D Tribut vu Panem

Us der alemannische Wikipedia, der freie Dialäkt-Enzyklopedy
Hops zue: Navigation, Suech
d Suzanne Collins, 2010

D Tribut vu Panem (Originaltitel: The Hunger Games, dytsch Die Tribute von Panem) isch e distopischi Romantrilogy vu dr US-amerikanische Schriftstelleri Suzanne Collins. Im Original sin d Roman zwische 2008 un 2010 erschine. Di dytschen Ibersetzige vu dr Sylke Hachmeister un em Peter Klöss sin zum erschte Mol zwische 2009 un 2011 im Oetinger-Verlag vereffetligt wore.

Panem[ändere | Quälltäxt bearbeite]

D Tribut vu Panem spiilt in ere nit necher definierte Zuechumft, noodäm Nordamerika dur Chrieg un Naturkataschtrofe zum große Dail verwieschtet isch. Us dr Drimmer isch di dikatorisch Nation Panem entstande, wu urspringli us em regierede ryche Kapitol un 13 ermere Dischtrikt drum ume bstanden isch. Dr Name laitet si vum latynische Spruch Panem et circenses (lat. ‚Brot un Spiil‘) vum remische Dichter Juvenal ab. (Mit Brot un Spiile hän d Remer sotte dervu abghalte wäre, gege dr Staat ufzstoh.)

Schließlig isch s wäg dr all greßere Uusbytig vu dr Mänsche zuen eme Ufstand vu dr Dischtriktbewohner gege s Kapitol chuu. Dä Ufstand isch aber nidergschlaa wore un dr Dischtrikt 13 isch vollständig gschlisse wore. As Mahnig fir d Dischtrikt hän d Herrscher di sognännte Hungerspiil yygfiert. Die solle d Dischtrikt yyschichtere un dra mahne, ass si dr Macht vu dr Regierig schutzlos uusgliferet sin.

Kapitol[ändere | Quälltäxt bearbeite]

S Kapitol isch d Hauptstadt vu Panem un wird diräkt vum Bresidänt Snow regiert. Sy Bewohner sin di rychschte Burger vu Panem. Si läbe, vergliche mit dr maischte Mänschen in dr Dischtrikt, in dekadäntem Luxus. Alli Tribut wäre zue dr Hungerspiil ins Kapitol gholt, go si dert träniere un bresäntiere. Fir d Bewohner vu dr Hauptstadt sin d Spiil e groß Vergniege un di wichtigscht Veraastaltig vum Johr.

Dischtrikt[ändere | Quälltäxt bearbeite]

Dr Räscht vu Panem isch in verschideni, unterschidli großi Dischtrikt yydailt, wu alli uf bstimmti Produkt spezialisiert sin, zem Byschpel Fischerei oder Chooleabböu. Die Spezialisierig macht fir s Kapitol d Kontroll iber d Bezirk megli, wel kai Dischtrikt autark isch. S git aber ermeri un weniger armi Dischtrikt.

Hungerspiil[ändere | Quälltäxt bearbeite]

All Johr wären us jedem vu dr zwelf Dischtrikt ai Maidli un ai Bue im Alter zwische 12 un 18 Johr uusglost, di sognännte Tribut, wu su in ere Freiliechtarena bis zum Dod gegenenander mien kämpfe, bis nume no ai Tribut läbt. D Spiil wären im Färnsee un uf Lyynwänd in ganz Panem iberdrait, un d Bewohner vu dr Dischtrikt wäre zwunge, d Spiil as Fescht z fyyre.

Voreb d Spiil aafange, git s im Kapitol e Parad mit dr Tribut, e dreidägig Träning un Färnsehufdritt fir si. D Spiilmacher schetze d Gwinnschangsen yy un d Tribut gän si Miei, Sponsore vu sich z iberzyge, wu ihne in dr Arena Gschänk wie Nahrig oder Medizin chenne zuechuu loo, ass ihri Iberläbesschangse stygt. Fir d Tribut stoht doderzue us jedem Dischtrikt e Mentor z Verfiegig, wu ne friejere Siiger us em jewylige Dischtrikt isch.

In dr Arena wäre d Tribut schließlig uf Metallblatte uusgsetzt, wu im e Chrais um e Fillhorn aagordnet sin. Si hän ai Minut der Zyt go si orientiere, derno derfe si losränne go si Uusrischtig wie Nahrig, Waffe oder Medizin us däm Fillhorn z hole. Doderby git s am Aafang all Johr e bluetigi Metzgete, wu e große Dail vu dr Tribut scho um s Läbe chunnt.

Di gsamt Arena isch mit eme Chraftfäld umgee, wu d Tribut am Abhaue hinderet. D Spiilmacher chennen Yyfluss nee uf s Wätter, un wänn d Spiil fir d Zueschauer langwylig wäre, zwinge si d Tribut mit Spezialeffäkt zum Kämpfe. Fir e jede dot Tribut wird e Kanone abgchossen un zobe erschynt e Bild vum Verstorbene am Himmel, ass d au d Tribut, wu no läbe, wisse, wär umbrocht woren isch.

Figure[ändere | Quälltäxt bearbeite]

Katniss Everdeen
D Katniss isch e aafangs 16-jehrig Maidli us em Dischtrikt 12 un d Hauptfigur vu dr Gschicht. Si dritt as wyblige Tribut fir ihre Dischtrikt in dr 74. Hungerspiil aa. In dr Gschicht vu Panem isch si dr erscht Tribut us em Dischtrikt 12, wu freiwillg bi dr Spiil mitmacht. Des macht si go ihri Schweschter Primrose vor em gruusige Schicksal vu dr Tribut z rette, wel die urspringli uusglost woren isch. Ihre Vater isch vor e baar Johr bin ere Explosion in eme Choolebärgwärch um s Läbe chuu, ihri Mueter, e Apothekeri un Haileri, het derno schwäri Depressionen iberchuu un het nimi fir ihri Dechtere chenne sorge. Wäge däm het d Katniss mieße d Versorgig vu dr Familie ibernee, ass si iberläbe. Mit ihrem beschte Kamraad Gale goht si als mit Pfyyl un Boge in Wald go jage. S Wild verchaufe si uf em Schwarzmärt. Ihre Name Katniss isch s änglisch Wort fir Pfyylchrut (Sagittaria).
Peeta Mellark
Dr Peeta wird zämme mit dr Katniss as Tribut in d Arena gschickt. Är isch dr Suhn vum Beck im Dischtrikt 12 un aafangs au 16 Johr alt. Scho syter ass si in Schuel chuu sin, isch dr Peeta in d Katniss verliebt. Im Alter vu 11 Johr het er dr Katniss un ihre Familie emol s Läbe grettet, indäm er Brot het aabränne loo un des derno dr Katniss drotz Verbot aanegheit het.
Gale Hawthorne
Dr Gale isch dr brescht Kamraad vu dr Katniss un zwai Johr elter wie si. Di baide hän si bim Wildere im Wald chänneglehrt. Wel au sy Vater in dr Bärgwärch um s Läbe chuu isch, mueß er wie d Katniss fir syni Familie sorge.
Primrose Everdeen
D Primrose (Prim) isch di zwelfjehrig Schweschter vu dr Katniss. Aigetli isch si uusglost wore fir di 74. Hungerspiil, aber d Katniss isch an ihri Stell drätte go si rette. Dur ihri Mueter het d Prim e groß medizinisch Fachwisse. Ihre Name Primrose isch s änglisch Wort fir Schlisselblueme.
Haymitch Abernathy
Dr Haymitch isch bi dr Hungerspiil dr Mentor vu dr Katniss un em Peeta. Är het di 50. Hungerspiil, di zwaite Jubelspiil, gwunne, un versuecht syterhär d Erinnerige mit Alkohol z verdränge, wäge däm isch er zmaischt bsoffe. Wu d Katniss un dr Peeta in dr Arena sin, versuecht er aber niechter z bylbe go ne hälfe.
Bresidänt Coriolanus Snow
Dr Bresidänt Snow isch dr Dikator vu Panem. Är isch en alte, grauhoorige Mann, wu d Katniss alliwyl an e Schlange mahnt. Fir ihn sin d Sppiil s Härzstuck vu Panem.

Handlig[ändere | Quälltäxt bearbeite]

Band 1: Deetligi Spiil[ändere | Quälltäxt bearbeite]

Di 16-jehrig Katniss Everdeen us em Dischtrikt 12 nimmt dr Blatz vu ihre jingere Schweschter Primrose bi dr 74. Hungerspiil yy. Zämme mit em Peeta Mellark soll si gege 22 anderi Tribut in ere Arena kämpfe. D Situation verkompliziert si aber, wu dr Peeta in eme Interview sy Liebi zue dr Katniss gstoht. Ihre Mentor Haymitch Abernathy, wu vor 24 Johr d Spiil gwunne ghaa het, verlangt vu dr baide, ass si in dr Effetligkait s verliebt Bärli spiile. Am Aafang vu dr Hungerspiil verliert d Katniss dr Peeta aber us dr Auge un findet en spter schwär verletzt wider. Zämme kämpfe si gege di andere, bis nume no di baide ibrig sin. Wel si sich nit wän gegesytig umbringe, bschließe si mit Hilf vun ere Lischt z iberläbe: si wän giftigi Beeri ässe, dodermit hätt s Kapitol kai Siiger, was schlächt fir d Reputation vu dr Spiil wär, wel skai Siiger chennt bresäntiert wäre. Doderdur wird dr Seneca Crane, dr oberscht Spiilmacher, zwunge, d Katniss un dr Peeta zue dr Siiger vu dr 74. Hungerspiil z chreene. Speter erfahrt d Katniss vum Haymitch, ass s Kapitol, vor allem dr Bresidänt Snow, nit seli begaischteret gsii isch vu dr Idee vu dr Katniss zum Sälbschtmord un ass dr Seneca Crane derwäge umbrocht woren isch.

Band 2: Gfehrligi Liebi[ändere | Quälltäxt bearbeite]

Sechs Monet sin vergange, syter ass d Katniss un dr Peeta bi dr Hungerspiil gsii sin. Dr Katniss erkännt, ass ihre Handle e Chettereaktion fir d Rebälle z Panem uusglest het. Dr Bresidänt Snow droht dr Katniss, ass er ihri Familie un Freind losst umbringe, wänn si nit hilft, d Rebälle z berueige. Uf dr Tuur vu dr Siiger wird dr Katniss klar, ass d Rebellion in ainzelne Dischtrikt scho aagfange het. Wu dr Peeta vu dr Erbrässig dur dr Bresidänt Snow hert, macht er ihre vor laufender Kamera ne Hyrotsaadrag. Si hän d Rächnig aber ohni dr Bresidänt gmacht, dää verchindet, ass zue dr 75. Hungerspiil, dr dritte Jubelspiil, je zwai vu dr ehmolige Siiger us jedem Dischtrikt uusglost wäre. Fir dr Dischtrikt 12 mien d Katniss un dr Peeta in s Ränne. D Katniss schwert si, ass si desmol alles will unternee go em Peeta s Läbe z rette, au wänn des bedytet, ass si sälber mueß stärbe. Uf Dränge vum Haymitchs sueche si si Verbindeti us dr andere Tribut und finde sonigi, wu ohni Wisse vu dr Katniss un em Peeta fir e Widerstandsgruppe gege s Kapitol kämpfe. Wu d Katniss d Arena vu dr Hungerspiil schlysst, wird si mit eme Hovercraft in dr ghaim ghalte Rebällestitzpunkt im verwieschtete Dischtrikt 13 brocht. Si mueß vum Haymitch erfahre, ass dr Peeta vum Kapitol gfange gnuu isch. Dr Gale sait ere, ass Dischtrikt 12no dr Hungersiil dur Brandbombe vellig verwieschte woren isch.

Band 3: Ufgflammti Wuet[ändere | Quälltäxt bearbeite]

D Katniss isch no ihre Befreiig us dr Arena im Dischtrikt 13, wu s offiziäll nimi git, wu s aber en unterirdisch Bunkersischtem het, wu dr Rebälle as Stitzpunkt dient. Dr Peeta isch im Kapitol gfange. Wu d Katniss zuestimmt, ass si s Gsicht fir d Rebällion wird, warnt dr Peeta bi me Ufdritt im Färnsee vum Kapitol sii un d Rebälle vor eme Luftaagriff uf Dischtrikt 13. S glingt dr Rebälle, dr Peeta un anderi Gfangeni us em Kapitol z befreie, är isch aber dur Folter un Närvegift psychisch broche un cha Wahn un Wirkligkait nimi unterschaide. D Katniss wird militärisch uusbildet un wird zämme mit ere militärische Ainhait un eme Kameratiim zum Kapitol gschickt, go fingierti Aagriff fir s Rebällefärnsee z filme. Bi däne Ufnahme wird e Chettereaktion uusglest un d Gruppe mueß in dr Untergrund vum Kapitol flichte. No Kämpf chunnt d Katniss bis zum Bresidäntepalascht, wu d Rebälle iber s Kapitol sige, si mueß aber sää, wie ihri Schweschter Prim un anderi Rebällesaniteter dur e letschte Luftaagriff um s Läbe cheme. Wu si dr Bresidänt Snow in ere offiziälle Zeremony soll exekutiere, entschaidet si si derzue, d Bresidänti vum Dischtrikt 13, Coin, z verschieße, wel die dr Mord an dr Prim aagornet ghaa het. Dr Bresidänt Snow stirbt an innere Bluetige. Noch ere Grichtverhandlig chehrt si retuur in Dischtrikt 12, dr Peeta chunnt e Wyyli speter hintenooch. Im Epilog sin di baide ne Baar un hän zwai Chinder.

Verfilmige[ändere | Quälltäxt bearbeite]

E Verfilmig vum erschte Band mit dr Jennifer Lawrence un em Josh Hutcherson in dr Hauptrolle isch anne Jahr 2012 unter em Titel The Hunger Games (dt. Die Tribute von Panem – The Hunger Games) erschine. Anne 2013 isch d Verfilmig vum zweete Band The Hunger Games: Catching Fire (Die Tribute von Panem – Catching Fire) in d Kino chuu. S dritt Buech isch in zwee Dail verfilmt wore, dr erscht Dail The Hunger Games: Mockingjay – Part 1 (Die Tribute von Panem – Mockingjay Teil 1) isch Ändi 2014 in d Kino chuu, dr zweet Dail The Hunger Games: Mockingjay – Part 2 (Die Tribute von Panem – Mockingjay Teil 2) Ändi 2015.

Literatur[ändere | Quälltäxt bearbeite]

  • Suzanne Collins: Die Tribute von Panem − Tödliche Spiele. Oetinger Verlag, 2009, ISBN 978-3-7891-3218-6.
  • Suzanne Collins: Die Tribute von Panem − Gefährliche Liebe. Oetinger Verlag, 2010, ISBN 978-3-7891-3219-3.
  • Suzanne Collins: Die Tribute von Panem − Flammender Zorn. Oetinger Verlag, 2011, ISBN 978-3-7891-3220-9.
  • Emily Seife: The Hunger Games – Die Tribute von Panem – Das offizielle Handbuch zu den Tributen. Oetinger Verlag, 2011, ISBN 978-3-7891-3224-7.
  • Liane Schüller: "Die Tribute von Panem" – Literatur und Film. In: Deutschunterricht. Zeitschrift für den Deutschunterricht in Sek. I und Sek. II: Fantastische Literatur. Hg. von P. Bekes. Jg. 67 (2014), H.4, S.17–23. ISSN 0012-1460.
  • Kate Egan (dt. Petra Knese): The Hunger Games – Die Tribute von Panem - Das offizielle Buch zum Film. Oetinger Verlag, 2012, ISBN 978-3-7891-3223-0.

Herbiecher[ändere | Quälltäxt bearbeite]

  • Suzanne Collins: Die Tribute von Panem – Tödliche Spiele. Oetinger Audio, 2010, gelesen: Maria Koschny, ISBN 978-3-8373-0515-9.
  • Suzanne Collins: Die Tribute von Panem – Gefährliche Liebe. Oetinger Audio, September 2010, gelesen: Maria Koschny, ISBN 978-3-8373-0532-6.
  • Suzanne Collins: Die Tribute von Panem – Flammender Zorn. Oetinger Audio, März 2011, gelesen: Maria Koschny, ISBN 978-3-8373-0560-9.

Weblink[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vu dere Version vum Artikel „Die_Tribute_von_Panem“ vu de dütsche Wikipedia.

E Liste vu de Autore un Versione isch do z finde.