Der Reiter und der Bodensee

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
So siht dr Bodasee aus, wenn’r zuagfraura ischt.
Dialäkt: Schwäbisch
A Bronnafigur vom Peter Lenk z Iberlenga, wo da Martin Walser als Bodaseereitr zeigt.

Der Reiter und der Bodensee ischt a Ballade, wo vom Gustav Schwab em friha 19. Jôhrhondert vrfasst wôrra ischt. Des Werk hôt 31 zwoizeilige Strofa ond gôht zruck uff-na alda schwäbischa Sage.[1]

Handlong[ändere | Quälltäxt bearbeite]

A Reitr hôt’s arg pressant, an da Bodasee zo komma. Uff da sellem will’r mit-ma Schiffle ans andre Ufer fahra. Weil’s abr grad middla em-a eiskalda Wentr ischt, isch dr See zuagfraura, was abr dr Reiter et merkt. Er wondret sich halt driibr, dass außer ehm neamert en dera schneebedeggda baumlosa Ebene ondrweags ischt, wo-nr nôch-em reachda Weag frôga kennt. Wia-nr am andra Ufer ôôkommt ond wiidr d Hond bella heert ond Heiser siht, frôgt’r a Mädle, wia-nr am schnellschda zom See komma dät. Dô erfehrt’r, dass dr See hentr ehm leit ond dass’r dean mit seim Gaul ibrquert han muaß. So ebbes schbricht sich schnell rom. Glei kommet Leit uff-en zua, beglickwinschet-en ond ladet-en zo sich ei. Wia’s-em nô so langsam demmret, en was fir a graußa Gfahr r gwäa ischt, wuud’r vor Schreck oomächdich ond fellt dod vo seim Gaul.

Redensart[ändere | Quälltäxt bearbeite]

Mr schwätzt vo-ma Ridd ibr da Bodasee, wenn ebbr a ganz vrwegena Tat vollbrôcht hôt ond dera Persoo erscht hentrher bwusst wôrra ischt, en was fir a graußa Gfahr se gschdeckt hôt. Manche schwätzet abr au vo-ma Ridd ibr da Bodasee, wenn-se an-a Vorhaba denket, wo mit-ma graußa Risiko behafdet ischt und dees bewusst en Kauf gnomma wuud. En so-ma Fall abr wuud em Schwab sei Ballade – wahrscheinlich, weil-se oim gar et bekannt ischt – falsch endrprediirt.

Dr eschtreichisch Dichter Peter Handke hôt a Theaterstick mit-em Titl Der Ritt über den Bodensee gschriiba, wo am 23. Januar 1971 ondr dr Reschii vom Claus Peymann an dr Schaubihne am Hallescha Ufer z Berlin urufgfiirt wôrra ischt.[2]

Lueg au[ändere | Quälltäxt bearbeite]

Seegfrörni

Oinzlne Nôchweis[ändere | Quälltäxt bearbeite]

  1. DUDEN – Zitate und Aussprüche (Band 12), S. 375, Dudenverlag Mannheim – Leipzig – Wien – Zürich, 1993, ISBN 3-411-04121-8
  2. http://www.suhrkamp.de/theater_medien/der_ritt_ueber_den_bodensee-peter_handke_100249.html

Weblink[ändere | Quälltäxt bearbeite]

Wikisource Der Reiter und der Bodensee im dütschsprochige Wikisource


Information icon.svg Dä Artikel basiert uff ere fräie Übersetzig vu dere Version vum Artikel „Der_Reiter_und_der_Bodensee“ vu de dütsche Wikipedia.

E Liste vu de Autore un Versione isch do z finde.