Basler Papiermühle

Us der alemannische Wikipedia, der freie Dialäkt-Enzyklopedy
Hops zue: Navigation, Suech
E Bsuecher wo Babbiir schöpft
Dialäkt: Baseldütsch

D Basler Babbiirmüüli, au s Schwizerische Museum für Babbiir, Schrift und Druck, isch e Museum in dr Schwizer Stadt Basel und widmet sich hauptsächlig dr Heerstellig vo Babbiir, dr Buechdruckkunst, em Buechbinde und dr Schrift im Allgemäine.

S Babbirmüülimuseum und au s Geböid vo dr Gallizianmüüli, wo s din isch, stöön uf dr Liste vo de Kulturgüeter z Baasel, wo nazionali Bedütig häi.

Beschriibig[ändere | Quälltäxt bearbeite]

S Museum befindet sich im ene Geböid, wo scho vor über 500 Joor Babbiirmüüli gsi isch und wo detäidröi restauriert worde isch. Es lit am Dalbe-Däich, eme Gwärbkanal, wo sit em Middelalter bestoot.

In de historische Rüüm het s Bilder und Objekt, wo äim en Iiblick in die alte Handwärkstechnike vom Babbiirschöpfe, vo dr Druckerei und vom Buechbinde gääbe. An ere Bütte, wo speziell für d Bsuecher iigrichtet worden isch, chönne die iir äignigs Babbiir schöpfe, Mä cha denn uf ere chliine Abzugs-Press das Blatt Babbiir bedrucke. Es git e Schribstuube, wo mä brobiere cha, wien e Kalligraf schöönn z schriibe, und au e Blatt Marmorbabbiir cha mä sälber härstelle.

Gschicht[ändere | Quälltäxt bearbeite]

Usschnitt us dr Stadtaasicht vo Basel vom Matthäus Merian, 1642.[1] D Babbiirmüüline (3) si linggs unden am Rhii im Dalbeloch bi dr üssere Stadtmuure. Zwüsche de Müülene fliesst dr Dalbedyych. Rächts von ene isch s ehemoolige Dalbekloster mit sinere Kiirche (1). Witer oobe linggs isch s Dalbedoor (2), rächts s innere Dalbedoor (5).

S Hauptgeböid vom hütige Babbiirmuseum isch e Chornmüüli gsi, wo bis 1428 em Chloster Klingedaal ghöört het. 1453 het sä dr Antonius Galliciani zun ere Babbiirmüüli umbaut, wie mä s zu dere Zit au mit nüün andere Chornmüülene gmacht het und vo denn aa isch d Dalbe bis ins 17. Joorhundert wit und bräit dr bedütendsti Standort vo Babbiirmüülene gsi. D Era vo dr Babbiirdruckerfamilie Gallician isch 1521 noch eme politische Umsturz blötzlig z Änd gange. D Müüli isch vo dr Familie Thüring (Düring) witer usbaut worde. 1778 het sä dr Buechhändler und Verleeger Johann Christoph ImHof-Burckhardt übernoo. Er het 1788 s Fabrikationsgeböid am Kanal lo abrisse und e zwäistöckigs Geböid mit em dreistöckige Dachstuel lo baue. Das isch d Müüli, wo hüte no stoot. 1850 isch d Dubakfabrik vo de Brüeder Hugo iizooge.[2] Sit 1957 isch d Müüli als Laagerruum brucht worde, bis si 1980 restauriert und as Museum iigrichdet worden isch.

2011 si d Geböid umfassend saniert und s Museum isch erwiteret worde. Mä het d Usstellig komplett überarbäitet und klarer gliideret.

Hüte befindet sich im Hauptgeböid, dr ehemoolige Gallician-Müüli, s äigentlige Museum mit alle Wärkstett und eme Ruum für Veraastaltige. In dr Stegreif-Müüli nääbedra si e Kaffee und d Iigangskasse. In dr Rych-Müüli, wo südlig vo dr Gallician-Müüli lit, befinde sich dr Schop und d Museumswärkstett. Dört cha mä au e Langsiib-Babbiirmaschine us em Joor 1964 go aaluege.

Lueg au[ändere | Quälltäxt bearbeite]

Litratuur[ändere | Quälltäxt bearbeite]

  • Peter Tschudin: Basler Papiermühle, Schweizerisches Museum für Papier, Schrift und Druck. Basler Papiermühle, Basel 2002, ISBN 3-905142-17-1.

Fuessnoote[ändere | Quälltäxt bearbeite]

  1. Merian Basel 1642.jpgD Stadtaasicht vom Merian vo 1642.
  2. Gschicht Archivlink (Memento vom 5. März 2016 im Internet Archive) vom Babbiirmuseum

Weblingg[ändere | Quälltäxt bearbeite]

 Commons: Basler Babbiirmüüli – Sammlig vo Multimediadateie
Information icon.svg Dä Artikel basiert uff ere fräie Übersetzig vum Artikel „Basler_Papiermühle“ vu de dütsche Wikipedia.

E Liste vu de Autore un Versione isch do z finde.


47.5548888888897.6037222222222Koordinaten: 47° 33′ 18″ N, 7° 36′ 13″ O; CH1903: 612427 / 267143