Biosphärereservat Pfälzerwald-Nordvogese

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
D Laag vom Biosphärenreservats a de Gränze zwüsche Dütschland und Frankrych

S dütsch-französische Biosphärereservat Pfälzerwald-Nordvogesen (franzöösisch Réserve de biosphère transfrontalière des Vosges du Nord-Forêt palatine) isch 1998 als ersts Biosphärereservat, wo über d Gränze gaat, vo de UNESCO z Europa usgwise worde. De dütschi Teil isch s 12. vo 16 Biosphärereservat z Dütschland und de französischi Teil isch s 6. vo 14 z Frankrych.

Geografii[ändere | Quälltäxt bearbeite]

Geografischi Laag[ändere | Quälltäxt bearbeite]

Das Biosphärenreservat liit im Pfälzerwald und i de nördliche Vogese a de Nahtstell zwüsched em Bundesland Rhyland-Pfalz und de nordostfranzösische Region Grand Est.

Grössi und Struktur[ändere | Quälltäxt bearbeite]

D Gsamtflächi vom Biosphärereservat beträit 310.500 Hektar. Devoo entfalled 180.000 Hektar uf s Biosphärereservat Pfälzerwald (bis August 2020 Naturpark Pfälzerwald) z Dütschland und 130.500 Hektar uf de Regionali Naturpark Nordvogese (franzöösisch Parc naturel régional des Vosges du Nord) z Frankrych. De gröschti Teil isch Wald, wie das au im gsamte Gebirgszug us Pfälzerwald und Vogese de Fall isch. De Wald stellt öppe 74 % vo de Flächi, de Sidligsaateil vom Gebiet beträit nume 5 %.

Gschicht[ändere | Quälltäxt bearbeite]

1983 hend d Träger vom Naturpark Pfälzerwald und vom Regionale Naturpark Nordvogese ersti Überleggige aagstellt, wie me dütschi und französischi Wanderwääg über d Gränze chönnt verbinde und uuswyse. 1985 isch e gmeinsami Veryybarig zur Zämenarbet vo de beide Naturpärk underschribe worde. 1989 isch zerst de Regionali Naturpark Nordvogese als Biosphärereservat dur d UNESCO uuszeichnet worde, 1992 isch au de Naturpark Pfälzerwald zum Biosphärereservat worde. 1996 isch denn e dütsch-französischi Veryybarig zur Schaffung vomene Biosphärereservat Pfälzerwald-Nordvogese gschlosse worde. So isch es 1998 dur d UNESCO als gränzüberschrytends Biosphärereservat anerchännt worde.

Zonierig[ändere | Quälltäxt bearbeite]

Rächtlichi Vorgabe[ändere | Quälltäxt bearbeite]

D Chärnzone „Quellgebiet der Wieslauter“: Urwaldartigi Buechebeständ am Westhang vom Weißenberg

Wie vo de UNESCO vorggäh, wärded i de Zonierig Chärnzonen usgwise. In dene Zone isch jeglichi Nutzig verbotte. Das sind Gebiet, wo ufgrund vom natürliche Erb bedütsam sind und wo mer nachhaltig schütze will.

Drüberuus wärded Pflägzone festgläit, i dene nume e schonendi, naturnöchi Landnutzig stattfinde dörf, sofärn eso nid s nätürliche Erb beyträchtigt wird. Alli übrige Gebietsaateil sind Entwickligszone.

Umsetzig[ändere | Quälltäxt bearbeite]

Im Pfälzerwald sind d Chärnzone us Waldgebiet yygrichtet worde, wo zum Teil scho gschützt gsi sind. D Pflägzone, wo sich a d Chärnzonen aaschliessed, hend grossi Aateil a bestehende Naturschutzgebiet. I de Entwicklungszone ligged di intensiver gnutzte Gebiet bzw. Sidlige.

In de Nordvogesen sind d Chärnzone us Naturschutzgebiet bildet worde, wo scho existiert hend oder frisch ggründet worde sind und wo über s gsamti Gebiet verstreut ligged. D Pflägzone bestönd hauptsächlich us Wälder und Täler, d Entwickligszone us Ortschafte und Gwärbgebiet.

Trägerschaft und Yyrichtige[ändere | Quälltäxt bearbeite]

S Huus vo de Nachhaltigkeit z Johanniskreuz

Im dütsche Teil isch i den erste Jahr de Verein Naturpark Pfälzerwald d Trägerorganisation gsi. Mitglider vom Verein sind die Landchreis und chreisfrye Städt gsi, wo am Biosphärereservat Anteil gha, dezue ane de Bezirksverband Pfalz und verschidni Wander-, Sportverein und Umwältverbänd. Ziil vom Verein isch es gsi, s Biosphärereservat einheitlich z entwickle und syni Eigenart, Schönheit und de überregionali Erholigswärt z pfläge und z erhalte. De Trägerverein Naturpark Pfälzerwald e. V. isch 2013 ufglöst worde. Syni Ufgabe sind an Bezirksverband Pfalz übereggange. De Sitz vo de Gschäftsstell vom dütsche Teil vom Biosphärereservat isch z Lambrecht blibe. Understützt wird de Bezirksverband dur en Uusschuss mit 20 Mitglider us Politik, Naturschutz und Natursportverbänd.

S Huus vo de Nachhaltigkeit z Johanniskreuz im Zäntrum vom Pfälzerwald isch s Bsuecher-Informationszäntrum fürs Biosphärereservat. Es git es wyters Bsuecherzäntrum z Fischbach bi Dahn. Näbeme Biosphärehuus cha mer de Wald vomene Baumgupf-Pfad uus aaluege, wo 18 Meter über em Bode aagleit isch, und vo 35 Meter höche Plattforme gseht mer über de ganzi Pfälzerwald.

De französischi Teil umfasst 115 Gmeinde i de Region Grand Est. Zu zwei Drittel ligged si im Département Bas-Rhin im Osten und en Drittel zum Département Moselle im Weste. Si hend sich zum Syndicat de coopération pour le Parc (Sycoparc) zämegschlosse. S Verwaltigszäntrum vom Naturparks mit eme aagschlossene Museum isch z Lìtzelstäin (franzöösisch La Petite-Pierre).

Weblink[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vum Artikel „Biosphärenreservat_Pfälzerwald-Vosges_du_Nord“ vu de dütsche Wikipedia. E Liste vu de Autore un Versione isch do z finde.