Eugen II.

E aglüegti Version vo derre Site, wo am 13. Dezämber 2023 freige worre isch, basiert uff derre Version.

Dr Eugen II. († 27. Augschte 827) isch vu Mai 824 bis zue sym Dod Papscht gsii.

Lääbe un Wirke

Im Inträssi vu dr syt em Stephan IV. guete Beziehige zwische Papscht un Chaiser het dr Eugen II. sy Wahl sofort em Chaiser Ludwig em Fromme aazaigt, wu ne au diräkt bstetigt het un sy eltschte Suhn, Lothar I., uf Italie gschickt het go dr Eugen II. in däm syre Ussenandersetzig mit em remische Volk unterstitze.

Doderdur isch s zue dr Constitutio Romana vum 11. Novämber 824 chuu, wu di chaiserli Oberhohait iber Rom, dr Chilchestatt un d Kurie gsicheret het un u. a. bstimmt het, ass dr Papscht nume vum Klerus un em Adel soll gwehlt wäre un ass dr neigwehlt Papscht vor syre Wei em Chaiser dr Dreiaid mueß laischte. Dr Kumflikt zwisch em Papscht Eugen un dr Stadt Rom het dodermit zuen ere zimlig Reduzierig vu dr Privilegie gfiert, wu em Papscht Paschalis I. gwährt wore sin.

Im Gegezug het dr Ludwig dr Fromm em Papscht in innerchilchlige Froge freii Hang gloo, au in aim viu dr große Kumflikt um die Zyt, nämligem Bilderstryt, wu dr Eugen II. an dr bilderfryndlige Haltig vu syne Vorgänger feschtghaöte het un si dodermit in Widerspruch au zue me große Dail vu dr Chilche gsetzt ghaa het. Ass dr Papscht d Reforme vum Karl em Große het welle furtsetze, het si zaigt im Spotjohr 826 bi dr Synod z Rom, wu 62 Bischef us allne Dail vu Italie chuu sin un wu Maßnahme bschlosse het, wie d Chilchezucht cha glupft wäre un zue dr Klerikerbildig.

Literatur

Rudolf Schieffer: Eugen II. In: Lexikon des Mittelalters (LexMA). Band 4, Artemis & Winkler, Münche/Züri 1989, ISBN 3-7608-8904-2, Sp. 78.
Friedrich Wilhelm Bautz: Eugen II. In: Biographisch-Bibliographisches Kirchenlexikon (BBKL). Band 1, Hamm 1975, Sp. 1551–1552.
Horace Mann: Pope Eugene II. In: Catholic Encyclopedia, Band 5, Robert Appleton Company, New York 1909 (änglisch)

Weblink

Commons: Eugen II. – Sammlig vo Multimediadateie

Vorgänger	Amt	Nachfolger
Paschalis I.	Papst 824–827	Valentin