Burghof Lörrach

Dr Burghof isch e Kultur- und Veraastaltigszentrum z Lörrach in Südbaade. Er isch über d Region uuse bekannt worde wäge sinere Archidekduur, wo vo de Baasler Archidekde Wilfrid und Katharina Steib entworfe worde isch und wo sich mit sinere zitgenössische Kunst im und am Bau in die historisch gwaggseni Altstadt vo Lörrach iifüegt.

Gschicht

Noch zwäi Joor Baue isch dr Burghof Lörrach am 6. Novämber 1998 eröffnet worde und het d Funkzioone vom ene Kultur- und Veraastaltigszentrum übernoo, wo bis denn die alti Stadthalle usgüebt het. Dr Naame Burghof erinneret draa, ass dr Bau uf eme historische Blatz stoot, dört wo d Lörracher Burg gsi isch, bis si im Joor 1638 zerstöört worde isch. Das isch e chliises Wasserschloss gsi, wo mä mit em "Stettener Schlössli" oder em Wasserschloss Inzlige cha vergliiche.