Forseti

Us der alemannische Wikipedia, der freie Dialäkt-Enzyklopedy

De Forseti (aisl. „Vorsitzer“) isch i de nordische Mythologii de Richter vo de Götter und zällt zu de Ase. Er isch de Soo vom Baldr und vo de Nanna und sin Palast haisst Glitnir. Obwoll de Gott nu ide Edda erwähnt werd, so schint er doch e gwüssi Vereerig gfunde ha, wie de Ort Forsetlund (»Forseti-Hain«), wo am Oslofjord lit, bizügt.

Fosite[ändere | Quälltäxt bearbeite]

I de früemittelalterliche Schrifte werd d Insle Helgoland i de Nordsee Fositesland gnennt, well uf ere e Hailigtum vom Gott Fosite glegen isch, mit ere hailige Quele, wo mer nu under absolutem Schwige het töre devo trinke. Zudem isch s Vee wo do gwaidet het em Fosite gwiicht gsii und s het drum nöd tööre tödet were. De Misiionar Liudger het da Hailigtum im Joor 785 kaputt gmacht.

Dur falschi Lesige vo de alte Schrifte isch den im Mittelalter vo Helgoland en "templum Fostae vel Phosetae" uuftaucht, wo denn mit "templum Vestae" latiniseiert worden isch und somit fälschlicherwiis mit de römische Herdgöttin Vesta vergliche worden isch. Drus hend denn Romantiker und Noihaide et Göttin Fosta ersune, wo aber tatsächlich sich nie i alte Schrifte findet.

Öb de Gott Fosite aber au mitdem nordische Forseti gliichgsetzt werde cha isch frooglich, well di baide Näme nöd würkli öberiistimet.

Büecher[ändere | Quälltäxt bearbeite]