Adam Näf

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

De Adam Näf (* 1495 z Volleweid (Huuse am Albis), † 7. November 1571 am gliiche Ort) het bi de Schlacht bi Chappel s Zürcher Banner vor em Verluscht an d Innerschwiizer grettet.

Sis Läbe[ändere | Quälltäxt bearbeite]

S Näfehuus uf em ehmalige Sennhof im Chappeler Wiiler Näfehüüser

De Adam Näf isch als Sohn vom Hanss Näf u sinere Frau Katharina uf de Volleweid bi Huuse uf d Wält cho. Er isch mit sine Gschwüschterte uf de Volleweid ufgwachse un wird au im Glückshaferodel vo 1504 gnennt.

Bi de Schlacht bi Chappel am 11. Oktober 1531, wo näbe sim Vater au de Zürcher Reformator Huldrych Zwingli gfalle-n-isch, isch de Zürcher Bannerträger Kambli im Bruggemoos vo de Innerschwiizer Truppe schwer bedrängt worde. Wo er um Hilf grüeft het, isch de Adam Näf zämme mit em Junghans Tumysen grennt cho. Zämme hei sie d Verfolger vom Banner aagriffe un em Kambli gholfe, dass er het chönne flüchte.

Als Anerkennig het de Adam Näf im 1533i s Schtadtzürcher Bürgerrecht übercho un im 1535i de Sennhof vom Chloschter Chappel als Läche.

S Schwert vom Adam Näf un s Banner, wo er grettet het, sin hüt im Schwiizerische Landesmuseum z Züri ufbewahrt. E Kopi vom Lehensbrief isch im Schtaatsarchiv vom Kanton Züri.[1]

Weblink[ändere | Quälltäxt bearbeite]

Markus Bürgi: Näf. In: Historisches Lexikon vo dr Schwiiz.

Einzelnachwiis[ändere | Quälltäxt bearbeite]

  1. Signatur: A 112.1