Dioskur (Gegepapscht)

Us der alemannische Wikipedia, der freie Dialäkt-Enzyklopedy

Dr Dioskur (* z Alexandrie; † 14. Oktober 530 z Rom) isch anne 530 Gegepapscht gsii.

Lääbe un Wirke[ändere | Quälltäxt bearbeite]

Dr Dioskur isch wahrschyns us em oschtremische Rych chuu. Scho vor 514 het er hochi Chilcheämter unter em Papscht Symmachus ghaa, speter au unter em Hormisdas.

Wel dr Dioskur seli guet Griechisch het chenne un d Brych z Oschtrom besser gchännt het wie anderi, isch er 519 dr wichigscht Unterhändler bi dr Verhandlige zum Änd vum Akakianische Schisma z Konstantinopel wore. Wu dr Papscht Felix III. (IV.) 530 gstorbe isch, isch är dr uussichtsrychscht Kandidat fir dsällem syni Noofolg gsii.

Är isch au wirkli am 22. Septämber 530 vu dr Meehait vum Klerus zum Papscht gwehlt wore; e antibyzantinischi Minderhait het aber zytglych dr Got Bonifatius II., wu vum Felix empfohle wore isch, zum Noofolger vum Verstorbene gwehlt. Nume dr frie Dod vum Dioskurs (Mitti Oktober 530) het dr Bonifatius as ainzige Papscht ibrig gloo un het em Schisma en Änd gmacht.

Grad am Byschpel vum Dioskurs losst si d Problematik vum Uusdruck „Gegepapscht“ dytli mache: Är isch vum Mee vu dr Chilche gwehlt wore. Nume wel dr Bonifatius im Dezämber 530 alli Kleriker zwunge het, ihri „Fähler“ zuezgee un dr Dioskur noodregli z verdamme, het däm emänd dr Titel „Gegepapscht“ yybrocht.

Literatur[ändere | Quälltäxt bearbeite]

  • Philippe Levillain (Hrsg.): Dictionnaire Historique de la Papauté. Fayard, Paris 1994, ISBN 2-213-02537-1.
  • Friedrich Wilhelm Bautz: Dioskur. In: Biographisch-Bibliographisches Kirchenlexikon (BBKL). Band 1, Hamm 1975, Sp. 1327–1328.
  • Ytrag in d Catholic Encyclopedia, Robert Appleton Company, New York 1913 (änglisch)
Dä Artikel basiert uff ere fräie Übersetzig vu dere Version vum Artikel „Dioskur_(Gegenpapst)“ vu de dütsche Wikipedia. E Liste vu de Autore un Versione isch do z finde.