Concordia Basiliensis

Us der alemannische Wikipedia, der freie Dialäkt-Enzyklopedy
Dialäkt: Aagglobaseldütsch

D Concordia Basliensis isch e Schüelerverbindig für Gümnasiaste in de zwäi höggste Klasse in dr Stadt Baasel gsi. Si isch 1866 am Gümnasium, em hütige Gümnasium am Münsterblatz gründet worde. Spööter si au Schüeler vo andere Baasler Gümnasie Mitgliider worde. 1970 het sich d Verbindig ufglööst. Uf e Versuech, d Verbindig zwiiderbelääbe, wo 2016 vorgschlaage worde isch, isch schliesslig verzichdet worde.

D Couleur vo dr Verbindig isch Schwarz-Wiss-Schwarz gsi. Die Aktive häi sich äimol bro Wuche droffe zum Vordrääg loose und und denn im e gsellschaftlige Däil vom Dräffe, Bier suffe. Au Bummel und anderi gsellschaftligi Undernääme het s gee.

Noch dr Uflöösig vo dr Activitas het nume no d Alt-Concordia Basiliensis, d Veräinigung vo de Alte Heere, bis 2016 witer bestande. Denn het iiri Mitgliiderversammlig äistimmig beschlosse, dr Veräin ufzlööse. Si Vermööge isch an Veräin HG 400 gange, eme Veräin vo ehemoolige Schüelerinne und Schüeler vom Humanistische Gümnasium. [1]

Bekannti Mitgliider vo dr Concordia Basliensis si dr Historiker Paul Buurged und dr Altfiloloog Christof Schäubli gsi, wo au s Buech Concordia Centenaria: Bilder aus der hundertjährigen Geschichte der Gymnasialverbindung Concordia Basiliensis, 1866-1966 uusegee het.

Fuessnoote[ändere | Quälltäxt bearbeite]

  1. Staatsarchiv Basel-Stadt: https://query.staatsarchiv.bs.ch/query/detail.aspx?ID=129904