Dickete

Dickete häisst in dr Cheeserei d Milch vo Chüe, Wasserbüffel, Schoof oder Gäisse, wemm mä mit Lab oder Milchsüüri s Milchäiwiss Kasein abschäidet.

Härstellig

Schoofmilch-Dickete wird verschnidde.

D Molke wird vo dr gschnittene Schoofmilch-Dickete abdrennt.

Wemm mä Rohmilch e Zit lang loot lo si, wird si vo sälber suur, aber die natüürligi Süürig cha mä kuum kontrolliere. Bastörisierti Milch hingeege wird nid von eläi suur. Dorum duet mä bim Cheesmache Starter- oder Süürigskulture in d Milch, wo dr Milchzucker Laktose in Milchsüüri umsetze. Wemm mä denn Lab in d Milch duet, grünnt s Milchäiwiss, s Kasein.

Wenn er d Starterkulture drzuedoo het, kontrolliert dr Cheeser die ganz Zit dr Ghalt an Süüri in dr Milch, bis es richdig isch zum s Lab dri z due. D Milch foot denn afo dicker wärde. Wenn si denn nid bewegt wird, bildet sich e glatti Masse, d Dickete. Dää Vorgang brucht 30 Minute bis zwäi Stunde. D Tämpratur bim Dicklege variiert noch dr Cheessorte zwüsche 21 und 35 °C. Für Wäichchees isch d Milch eender wermer as für Hartchees wenn d Zit vom Grünne gliich blibt.

Wemm mä Früschchees (französisch fromage frais) und Suurmilchchees wie Handchees oder Olmützer Quargel macht, verwändet mä kä Lab, d Milch grünnt usschliesslig wäge de Milchsüüribakterie.

Dä Artikel basiert uff ere fräie Übersetzig vum Artikel „Dickete“ vu de dütsche Wikipedia. E Liste vu de Autore un Versione isch do z finde.