Emilie Zumsteeg

D Emilie Zumsteeg (gebora am 9. Dezembr 1796 z Stuegert, wo-se am 1. Auguscht 1857 au gschdorba ischt) ischt a deitscha Kombonischdin, Musiklehrere, Chorleidere, Pianischdin ond Musikschriftstellere gwäa.

Aus ihrem Leaba

D Emilie Zumsteeg kommt am 9. Dezembr 1796 z Stuegert uf d Welt. Ihr Vaddr isch dr berihmde Johann Rudolf Zumsteeg, em wirdabergische Keenich sei Konzertmoischtr. D Muadr vo deam Mädle ischt d Luise Zumsteeg geborene Andreä. Zamma hend-se siiba Kendr; d Emilie isch de jengscht vo-nen. Wia-se fenf Johr alt ischt, stirbt ihr Vaddr. Vo sellem hot d Emilie ihr graußa musikalischa Begabong gerbt. Des woiß abr au de verwitwet Muadr. Drom sorgt-se drfir, dass ihr Dochtr vom Gottlob Schick em Klaviirschbiila ondrrichdet wuud. Drzua noh nemmt-se Gsangsondrricht beim Chordirektr Wilhelm Sutor. Em Haus Zumsteeg send efders môl vrschiidne Stuegerter Hofkabellmoischtr zo Gascht ond bewondret des grauße Talent vo deam Mädle. Dô drzua gheeret ondr andrem dr Conradin Kreutzer, dr Peter Joseph von Lindpaintner ond dr Carl Maria von Weber. So isch’s au koi Wonder, dass d Emilie nôch ihrer Schualausbildong an musikalischa Beruaf ergreift: Se wuud Musiklehrere. Ihre Schialer send hauptsächlich weibliche Persona. Des brengt-se bald uf dui Idee, mit de selle an Liadrkranz bloß fir Fraua ens Leaba zo ruafa. D Liadr, wo deet gsonga werret, schreibt-se nadiirlich selber ond begleidet da Chor uf-em Klaviir. Aus ihrer Feader fliaßet abr et bloß Kombosiziona, se vorfasst au Artikl fir s Musikalische Volksblatt, a Stuegerter Musikzeitschrift.

Am 1. Auguscht 1857 schliaßt-se d Auga fir emmr. Beigsetzt wuud-se uf-em Stuegerter Hobbalaufriidhof. Heitzodag ischt-se bloß noh ganz wenig Leit an Begriff. S geit au kaum noh a Musiklexikoo, wo se dren erwehnt wuud.

Was erennret heit noh an d Emilie Zumsteeg?

Uf-em Stuegerter Hobbalaufriidhof kôô-mr heit noh dr Emilie Zumsteeg ihr Grab ôôgucka, wia-mr rechts uf-em Bildle siht. Des isch abr koi Wonder, schliaßlich stôht der Friidhof ondr Denkmalschutz. Dr musikalische Nôchlass vo dr Emilie Zumsteeg – hauptsächlich Manuskript – wuud bei dr Wirdabergischa Landesbibliothek ufghoba. Em Treffpunkt Rotebühlplatz, em Kuldurzentrum vo ihrer Geburtsstadt, hot oiner vo de Vorôstaldongssäl da Nama vo-ra kriagt.

Was-se gschriiba hot (Auswahl)

Obzusiegen wähnt die Zeit, a Liad mit Klaviirbegleidong als Nôchruaf uf da Dod vo dr Keenigin Katharina vo Wirdaberg
Schlaf holder Königsknabe, a Wiigaliadle fir da wirdabergischa Thronfolger Carl nôch-ma Tekscht vom Obrhofprediger Grüneisen
Das Lieblingsplätzchen, a Liad fir a Sengstemm mit Klaviirbegleidong
Der Sternenhimmel, nomôl a Liad fir a Sengstemm mit Klaviirbegleidong
Blicke wild auf uns hernieder, a Liad fir-en Mennerchor als Nôchruaf uf da Carl-Maria von Weber
Trennung ohne Abschied
Für meines Herzens bittre Klagen
Briefe (1839 bis 1843)

Litradur

Martina Rebmann: Wie Deine Kunst, so edel war Dein Leben. S Werkvrzoichnis vo dr Stuegerder Kombonischdin Emilie Zumsteeg, ufgnomma em Heft „Musik in Baden-Württemberg“, Stuttgart 2/1995, S. 51-74
Emilie Zumsteeg: Lieder und Duette. D Werkausgab, wo d Martina Rebmann rausgäa hot; Carus Verlag Stuttgart, 1998.

Weblink