Chandragupta I.

Us der alemannische Wikipedia, der freie Dialäkt-Enzyklopedy
Chandragupta I.
Kaiser vo Gupta
D Köönigin Kumaradevi und dr Köönig Chandragupta I. uf ere Münze vo iirem Soon Samudragupta, 350 bis 380 CE
Regierigsziit 320–335 CE
Vorgänger Ghatotkacha
Nochfolger Samudragupta dr Grooss
Verhürotet mit Kumaradevi

Dr Chandragupta I. isch um öbbe 320 n. d. Z. Kaiser vom Gupta-Riich gsi und wird im Allgemäine as dr Gründer vo dr Gupta Dünastii aagluegt. As Herrscher het er sich mit e Hufe vo de mächdige Familie in dr Gangesregioon verbündet und het sis Riich mit Chrieg und ere Hüroot mit ere Brinzässin vo dr Licchavidünastii sterker gmacht. Si Ditel isch «Köönig vo de Köönig» gsi. Noch de hinduistische Schrifte Puranas häi d Gupta scho vor em Samudragupta, d. h. zur Zit vo sim Vater Chandragupta I., über d Gebiet um Allahabad, Saket (Ayodhya) und in Magadh (Südbihar) gherrscht. D Hauptstadt isch Pataliputra (hüte Patna) gsi. Im Joor 320 het er d Gupta-Ziträchnig iigfüert, wo denn au sini Noochfolger bhalte häi.