Der große Kalender

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dialäkt: Schwäbisch

Der große Kalender ischt a weltlichs Oratorium en viir Doil fir Sopran- ond Bariton-Solo, an gmischda Chor, an Kenderchor, a Orkeschtr ond a Orgl vom schwäbischa Kombonischda Hermann Reutter.

Wia des Werk entschdanda ischt[ändere | Quälltäxt bearbeite]

Dr Ludwig Strecker der Jüngere, oiner vo de Mitinhaber vom Musikvrlag B. Schott’s Söhne, hôt am Ôfang vo de 1930er Jôhr ondrem Pseidoniim Ludwig Andersen an Haufa Tekscht ibr da Jôhresablauf zammagschdellt ond dera Sammlong da Nama Der große Kalender gäa. 1932 ischt'r mit deam Werk uff da Stuegerter Kombonischda Hermann Reutter zuaganga ond hôt-em vorgschlaga, des Ganze zo vrtona. Dr Reutter hôt’s Libreddo durchgleasa ond ischt begeischdret gwäa. Ohne viil Heckmeck hôt’r sich an d Arbet gmacht, ond scho em Jôhr druff isch des Oratorium ferdich ond bereit zor Uruffihrong gwäa.

Am 17. Juni 1970 isch dr Reutter 70 Jôhr alt wôrra. Weil dr Siddeitsche Rundfunk (heit: Sidweschtrundfunk deam Môô viil zo vrdanka hôt, hôt’r plant, da Kombonischda en dr Stuegerter Liederhalle mit-ra feschtlicha Uffihrong vo seim Graußa Kalendr zo ehra. Weil abr dr Reutter mit seim Werk nemme ganz zfriida gwäa ischt, hôt’r sei Kombosizioo us-em Jôhr 1932 grendlich ibrarbeidet. So ischt gewissermaßa 38 Jôhr schbätr a ganz nuis Oratorium entstanda.

Om was-es en deam Werk gôht[ändere | Quälltäxt bearbeite]

Des Oratorium ischt em Reutter sei omfangreichschds Chorwerk, wo an riisiga Abbarat erfordert, damit mr’s ibrhaupt uff d Bihne brenga kôô. Drom kôô mr’s au bloß selda em Konzertsaal heera. De oinzlne Doil setzet sich zamma aus Zitat aus dr Bibl, Bauraregla, volkstimliche Schbrich, Volksliader, Choräl ond liderarische Zitat, hauptsächlich vo bekannde deitsche Dichter. Gschildret wuud dr Ablauf vo-ma Jôhr, ôôgfanga an Neijôhr ond uffgheert an Silveschtr. D Musik isch durchweg tonal ond leicht vorstendlich, so dass mr des Werk em beschda Senn au als Volksoratorium bezeichna kôô.

Wia des Werk gliidret ischt[ändere | Quälltäxt bearbeite]

Erschder Doil[ändere | Quälltäxt bearbeite]

  1. Jahresbeginn und Dreikönigstag – Bariton mit-ma gmischda Chor nôch-ma Tekscht aus dr Bibl (Matthäus 2)
  2. Bauernregeln und Kalenderzeit – Männerchor ond Frauachor em Wechsel: Januar muss vor Kälte knacken
  3. Karneval – Kinderchor, Duett Sopran ond Bariton, gmischder Chor: Tschingdera, tschingdera! Heut' ist die Fastnacht da! (Tekscht nôch alde Volksschbrich ond –reim)
  4. Aschermittwoch – Duett Sopran und Bariton: Memento homo, quia pulvis es sowia a gmischder Chor: Wach auf, o Mensch, o Mensch, wach auf! (Anonymus)
  5. Bauernregeln und Kalenderzeit – Männerchor ond Frauachor em Wechsel: Wenn im März die Kraniche ziehn
  6. Passion – Männerchor: Als Jesus von seiner Mutter ging und die große heilige Woche anfing (a Geischtlichs Volksliad)
  7. Auferstehung – Gmischder Chor mit Sopran: Erstanden ist der heilig Christ (Tekscht nôch alde Kirchaliadr)

Zwoidr Doil[ändere | Quälltäxt bearbeite]

  1. Erwachen – Sopran: Vom Eise befreit (us-em „Osterspaziergang“ vom Johann Wolfgang von Goethe)
  2. Saat – Bariton ond Männerchor: Bemesst den Schritt! (Conrad Ferdinand Meyer)
  3. Walpurgisnacht und Mai-Anfang – Bariton, Frauachor, gmischder Chor ond Kenderchor em Wechsel: Die Schwalbe fliegt, der Frühling siegt (nôch Tekscht vom Ludwig Hölty, vom Johann Wolfgang von Goethe ond vom Heinrich Heine)
  4. Bauernregeln und Kalenderzeit – Frauenchor ond Männerchor em Wechsel: Die Sonne tritt aus dem Zeichen des Stiers
  5. Mai-Idyll – Bariton, Sopran ond gmischder Chor: Ach herzigs Herz! (Alts Volksliad ond Ôbed-Angelus)

Driddr Doil[ändere | Quälltäxt bearbeite]

  1. Johannisfeuer – Allegro ostinato fir Orkeschtr
  2. Bauernregeln und Kalenderzeit – Männerchor ond Frauachor em Wechsel: Juni trocken mehr als nass bringt gut Nass dem Winzerfass
  3. Reife – Sopran: Geh aus, mein Herz, und suche Freud (Paul Gerhardt)
  4. Ernte – gmischder Chor: Wir schnitten die Saaten (Conrad Ferdinand Meyer)

Virdr Doil[ändere | Quälltäxt bearbeite]

  1. Bauernregeln und Kalenderzeit – Männerchor ond Frauachor em Wechsel: Septemberdonner prophezeit vielen Schnee zur Weihnachtszeit
  2. Weinlese – Nôch-ma kloina Ländler fir Orkeschtr folgt dr gmischde Chor ond a Bariton-Solo: Traubengelocktes Septemberkind (Francis Jammes)
  3. Die wilde Jagd – Rondo fir Orkeschtr
  4. Herbst-Elegie – Bariton: Es ist ein Schnitter, heißt der Tod (A geischdlichs Volksliad)
  5. Bauernregeln und Kalenderzeit – Männerchor ond Frauachor em Wechsel: Im November viel Nass
  6. Advent – Sopran ond Kendrchor: Maria durch ein Dornwald ging (Nomôl a geischdlichs Volksliad)
  7. Kalenderzeit – Frauachor: Die Erde hat ihren Weg um die Sonne beendet
  8. Beschluss – Soli ond Cheer: Nun wolle Gott, dass unser Gsang mit-ma feierlicha Amen am Schluss (Geischlichs Volksliad)

Quella[ändere | Quälltäxt bearbeite]

  • S Programmheftle vom Siddeitscha Rundfunk zor Ur-Uffihrong vo dr Neifassong en dr Stuegerter Liiderhalle am 17. Juni 1970
  • D Kridik en de Stuegerter Nôchrichda, Zeidong Nr. 143/1970, S. 13
  • Lueg da Weblink

Weblink[ändere | Quälltäxt bearbeite]

A baar Ausfihronga zom Werk bei Schott-Music (Site cha nüme abgrüeft wärde; Suche im Webarchiv)[1] [2] Vorlage:Toter Link/www.schott-music.com