Wallace Monument

Us der alemannische Wikipedia, der freie Dialäkt-Enzyklopedy
Hops zue: Navigation, Suech
S Wallace Monument

S Wallace Monument isch en 67m höche Turm wo z Schottland zur Eerig vom William Wallace errichtet worde isch. Er isch för Bsuecher göffnet, nach 246 Stegetritt chan mer uf de Galerii vom Turm d Uussicht über d Ochil Berge und s Forth Tal gnüsse.

Lag[ändere | Quälltäxt bearbeite]

De Turm isch 1869 ide nöchi vo Stirling errichtet worde. Er befindet sich 1.5 km nordöstlich vo Stirling ufem Berg Abbey Craig. Uf dem Hügel söll de William Wallace angeblich di englisch Armee beobachtet ha, bevor er di schottische Truppe i d Schlacht gfüert het. Es isch im ganze 8 Jaar a dem Turm baut worde.

Museum[ändere | Quälltäxt bearbeite]

Im Innere vom Turm isch es Museum. S Thema vo der Uusstellig isch d Schlacht vo Stirling Bridge, de Wallace sälber und wiiteri schottischi Persönlichkeite. Under de Uustelligsstuck isch under anderem s Schwert vom Wallace. Es git au no diversi anderi Sache z bewundere, zum Bischpil e lebesgrossi Figur vom Wallace vorem Iigang.