Alfred Kastler

Us der alemannische Wikipedia, der freie Dialäkt-Enzyklopedy
Dr Alfred Kastler
E Kastler Gedicht

Dr Alfred Kastler (* 3. Mai 1902 z Gebwiler, Elsass; † 7. Januar 1984 z Bandol) isch e französische Füüsiker gsi, wo 1966 dr Nobelbriis in Füsik überchoo het.

Lääbe und Wärk[ändere | Quälltäxt bearbeite]

Dr Kastler isch uf s Lycée Bartholdi z Colmar gange. 1921 isch er uf d École normale supérieure (ENS) z Bariis. Noch sim Studium het er 1926 as Füsikleerer am Lyzeum (Gümnasium) vo Mülhuuse afo schaffe, denn z Colmar und z Bordeaux. Vo 1931 bis 1936 isch er Assistänt vom Pierre Daure an dr Faculté de Science vo dr Uniwersidäät Bordeaux gsi, denn isch er zwäi Joor lang z Clermont-Ferrand Dozänt gsi und druf vo 1938 bis 1941 Brofässer z Bordeaux. Dört isch zum Spezialist für Atomspektroskopii (Raman-Spektroskopii, Fluoreszänz-Spektroskopii) worde. 1941 het en dr Georges Bruhat uf Bariis iiglaade. Dört het er d Füsik-Abdäilig an dr ENS gläitet. 1952 het er e Brofessur an dr Faculté de Science z Bariis überchoo. 1953/54 isch er Gastbrofässer z Löwen gsi.

Dr Kastler het zämme mit em Jean Brossel wichdigi spektroskopischi Methode in dr Atomfüsik entwigglet, wie d Dobbelresonanzmethode (Kopplig vo optischer Aareegig und Mikrowälle-Aareegig) und vor allem dr Effäkt vom "optische Bumpe". Dä het d Grundlage gliiferet für d Theorii vom Maser und vom Laser. Dr Kastler isch Diräkter vom Laboratoire de Spectroscopie Hertzienne vom ENS gsi vo 1951 bis zu sim Rückdritt 1972, wo dr Brossel Diräkter worde isch. Hüte isch s Labor noch em Kastler und em Brossel benennt.

Dr Kastler het Eeredoktorat us Pisa (1960), Oxford (1966) und Löwen (1955) überchoo. Er isch Eeremitgliid vo de französische und polnische füsikalische Gsellschafte und vo dr Optical Society of America gsi, und het vo dere 1962 d Mees-Medallie überchoo. 1954 het er dr Holweck-Briis vo de französische und änglische füsikalische Gsellschafte überchoo. Sit 1964 isch er Mitgliid vo dr französische Akademii vo de Wüsseschafte (Académie des sciences) gsi und au vo dr belgische Akademii vo de Wüsseschafte. 1965 het er d Goldmedallie vo dr CNRS überchoo und 1966 dr Nobelbriis für Füsik für si Entwigglig vo nöije spektroskopische Verfaare.

Dr Alfred Kastler isch au e Dichder gsi und het Europe ma Patrie - Deutsche Lieder eines Französischen Europäers - Librairie Martin Flinker - Paris gschriibe. 1979 het vor de schädlige globale Folge vo dr industrielle Dierzucht gwarnt.

Dr Kastler isch sit 1924 mit dr Gschichtsleerere Elise Cosset verhürootet gsi, und het mit ere drei Chinder gha, under anderem dr Füsiker Daniel Kastler.

Publikazioone[ändere | Quälltäxt bearbeite]

  • Recherches sur la fluorescence visible de la vapeur de mercure, Bariis: Masson 1935
  • La diffusion de la lumiére par les milieux troubles; influence de la grosseur des particules, Bariis: Hermann 1952
  • Oeuvre Scientifique, 2 Bänd, Ed. CNRS, 1988
  • Optical methods for studying Hertzian resonances, Nobel Lecture 1966
  • Kastler Optisches Pumpen als Beispiel internationaler Zusammenarbeit, Physikalische Blätter, August 1967
  • Alfred Kastler: Tiere sind unsere biologischen Brüder. In: Unesco-Dienst. Heft 3. 1979.

Weblingg[ändere | Quälltäxt bearbeite]

 Commons: Alfred Kastler – Sammlig vo Multimediadateie
Dä Artikel basiert uff ere fräie Übersetzig vum Artikel „Alfred_Kastler“ vu de dütsche Wikipedia. E Liste vu de Autore un Versione isch do z finde.