Beppi

Us der alemannische Wikipedia, der freie Dialäkt-Enzyklopedy
Dialäkt: Baseldütsch

Beppi oder Bebbi isch dr Naame wo sich d Baasler sälber gääbe. D Verchliinerigsform isch Beppeli und wird für Kinder brucht, aber au für Persone, wo mä nit ganz voll ka nee. Beppi isch emol e Spitznaame für Jakob und Johann Jakob gsi, wo im 18. und 19. Joorhundert z Baasel wit verbräitet gsi si.

S Wort wird vilmol brucht zum öbbis z bezäichne, wo zu Baasel ghöört, wie dr Bebbisagg, dr offiziell Baasler Abfallsagg, wo mä mit dr Gebüür uf em d Abfallabfuer in dr Stadt zaalt. Dr Naame von ere Faasnachtsgligge isch Basler Bebbi Basel (BBB) und au d Gugge-Muusig Beppi Stompers macht an dr Fasnacht mit. Em Bebbi sy Jazz isch äini vo de grösste Baasler Dschääsveraastaltige und findet jedes Joor im August statt.