Yongle Dadian

D Yongle-Enzyklopedii (chin. 永樂大典 / 永乐大典, Yǒnglè Dàdiǎn) isch e bedütendi chinesischi Enzyklopedii us em 15. Joorhundert (Ming-Dünastii), und gältet as d die berühmtisti Enzyklopedii us em chinesische Alterdum. Mee as 3'000 Gleerti häi anere gschafft und si isch 1408 fertig worde. S Wärk umfasst 22'877 Faszikel bzw. 11'095 Bänd. S Voluume vom Manuskripte söll 40 m³ grooss gsi si, s wurd ere Regaallengi vo mee as 300 m entspräche.

Übersicht

Yongle Dadian, Handschrift, öbbe 1403

S Original-Manuskript vo dr Yongle-Enzyklopedii, wo am Kaiserhoof ufbewaart worde isch, isch uf e müsteriöösi Wiis verschwunde, es existiert nume non e Abschrift, und die isch im Lauf vo de säggs Joorhundert verstümmlet und schweer beschädigt worde. Uf dr ganze Wält git s hüte nume no öbbe 400 Bänd, also öbbe vier Brozänt vom Gsamtwärk; vo deen befinde sich 221 in China. Die chinesischi Nazionalbibliothek sammlet sit 1912 d Räst vo dr Enzyklopedii und brobiert sit 2002, d Fragmänt z restauriere.

Wie und wo aane s Original verschwunde isch, wäiss mä nid; es git vier Hüpotheese:

• Es isch im ene Brand z Nanjing im Joor 1449 zerstöört worde;
• es isch im Balast vo dr himmlische Räinhäit in dr Verbotene Stadt under dr Regäntschaft vom Kaiser Jiaqing zur Zit vo dr Qing-Dünastii verbrennt;
• es isch mit dr kaiserlige Bibliothek (Wenyuange) in dr Verbotene Stadt am Ändi vo dr Ming-Dünastii zerstöört worde;
• es isch versteggt worde.

Weblingg

• Destruction of Chinese Books in the Peking Siege of 1900 (änglisch)
• In Search of the Yongle Encyclopedia (änglisch)
• Chinabroadcast