Al Capone im deutschen Wald

Filmdate
Dütsche Titel	Al Capone im deutschen Wald
Originaltitel	Al Capone im deutschen Wald
Produktionsland	Deutschland
Originalsprooch	Deitsch
Erschiinigsjoor	1969
Lengi	105 Minute
Stab
Regie	Franz Peter Wirth
Dräibuech	Peter Adler
Produktion	Dieter Mings Helmut Pigge
Kamera	Karl Steinberger
Schnitt	Gisela Haller
Bsetzig
dr Will Danin als Kalle Damm d Angelika Bender als Hanni, sei Freindin dr Rainer Werner Fassbinder als Heini dr Holger Ungerer als Jochen dr Christof Wackernagel als Winfried dr Bernd Schäfer als Wenner dr Hans-Jürgen Bodinus als Polizischt Drexel dr Kurt Lasin als Pütz dr Toni Dameris als em Kalle sei Opa

Dialäkt: Schwäbisch

Al Capone im deutschen Wald ischt a deitscher Fernsehfilm us-em Jôhr 1969 vom Regisseur Franz Peter Wirth mit-em Will Danin, dr Angelika Bender, em Rainer Werner Fassbender ond em Christof Wackernagel en de Hauptrolla. S Drehbuach ischt vom Peter Adler vrfasst wôrra. Dr sell hôt dô dren an echda Kriminalfall vorarbeidet. Zom erschda Môl uffgfihrt wôrra isch der Stroifa am 23. Oktobr 1969 em Programm vo dr ARD.

Om was-es en deam Film gôht

Em Kalle Hamm sei Dande ond sei Opa send mit deane viile Ausfliig, wo der Bursch en da Wald macht, ibrhaupt et eivorschdanda. Dr Kalle abr kimmret sich et om des Gschwätz vo deane alde Leit ond gôht emmer, wenn’r Feierôbed hôt, em Granitwerk seine oigene Vorgniagonga nôch: Er buddlet em Wald nôch Waffa ond andre Sächla, wo Ibrbleibsel vom Zwoida Weltkriag send ond wo mr deet vorgraba hôt, wia dr Friida wiidr hergschdellt gwäa ischt. Dui Bude vo deam Kerle gleicht ama kloina Zeighaus: Waffa, Stahlhelm, Soldada-Bilder, Landser-Heftla, a Dodakopf mit glihende Auga ond Schbenna (saubr uffgschbiaßt mit Stecknôdla). Ergenzt wuud dui Sammlong noh mit-ra Schallpladd, wo vorschiidene Reda vom Adolf Hitler druff send, seim graußa Vorbild. Wia dr sell ischt au dr Kalle Hamm dr Moinong, au ehm dät d Erde gheera, zomendescht a grauß Stickle drvoo. A weiders Vorbild vo-nem isch dr berihmde amerikanische Gängschder Al Capone. „Vorbrecher“ send em Kalle seine Auga bloß soddiche Dilledanda ond Ôfenger, wo-ma gschnabbt ond eigschberrt hôt. Ond so jagt’r mit seira Freindin Hanni ond deane Kerle vo seira Bande, em Jochen, em Heini ond-em Wenner, pfeilgrad en d Gwaldtada nei: Eibruch, Diibschdal, Raub ond Brandschdifdong. Em Kalle sei fehlgleideder Wonsch nôch Macht ond Heldatum, nôch Drill ond Disziplin, tobt sich aus emma Kommando-Too gegenibr seine Kamrada. Seine Reda send em Tonfall bald kaum meh vo selle vom Hitler zo ondrscheida. Wenn d Hanni vo de „Eibrecher“ schwätzt, schwätzt dr Kalle vo „Soldada“.

Wia uff oimôl a Mensch em Fujer vo-ma Maschenagwehr zammabricht, ischt fir dia jonga Leit s Omkehra scho viil z‘ schbät. D Polezei tridd uff da Plôô ond sorgt drfir, dass der Traum vom viila Geld ond vo dr graußa Macht austraimt ischt.

Was sonscht noh erwehnenswert ischt

Mit deam negadiva Titel-Helda ischt dr Bernhard Kimmel gmoint, wo en dr Pfalz dr Ôôfihrer vo-ra Jugendbande gwäa ischt ond onrem Nama „Al Capone von der Pfalz“ en d Kriminalgschicht eiganga ischt.

Kridik

Dr Evangelische Film-Beobachter fasst sei Urteil so zamma: „Zeitkritischer Fernsehfilm von Peter Adler und Franz Peter Wirth. Am Beispiel eines herrschsüchtigen, für Helden eifernden, aber frustrierten Burschen – die Bundeswehr hat Kalle Hamm abgelehnt – wird versucht, die Anfälligkeit junger Menschen für faschistische Parolen und die Identifizierung von politischen Götzen und Gangstern (Hitler und Al Capone) deutlich zu machen. Ein Film, der trotz gewisser Unzulänglichkeiten von der Story wie von der Machart her interessant und sehenswert ist. Au s Filmlexikoo Zweitausendeins hôt insgesamt a guada Moinong vo sellem Stroifa: „Das Porträt eines ‚Übermenschen‘, das sich zur Parabel über die Verführbarkeit des Menschen verdichtet. Ein trotz inszenatorischer Unzulänglichkeiten interessantes Drama.“

Weblink

• Al Capone im deutschen Wald in dr Internet Movie Database
• A baar Dada zom Stroifa bei filmportal.de
• A Porträä vom Bernhard Kimmel, em echda „Al Capone vo dr Pfalz“, wo mit-em negadiva Filmhelda gmoint ischt