Grafik

Us der alemannische Wikipedia, der freie Dialäkt-Enzyklopedy

D Grafik (griechisch γραφική [τέχνη], grafikí [téchni], „die Be-/Schriibendi [Kunst]“) im witiste Sinn isch dr Sammelbegriff für alli künstlerische oder technische Zäichnige und für deren iiri manuelli drucktechnischi Vervilfältigung. Im ängste Sinn beziet sich Grafik nume uf die künstlerischi Druckgrafik, wo zur bildende Kunst ghöört. En Originalgrafik entstoot äigeständig, unabhängig vo Vorlaage und in dr Absicht, d Technike vo dr Druckgrafik für e künstlerisch Usdruck z bruuche.

Japanische Farbholzschnitt vom Katsushika Hokusai, Die groossi Wälle vo Kanagawa (öbbe 1830)

Druckgrafischi Verfaare[ändere | Quälltäxt bearbeite]

Die druckgrafische Verfaare, wo im künstlerische Beriich verwändet wärde, cha mä in verschidnigi Grubbe iidäile.

Bim Hoochdruckverfaare isch das, wo sött druckt wärde, erhaabe. In die Grubbe ghööre dr Holzschnitt, dr Holzstich, dr Schrotschnitt, dr Wisslinieschnitt, dr Däigdruck, dr Clair-obscur, dr Camaieu-Schnitt, dr Linolschnitt, dr Montaäschedruck/Materiaaldruck ind d Zinkäätzig

Bim Diefdruckverfaare isch das, wo sött druckt wärde verdieft. Die ganzi Druckform wird iigfärbt und die überschüssigi Farb wird abkratzt. Diefdruckverfaare si die manuelle Stichverfaare wie Chupferstich, Staalstich, Punzestich, Punktstich, Schabkunst (Mezzotinto), Chaltnoodleradierig, Chriidemanier. Au d Äätzverfaare ghööre drzue, wie Radierig, Aquatinta, Heliogravüre, Punktiermanier, Wäichgrundäätzig (Vernis Mou)

Bim Flachdruckverfaare wie dr Lithografii si d Däil wo druckt wärde und die wo nid druckt wärde uf dr gliiche Ebeni. D Stelle, wo Farb sött aanechoo, wärde mit Dusch, Fettstift oder andere Mittel behandlet, wo Wasser abstoosse. D Form wird denn mit Wasser gnesst und d Druckerfarb ufdräit. Dört, wo d Form nass isch, wird d Farb nit aagnoo.

Bim Durchdruck (Serigrafii, Siibdruck) läit mä e Siibli oder e Gwääb uf d Druckflechi, wo an de Stelle, wo s käi Farb sött ha, eso behandlet isch, ass d Farb nid duurecha. Mä dräit denn d Druckfarb mit eme Wüscher uf.

Denn git s no verschidnigi anderi Verfaaren, wie d Monotüpii und dr Glaasglischeedruck. Nöjeri Entwicklige, wo d Künstler häi afo verwände si dr Dintedruck und dr Thermosublimazioonsdruck.

Weblingg[ändere | Quälltäxt bearbeite]