Anna Hegner

D Anna Hegner (* 1. Merz 1881 z Baasel; † 3. Februar 1963 eebe deert; haimetberäächtigt z Äisele) isch e Schwyzer Gyygeri, Kumpenischti un Musikpedagoogi.

Lääbe

D Anna Hegner isch us ere aagsääne Muusikerfamilie chuu. Si isch d Doochter vum Muusiker Magnus Hegner un säm syre Frau Anna geb. Viccelio gsii. Ire eltere Brueder isch dr Pianischt Otto Hegner gsii, wu si ab 1893 e baar effetligi Ufdritt ghaa het mit em. Ire eerscht Musikunterriicht het si bim Vater ghaa. Si het Gyyge studiert bim Richard Wolf z Baasel, bim Ludwig Stiehle z Milhüsa un bim Hugo Heermann z Frankfurt am Main. Anne 1900 isch si as eerschti Frau in s Orcheschter vu dr Allgmaine Musikgsellschaft Baasel yydrätte. Bal het mer si as Violin-Solischti gchännt, bsundersch z Baasel, z Berlin, z Leipzig un z London. Zwische 1902 un 1925 isch si siibemool as Solischti bi dr Londoner „Proms“ ufdrätte.

Ab 1904 het si am Hoch'sche Konservatorium z Frankfurt am Main gleert, unter anderem isch si d Gyygeleereri vum Paul Hindemith gsii. Anne 1906 het si d Berliner Eerschtuffierig vum Violinkunzärt vum Felix Woyrsch gspiilt. Ab 1908 het si z Münchestäi gläbt un het Kunzärt in dr kadoolische Chilche, wu si au solistisch ufdrätten isch, un Summer-Waldkunzärt hinter irem Huus in dr Münchestainer Schlucht organisiert. Ab 1914 isch si bis 1950 (mit fimfjeeriger Unterbrächig) wider Mitgliid vum Baasler Orcheschter gsii, ab 1947 in dr Posizioon vu dr Kunzärtmaischteri.

Si het e baar chlaineri Wäärch kumpeniert, vor allem fir Gyyge un Klavier.

Si isch anne 1963 im Clara-Spitaal an dr Folge vun eme Uufall gstoorbe. Chuurz no irem Dood het iri Woongmai Münchestäi d Anna Hegner-Strasse gwidmet. Langi Zyt isch d Anna Hegner di ainzig Frau, wu im Baselbiet mit ere Strooß geert wooren isch.

Literatuur

• Münchenstein Heimatkunde. Verlag des Kantons Basel-Landschaft, Liestal 1995, ISBN 3-85673-522-4.

Weblink

• Anna Hegner im Personenlexikon des Kantons Basel-Landschaft
• Sinfonieorchester Basel: Chronik

Fueßnote

Dä Artikel basiert uff ere fräie Übersetzig vu dere Version vum Artikel „Anna_Hegner“ vu de dütsche Wikipedia. E Liste vu de Autore un Versione isch do z finde.