Wendel Langenegger
| Dialäkt: Ostschwizerisch |
Da Wendel Langenegger (* 20. Oktober 1912 z Kriassara; † 11. Februar 2005 z Aaltstetta;[1] hoametberäachtigt im Oberriet) ischt an Schwiizer Learer, Hoametforscher und Archivar gsi.
Inhaltsverzeichnis |
[ändere] Biografii
Da Wendel Langenegger ischt z Kriassara am Rii uufgwachsa. 1929 isch er is Learerseminar uf Roascha ganga. Sini ersta Joor (1933–40) as Primarlearar häat er a da beedna Halbtagsschuala vo Katholisch Gätzibäarg und Kommbäarg oberhalb vu Aaltstetta gschaffat. Vu 1941 bis 1950 häat er däann as Learar a da Schual i sinnara oagna Hoamet z Kriassara gwirkt. Ab 1950 ischt er i da Stadt Aaltstetta dahoam gsi und döt a da Schuala bis 1978 g underichtad. Noch sinnara Pensionierig ischt er bis 1989 als Archivar tätig pleaba.
Näabat seam Schaffa als Learar ischt er i verscheadniga Verain und i ehrenamtlicha Funkzioana aktiv gsi. Soa häat er acht Joor (1954–61) as Präsident vu da Stadtmusig Aaltstetta g amtet,[2] vo 1969 bis 1976 ischt er Organist und Chorlaiter z Kriessern gsi und zitawiis as Präsident und a paar Joor as Vizepräsident bim Männerchor Aaltstetta gwirkt. Da Männnerchor häat ean im Januar 2004 as Jubilar fö 70 Joor Aktivmitglidschaft geert.[3] Da Wendel Langenegger ischt im Februar 2005 im Aalter vo 92 Joor gstoarba.
[ändere] Publikazioana
Am Wendel Langenegger ischt d Gscheacht vo sinnara Hoamet und d Sprooch, vorallam am Rintaler sini urchig broat Mundaart, zu Läabzita alewiil a groasses Aaliga gsi. Näabet oanzelne Artikl i Tageszitiga und im Rintler Joorbuach (Unser Rheintal, Jahrbuch für das St. Galler Rheintal) häat da Langenegger folgendi Büacher gschreaba:
- Geschichte des Reichshofes Kriessern 1229–1979 Ortsgemeinde Kriessern, Kriessern 1979.
- A Hampfla Rintlerspröch – Rheintaler Redensarten und Sprichwörter Druck: Rheintaler Volksfreund Verlags AG, Au 1997 (2. Auflage: Druck: C-Type GmbH und NetzPrint GmbH, Au 2009).
- Im Rintl dahoam – Rheintaler Wörterbuch (unter besonderer Berücksichtigung der Mundart von Kriessern) Druck: C-Print AG, Au 2001.
- Kriessern – meine Erlebnisse im Heimatdorf und am Rhein. Druck: C-Print AG, Au 2003.
[ändere] Quäalla
- Wendel Langenegger: Im Rintl dahoam – Rheintaler Wörterbuch (unter besonderer Berücksichtigung der Mundart von Kriessern). 2. Auflage. Druck: C-Type GmbH und NetzPrint GmbH, Au 2011.
[ändere] Oanzelnoochwiis
- ↑ Unser Rheintal, Jahrbuch für das St. Galler Rheintal. 63. Jahrgang (2006)
- ↑ Stadtmusik Altstätten, Chronik
- ↑ Appenzeller Zeitung, Tagblatt Online, 21. Januar 2004
| Persoonedaate | |
|---|---|
| NAME: | Langenegger, Wendel |
| ALTERNATIVNAMEN: | |
| KURZBESCHREIBUNG: | Schweizer Lehrer, Heimatforscher und Archivar |
| GEBURTSDATUM: | 20. Oktober 1912 |
| GEBURTSORT: | Kriessern |
| STERBEDATUM: | 11. Februar 2005 |
| STERBEORT: | Altstätten |
