Böotisch Bund

Böozie und sini Umgääbig

Dr Böotisch Bund isch e Bund vo 15 Poleis in dr middelgriechische Landschaft Böozie under dr Füeríg vo Thebe gsi und het vom 6. bis zum 4. Joorhundert v. d. Z. im antike Griecheland existiert. Si grössti politischi und militärischi Bedütig het er noch dr Schlacht vo Leuktra im Joor 371 v. d. Z. ghaa, wo e böotischi Armee under dr Füerig vom thebanische Fäldher Epaminondas d Spartaner, wo bis denn alli von ene dänggt häi, ass si in ere offene Fäldschlacht nid chönni verliere, vernichtend gschlaage het.

Dr Bund isch in 11 Bezirk iidäilt gsi, wo jeede vom ene gweelte Böotarch regiert worde isch. Thebe het as die bedütendsti Stadt im Bund vier Böotarche gstellt, Orchomenos und Thespiai je zwäi und Tanagra äine. Zwäi Beamti häi die übrige, chliinere Stedt verdrätte.

Dr Bund isch in sinere Gschicht mänggisch e Bündniss vo Poleis gsi, wo im Brinzip gliichberächtigt gsi si, mänggisch e Machtinstrumänt vo dr sterkste Polis Thebe. Under de Staatsmänner Gorgidas, Epaminondas und Pelopidas het Thebe vo öbbe 380 v. d. Z. immer mee d Rolle vo dr Füerigsmacht übernoo, und es isch sogar drzue choo, ass si Bündnispartner, wo abgfalle si nid nume mildäärisch underworfe het, sondern vo öbbe 375 aa iiri Stedt zerstört (Plataiai und Thespiai) und iiri Stimme für d Bundesversammlig übernoo het. Wo sich Thebe bim Friidenskongräss z Sparta 371 gwäigeret het, d Bündner äinzeln lo schwöre und eso iiri Autonomii z anerkenne, isch s zum spartanische Fäldzug cho, wo Thebe noch em d Füerigsrolle in Hellas für e baar Joor het chönne übernee.

Litratuur

• Pierre Salmon: Etude sur la Confédération Béotienne (447/6 – 386). Son organisation et son administration (= Académie Royale de Belgique. Classe des Lettres et des Sciences Morales et Politiques. Mémoires. Collection in Oktavo. Série 2, Tom. 63, Fasc. 3, ISSN 0378-7893). Palais des Académie, Brüssel 1978.

Dä Artikel basiert uff ere fräie Übersetzig vum Artikel „Böotischer Bund“ vu de dütsche Wikipedia. E Liste vu de Autore un Versione isch Bund&action=history do z finde.