Staibiisser

Us der alemannische Wikipedia, der freie Dialäkt-Enzyklopedy
Staibiisser

Staibiisser

Systematik
Unterstamm: Wirbeldier (Vertebrata)
Chlass: Petromyzontida
Ordnig: Nüünaugenartigi
Familie: Nüünauge (Petromyzontidae)
Gattig: Lampetra
Art: Staibiisser
Wüsseschaftlige Name
Lampetra planeri
Bloch, 1784

S Bachnüünaug oder de Staibiisser (Lampetra planeri; alemanischi Näme) isch e europäische Süesswasserfisch, wo i de Schwiiz chorz vorem Uussterbe isch, well s ganz empfindli uf Wasserverschmutzig reagiert. Degege het sich in Europa de Bistand vom Bachnüünaug guet erholt und d Aart gelt as nöd gföördet. D Nüünauge ghöred nöd zo de "echte Fisch", wie di maiste Süesswasserfisch, und hend au kai Chnöche. D Nüünauge - s git meriri Arte devoo - bildet en aigni Chlass (Petromyzontida) vo de Wirbeltier.

Uussie[ändere | Quälltäxt bearbeite]

De Staibiisser het e schlangeförmige Körper und werd 8 bis 16 cm lang. Er hett kai Schuppe, deför aber e schliimigi Huut. Er hett e runds Suugmuul und em hindere End e lange schmaale Flossesoom.

Verbraitig[ändere | Quälltäxt bearbeite]

De Staibiisser chunnt i Europa vor, i subere suurstoffriiche Bäch und Flüss miteme sandige oder chiisige Grund, wo geg de Atlantik, d Nordsee und d Ostsee abflüüsset, feelt aber uf de Iberische Halbinsle. S Bachnüünaug chunnt ganz selte no im Schwiizer Mitelland vor.

Lebeswiis[ändere | Quälltäxt bearbeite]

De Staibiisser bliibt lang im Laarfestadium und grüblet i dere Zitt uf em Grund im Sand ume und fresst chliini Organisme. Noch drai bis fööf Joor verwandlet er sich im Summer in en uusgwachsne Staibiisser. E paar Mönet druuf versammlet si sich zom Laiche und zwoor vom Märze bis in Juni bi Wassertemperature zwöschet 8 und 15 Grad. Si suuget sich denn a Stai fest - drum de Name Staibiisser - und paaret sich, hüüffig meriri Mandli mit aim Wiibli, wo mitem Muul e chliini Muelte in Sandbode grabt. I die lait s Wiibli öppe 300 bis 2000 Aier. Noch em Laiche sterbed die erwachsne Bachnüünaug.

Literatur[ändere | Quälltäxt bearbeite]

  • Gunter Steinbach (Hrsg.): Süßwasserfische (Die farbigen Naturführer). Mosaik Verlag, München 1984.
  • Hans A. Baensch, Dr. Rüdiger Riehl, Aquarienatlas Band 2. Mergus Verlag, Melle, ISBN 978-3-88244-014-0.

Weblink[ändere | Quälltäxt bearbeite]

 Commons: Staibiisser (Lampetra planeri) – Sammlig vo Multimediadateie