Cyprien und Daphrose Rugamba
.jpg)
De Cyprien (1935-1994) und d Daphrose Rugamba (1944-1994) sind es ruandischs Ehepaar gsi. Si sind aktiv i de Charismatische Erneuerig gsi. Si händ sich für verstossnigi Chind igsetzt und 1990 de ruandischi Ablegger vo de Gmeinschaft Emmanuel gründet. Warschindli will de Cyprien sich immer sehr für de Fride iigsetzt häd, sind sie zäme mit sächs vo irne zää Chind am zwäite Tag vom Völkermord, am 7. April 1994, umbracht worde. Im Jahr 2015 sind si vo de katholische Chile für iri heroische Tugende als Diener vo Gott erchlärt worde.
Bevor si ghürate händ
[ändere | Quälltäxt bearbeite]De Cyprien Rugamba isch 1935 z Süd-Ruanda gebore worde. Er isch is Prieschterseminar iträtte, häd dänns Studium aber nach guet zwäi Jaar abproche. Er hät dänn z Burundi und z Belgie Gschicht studiert. Zrugg z Ruanda isch er en läitende Beamte worde. Als Dichter, Musiker, Komponischt und Choreograph hät er e gwüssi Bekannthäit gha.[1]
D Daphrose Mukasanga isch 1944 gebore und im gliche Dorf ufgwachse. Si isch Lehreri worde.[1]
Ehepaar
[ändere | Quälltäxt bearbeite]Ehe und Konvertierig
[ändere | Quälltäxt bearbeite]Si händ 1965 ghürate. De erschte Jaar sind schwirig gsi: D Daphrose isch fromm gsi und häd pättet, das ire Ma wider zum Glaube findi. Är hät de Glaube im Prieschterseminar verlore gha. Mitenand händs zää Chind gha. D Daphrose häd si ufzoge. Nach eme Usflug zum Häligtum vo Kibeho, wo d Jungfrau Maria es Jaar vorane erschine isch, fangt de Cyprien wider a glaube. Das git im Land zrede, wil er i Kulturchräise bekannt isch und Diräkter vom Nationale Institut für Wissenschaftlichi Forschig.[1] D Eheproblem lösed sich und si wärded es Paar voller Liebi und Zärtlichkäit.[2]
Engagement
[ändere | Quälltäxt bearbeite]Vo dänn a händ si es intensivs Glaubensläbe und sind aktiv i de charismatische Erneuerig. Si hälfed Chrankne und Strassechind.[3] Uf ere Räis uf Frankrich lärned si 1989 z Paray-le-Monial d Gemeinschaft Emmanuel käne. Wider dihäi gründet si det au e Gruppe. Wo si gstorbe sind, hät die Gruppe über hundert Mitglider gha, 2015 über tuusig.[1]
De Cyprien hät sich gwäigeret, sich politisch z engaschiere und gsäit er segi i de Partei vom Jesus. Trotzdem hät er d Ufrüef zu Gwalt zwüschet de Hutu und de Tutsi und s Klima vom Bürgerchrieg immer wider aprangeret. Sini Proteschtlieder händ nöd allne gfale. Drum isch er uf d Todeslischte cho.[1]
Ermordig
[ändere | Quälltäxt bearbeite]Wos immer gfärlicher worden isch, händ ne vili empfole, vo Kigali furt z ga. S Rugambas sind aber plibe und händ sich wiiterhin für di Jugendliche igsetzt. Si sind i irem Huus ermordet worde, zäme mit sächs vo zää Chind, am 7. April 1994, am Morge nach de Ermordig vom Presidänt Juvenal Habyarimana, wo de Afang vom Völkermord z Ruanda gsi isch. Si händ di ganz Nacht zäme pätted gha.[1]
Nach em Tod
[ändere | Quälltäxt bearbeite]Am 2. Oktober 2015, zwäi Tag vor de Eröffnig vo de zwäite Synode vo de Familie, hät de Erzbischof von Kigali Thaddée Ntihinyurwa de Häiligsprächigsprozäss offiziell i de Kathedrale vo Kigali eröffnet. D Chile wot demit en Biitrag läischte zum s Land ufzpoue und de Hass z überwinde. Es göchi nöd ums Martyrium, sondern um de Heroismus vo irne Tugende, hät de Vizeposchtulator François-Xavier Ngarambe gsäit.[1]
Referänze
[ändere | Quälltäxt bearbeite]- ↑ 1,0 1,1 1,2 1,3 1,4 1,5 1,6 Claire Lesegretain: L’Église se penche sur la sainteté d’un couple rwandais. in: La Croix, 16. Septämber 2015. (ufgruefe am 17. Oktober 2015)
- ↑ Ouverture des causes de canonisation de Cyprien et Daphrose Rugamba Archivlink (Memento vom 3. Novämber 2015 im Internet Archive). in: emmanuel.info, 15. Oktober 2015. (ufgruefe am 17. Oktober 2015)
- ↑ Cyprien et Daphrose Rugamba: les époux rwandais en route vers la sainteté. in: Aleteia, 9. Oktober 2015.
|
Dä Artikel basiert uff ere fräie Übersetzig vum Artikel „Cyprien_et_Daphrose_Rugamba“ vu de französische Wikipedia. E Liste vu de Autore un Versione isch do z finde. |