Ernest Meissonier

Us der alemannische Wikipedia, der freie Dialäkt-Enzyklopedy
Ernest Meissonier, Sälbstbordret (1889)
D Belaagerig vo Bariis
Dr Napoleon III. z Solferino
Campagne de France, 1864

Dr Jean Louis Ernest Meissonier (* 21. Februar 1815 z Lyon; † 31. Januar 1891 z Bariis) isch äine vo de bekanntiste franzöösische Mooler in de 1850 und 1860er Joor gsi.[1]

Lääbe[ändere | Quälltäxt bearbeite]

Dr Meissonier isch no jung gsi, won er uf Bariis cho und Schüeler vom Léon Cogniet worden isch. Gliichzitig het er aagfange, im Louvre niiderländischi Mäister wie dr Peter Paul Rubens oder dr Anthonis van Dyck z kopiere. Us finanzielle Gründ het er am Aafang vo siner Karriere Ufdraagsarbeite für verschiideni Buechdrucker m[esse mache. So si Illustrazioone für meereri Usgoobe vo dr Bible und für verschidnigi Wärke vom Jacques Bénine Bossuet entstande. „Dr raasendi Roland“ vom Ludovico Ariosto isch vo Meissonier genauso illustriert worde wie im Jacques-Henri Bernardin de Saint-Pierre si „Paul und Virginie“ und „Dii indischi Hütte“.

Won er 21 gsi isch, het dr Meissonier denn 1836 bin ere Usstellig vom Bariiser Salon mit sim Schanerebild „Dr chlii Boot und dr Schachschbiiler“ si Debü gee. Mit däm het er au scho si Stil gfunde und in de neggste Joor het er meereri Wärk gmacht, wie 1838 „E Mönch, won e Chranke duet drööste“ oder 1840 „Dr Lääser“. S Publikum het die Süsche begeisteret ufgnoo und au die offizielli Kunstkritik het fast immer nume loobendi Wort gfunde. Si Gmäld „D Schachbartii“ isch uf dr Usstellig vom Bariiser Salon vo 1841 mit ere Medallie bremiert worde.

Dr Meissonier het mit Vorliebi Persoone us dr Zit vom Louis XIV. und Louis XV. gmoolt. Es si denn e Hufe Bilder cho, won er immer mit üsserster Gwüssehaftigkäit usgfüert het, mäistens in ere scharfe, aber chüele Charakteristik, wo nit allzu dief in d Seel iidrunge isch, und in ere eligante Stoffmoolerei.

Gläägentlig het er au Motiv us dr nöiere Gschicht gmoolt, die Fäldzüüg vom Napoleon I. und vom Napoleon III.. Er het aber nume denn e gröösseri Wirkig ghaa, wenn er sich uf nume e baar Figuure in chliinem Maassstaab beschränkt het. Für Komposizioone mit e Hufe Figuure (zum Bischbil d Kürassier vo 1805) und für Bilder mit gröösserem Format het im Meissonier si Usdrucksfähigkäit nit glängt.

1867 isch dr Meissonier iiglaade worde, an dr Wältusstellig z Bariis mitzmache. Er isch mit fümf Gmäld, „Vorlääsig bim Diderot“, „Dr Kapitän“, „Kavalier vor eme Wirtshuus“, „Dr General Desaix bi dr Rhiiarmee“ und „D Ordonanz“, verdräte gsi. E baar vo deene het er äxtra für dä Aalass gmoolt.

Si Wärk „D Wach“ isch 1874 uf dr Usstellig vom Bariiser Salon lobend erwäänt worde. Dr Meissonier het nid e Hufe Schüeler gha; zu deene häi si Soon Jean Charles Meissonier (* 1848) ghöört, dr Jean Baptiste Edouard Detaille und au dr dütsch Mooler Fritz Werner.

Dr Meissonier isch im Alter vo 75 am 31. Januar 1891 z Bariis gstorbe.

Rezeptioon[ändere | Quälltäxt bearbeite]

Im Meissonier sis ganze künstlerische Wärk isch immer dr Moode underworfe gsi. Sini Öölgmäld, gradso wie siie Grafike und Zäichnige bildeniiri Süsche ab, si aber fast immer e bitzeli ooni Lääbe.

Wärk (Uswaal)[ändere | Quälltäxt bearbeite]

  • Dr chlii Boot und dr Schachschbiiler (1836)
  • E Mönch, won e Chranke duet drööste (1838)
  • Dr änglischi Dokter (1839)
  • Dr Lääser (1840)
  • D Schachbartii (1841)
  • Dr Mooler in sim Ateliee (1843)
  • D Liibwach
  • E junge Maa, wo Zäichnige aaluegt
  • d Pikettbartii (1845)
  • Dr Cheegelschbiiler
  • D Soldaate (1848)
  • Die Bravi (1852),
  • Dr Huefschmiid
  • Dr Napoleon I. mit sim Staab 1814
  • Dr Napoleon III. z Solferino (1864)
  • D Folge vom ene Händel bim ene Schbiil (1865)
  • E Vorlääsig bim Diderot
  • Dr Kapitään
  • Kavalier vor eme Wirtshuus
  • Dr General Desaix bi dr Rhiiarmee
  • D Ordonnanz
  • D Wach (1874)
  • 1807 (Dr Napoleon I. in dr Schlacht vo Friidland)

Liddratuur[ändere | Quälltäxt bearbeite]

  • Ernest Meissonier. In: Ulrich Thieme, Felix Becker u. a.: Allgemeines Lexikon der Bildenden Künstler von der Antike bis zur Gegenwart. Band 24, E. A. Seemann, Leipzig 1930, S. 347
  • Ross King: The Judgement of Paris. The Revolutionary Decade that gave the World Impressionism. Pimlico Edition, London 2007, ISBN 978-1-844-13407-6.

Fuessnoote[ändere | Quälltäxt bearbeite]

  1. Ross King: The Judgement of Paris, S. 1

Weblingg[ändere | Quälltäxt bearbeite]

 Commons: Jean-Louis-Ernest Meissonier – Sammlig vo Multimediadateie
Dä Artikel basiert uff ere fräie Übersetzig vum Artikel „Ernest_Meissonier“ vu de dütsche Wikipedia. E Liste vu de Autore un Versione isch do z finde.