo (* 5. Septämber 1980 in Rio Cuarto, Argentinie) isch e argentinische Fuessball-Goali.

Vereinskarriere[ändere | Quälltäxt bearbeite]

Är het sini Profikarriere bi River Plate (Buenos Aires) im Joor 2000 agfange. Mä het em e steili Karriere vorusgseit, aber är isch durch divärsi Verletzige immer widr zrugggworfe worde. Trotzdäm het är witterhin als Talänt golte und het mit River Plate dreymol die argentinisch Meischterschaft gwunne. Im Summer 2005 het är zum baskische Club Deportivo Alavés gwäggslet, wo är in dr Saison 2005/06 31 Meisterschaftsspiil beschtritte het.

FC Basel[ändere | Quälltäxt bearbeite]

Im Juli 2006 het ihn dr FC Basel für öppe drey Millione Schwizer Frangge us em laufende Vertraag usekauft. Nach e baar Patzer am Aafang und vile (Uswärts-) Niderlage in dr Hiirundi, het är e grossartigi Ruckrundi gspiilt und isch sogar zum FCB-Spiler vom Joor gwählt worde. In dr Saison 2007/08 het dr Costanzo mit em FC Basel sini erschti Schwizer Meischterschaft gwunne.

In dr Saison 2008/09 het dr FC Basel in dr Champions League gspiilt. Nach souveräne Sieg in dr Qualifikation sin d Basler in dr Grubbephase uf en FC Barcelona, Sportig Lissabon und Schachtar Donezk troffe. Sit dr gliiche Saison isch dr Franco Costanzo Captain vom FC Basel und drmit Noochfolger vom Ivan Ergic worde, wo das Amt freywillig abgäh het.

2011 isch si Kontrakt bim FC Basel abgloffe und nüm erneueret worde.[1] Si Noochfolger im Goal isch dr Yann Sommer gsi.

Dr Franco Costanzo het im Juni 2011 bi Olympiakos Piräus underschriibe und isch dr Noochfolger vom Antonios Nikopolidis worde.[2] Im Winter 2011/12 isch si Verdraag ufglööst worde. Sit 2013 isch er bim CD Universidad Católica in Chile.

Nationalmannschaft[ändere | Quälltäxt bearbeite]

In sinere bishärige Karriere het dr Costanzo ei Länderspiil mit dr agentinische Nationalmannschaft beschtritte, bi zwei wittere isch är uf dr Bank gsässe.

Erfolg[ändere | Quälltäxt bearbeite]

  • U-20-Südamerikameister: 1999
  • Argentinische Meischter: 2002 (Clausura), 2003 (Clausura), 2004 (Clausura)
  • Schwizer Cup; 2007, 2008, 2010
  • Schwizer Meischter: 2008, 2010, 2011

Person und Familie[ändere | Quälltäxt bearbeite]

Dr Franco Costanzo isch argentinisch-italiänische Dobbelbürger und het drei Chinder.

Weblink[ändere | Quälltäxt bearbeite]

 Commons: Franco Costanzo – Sammlig vo Multimediadateie

Fuessnoote[ändere | Quälltäxt bearbeite]

  1. Franco Costanzo verlässt den FC Basel auf SF Sport abgerüeft am 14. April 2011
  2. Costanzo zu Olympiakos Piräus NZZ Online vom 11. Juni 2011