ADAC-Schauinsland-Ränne
|
|
 Fryburg
| |
| 47° 55′ 20,4″ N, 7° 52′ 38,5″ O | |
| Streckenart: | temporäre Stroße-Bärgrännkurs |
|---|---|
| Ufgmacht: | 15.8.1925 |
| Streckelayout | |
 | |
| Streckedate | |
| Wichtigi Veraastaltige: |
ADAC-Schauinsland-Ränne |
| Streckelengi: | 12 km (7,46 mi) |
| Hechenunterschid: | 780 m (2.559,06 ft) |
| Ränk: | 173 |
S ADAC-Schauinsland-Ränne isch e Motorsportveraastaltig gsii, wu zwische 1925 un 1984 uf eme ehmolige Holzabfuerwäg, dr hitige L 124 (Schauinslandstroß), vu Horbe (hite Landkrais Brysgau-Hochschwarzwald) zue dr Bassheechi vum Schauinsland uusdrait woren isch. Uf dr Streckelengi vu zwelf Kilometer, wu in dr Hauptsach uf em Bann vu Fryburg im Brysgau lyt, het mer e Hecheunterschid vu 780 Meter mieße iberwinde. Si isch bis hite di lengscht un rankrychscht Bärgrännstrecki vu Dytschland, wu s au verschideni Europa-Bärgmaischterschaftslaif druf gee het.
Gschicht[ändere | Quälltäxt bearbeite]
Aagregt dur dr Fryburger Fabrikant Peter Josef Hauser het mer rund 20 Johr, nodäm dr Holzabfuerwäg vum Schauinslandgipfel uf Ginterschdal ufgmacht woren isch, di Internationale Fryburger Rekorddäg ins Läbe gruefe. Do het s e Bschlynigungsränne iber ai Kilometer uf dr Landstroß zwische Oberrimschige un Brysach gee un e Bärgprys uf dr 12 km lange un uubfeschtigte Schauinsland-Hechestroß mit 173 Ränk.[1]
Am 15. un 16. Augschte 1925 sin zum erschte Mol Rännwäge un -motorreder an Start vum Bärgränne gange, wu speter s bekanntschte Bärgränne vu Dytschland gsii isch, wu in syne bschte Zyte iber 20.000 Zueschauer bsuecht hän. S Ränne, wu all Johr stattgfunde het, isch in dr Johr druf all wichtiger wore, ab 1927 isch s international uusgschribe wore un het ab 1930 s Predikat Bärgpryys vu Dytschland un ab 1931 Große Bärgpryys vu Dytschland iberchuu. Anne 1938 isch s Ränne wäg dr boltische Spannige abgsait un in dr Zyt vum Zweete Wältchrieg nit wider ufgnuu wore.
Erscht anne 1949 het s e Neiuflag gee, wu ab ab 1951 im Zwai-Johr-Rhythmus uusdrait woren isch; s Rennen 1955 isch wäg dr Kataschtrof bim 24-Stunde-Ränne vu Le Mans abgsait wore. Ab 1957 het s d Veraastaltig bis 1970 wider all Johr gee, ab 1972 derno bis zue dr letschte Rännveraastaltig 1984 wider all zwai Johr. S Ränne vu 1963 isch Dail vun dr Sportwage-Wältmaischterschaft gsii. Wel s all meh Kritik vu dr Naturschutzbeherde un -aktivischte gee het, isch dr Termin 1986 dur dr Veraastalter storniert un e neie Aadrag fir 1988 dur d Gnähmigungsbeherde verworfe wore.
Vu 1925 bis 1960 isch dr Start zwische Kyburg un Bohrer gsii. Vu 1961 bis 1980 het mer bim Friedrichshof, diräkt no dr Stroßegable uf Horbe aagfange. Dr Grund doderfir isch dr Liniebus uf Horbe gsii, wu s Ränne bis dert all Ritt het mieße fir en unterbroche wäre. Dur s Verlege isch d Strecki um 811 Meter chirzer wore.[2] 1982 isch dr Start nomol um 200 Meter dr Bärg uffe verschobe wore.[3] Au s Zyl isch im Lauf vu dr Zyt verlait wore. Aafangs isch s noch em Raschthuus-Rank gsii, 1984 isch s verlait wore zwische Gießhübel- un Ochsebärg-Rank.[4] Doderdur isch d Strecki vu 11 uf 8,6 Kilometer chirzer gmacht wore.[5]
Zwische 1934 un 1967 isch s zue sibe dedlige Uufäll im Vorfäld oder bi dr Veraastaltig chuu. Zem Byschpel isch dr zweefach Dytsch Maischter in dr 350-cm³-Gspann-Klasse, Albert Schneider, am 30. Augschte 1936 dedli verungglickt.
Schauinsland-Klassik[ändere | Quälltäxt bearbeite]
Noch ere lengere Vorberaitigszyt isch anne 1987 s erscht hischtorisch Schauinslandränne unter em Name 1. ADAC/FMC-Oldtimer-Festival gnähmigt wore, wu aber nume as Demonschtrazionsveraastaltig ohni Zytmässig fir Rännfahrzyyg vun eme Alter vu iber 30 Johr uusdrait woren isch. Ab 2001 het mer derno unter em Name Schauinsland-Klassik zerscht all zwai Johr, speter all Johr sonigi Oldtimer-Rallye uusdrait, syt 2016 git s au ne Winter-Rallye.
-
GS Tuning BMW M1 Procar bi dr Schauinsland-Klassik 2007 -
2015: Yyfahrt vu dr Oldtimer uf em Fryburger Mischterblatz
Literatur[ändere | Quälltäxt bearbeite]
- Henning Volle: Bergrekord am Schauinsland: die Geschichte des berühmten ADAC-Bergrennens 1925–1988. 1. Auflage. EK-Verlag, Freiburg im Breisgau, ISBN 978-3-88255-895-1.
Weblink[ändere | Quälltäxt bearbeite]
Commons: Schauinsland-Klassik – Sammlig vo MultimediadateieFueßnote[ändere | Quälltäxt bearbeite]
- ↑ Volle (2009), S. 11
- ↑ Volle (2009), S. 70
- ↑ Volle (2009), S. 142
- ↑ Volle (2009), Charte im Vorsatz rächts
- ↑ Volle (2009), S. 160
|
Dä Artikel basiert uff ere fräie Übersetzig vu dere Version vum Artikel „ADAC-Schauinsland-Rennen“ vu de dütsche Wikipedia. E Liste vu de Autore un Versione isch do z finde. |