D Baasler Blakaatsammlig

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

D Baasler Blakaatsammlig isch e Sammlig vo mee as 50'000 Schwizer Blakaat,[1] wo hüte vo dr Baasler Schuel für Gstaltig im ehemoolige Museum für Gstaltig an dr Spaalevorstadt 2 ufbewaart wird. D Sammlig stoot uf dr Liste vo de Kulturgüeter im Kanton Baasel-Stadt, wo nazionali Bedütig häi.

Gschicht[ändere | Quälltäxt bearbeite]

S ehemoolige Museum für Gstaltig, wo d Sammlig immer no ufbewaart wird. Hüte ghöört s Geböid dr Schuel für Gstaltig.

D Baasler Blakaatsammlig goot uf s Joor 1896 zrugg. Dr Aastooss isch die ersti schwizerischi Blakaatusstellig gsi. Wo d Baasler Gwärbschuel am Aafang vom 20. Joorhundert reformiert worde isch, het mä au e Fachleerer für Gebruuchsgrafik aagstellt. Mä het den vo 1915 aa d Sammlig süstematisch afo usbaue, und si isch für Aaschauigsmaterial im Underricht brucht worde.[2]

Wo mä 1961 die Allgemäini Gwärbschuel an dr Vogelsangstrooss baut het, isch s Gwärbmuseum, s spöötere Museum für Gstaltig an dr Spaalevorstadt 2 vo dr Schuel drennt worde. 1996 het d Stadt us Spaarzwang s Museum zuedoo und d Schuel für Gstaltig het Blakaatsammlig übernoo, und kümmeret sich um sä mit dr Understützig vo dr Allgemäine Blakaatgsellschaft.[2]

Wil d Gwärbschuel d Rüüm im ehemoolige Museum für Gstaltig für si Nutzig überchoo het, isch d Sammlig immer no in de gliiche Rüüm dehäi.[3]

Fuessnoote[ändere | Quälltäxt bearbeite]

  1. Schaut her, ich habe eine Botschaft (Site cha nüme abgrüeft wärde; Suche im Webarchiv)[1] [2] Vorlage:Toter Link/www.iwb.ch us em Kundemagazin vo dr iwb, abgrüeft am 15. Novämber 2014
  2. 2,0 2,1 Geschichte der Sammlung Archivlink (Memento vom 2. Novämber 2014 im Internet Archive) uf dr Website vo dr Schuel für Gstaltig, abgrüeft am 15. Novämber 2014
  3. Plakatsammlung bleibt definitiv am jetzigen Ort (Site cha nüme abgrüeft wärde; Suche im Webarchiv)[3] [4] Vorlage:Toter Link/www.medienmitteilungen.bs.ch, Mediemiddäilig vom Regierigsroot vom 10.04.1996