Volkshaus Basel
| Dialäkt: Baseldütsch |
S Volkshuus Basel isch e multifunkzionals Vergnüegigs- und Kulturzentrum an dr Räbgass 12-14 im Chlaibasel numen e baar Schritt vom Clarablatz ewägg. Es het dört e Bar, wo vom Achti am Morge bis am Äins z Nacht offen isch, e Brasserii, wo s Archidektebüro Herzog & de Meuron blaant het, e Biergarde, e Galerii für Fest und Konzärt für öbbe hundert Persoone, e Festsaal wo bis zu 1’200 Lüt din Blatz häi und wo as Bankett-, Event- und Konzärtsaal cha brucht wärde und modärni Liecht- und Doon-Installazioone het, und dr chliiner Unionsaal für bis zu 350 Zueschauer mit ere chliine Büüni. S Doonstudio im Volkshuus isch früener emol dr Ruum gsi, wo s Radioorchester vo Basel siini Konzärt ufgnoo het.
Gschicht [ändere]
Volkshüüser si am Aafang vom 20. Joorhundert in e Hufe öiropäische Stedt ufdoo worde, und im Allgemäine vo Gwärkschafte und lingge Bardeie dräit worde. Wil vilmol d Gwärkschafte Büro in de Volkshüüser gha häi und vo dört us Sträik organisiert häi, häi sä die Bürgerlige as «Revoluzioonszentraale» und Ähnligs bezäichnet. Dr General Ulrich Wille het im Zürcher Vokshuus sogar dr «Guwernemäntsbalast vo dr Bolschewikiregierig» gsee. Zum d Chansse, Subwenzioone überzchoo, verbessere, het mä dorum in dr Schwiz bi Abstimmige vilmol d Volkshüüser zämme mit bürgerlige Iirichdige in die gliichi Vorlaag doo. Z Basel zum Bischbil het mä um 1900 über s Volkshuus zämme mit dr 400-Joor-Fiir zum Biidritt vo Basel zur Äidgenosseschaft abgstimmt und 1904 zämme mit dr Börsevorlaag. S Basler Volkshuus im Chlaibasel isch 1925 ufdoo worde. So wie anderi Volkshüüser au, het au s Basler Volkshuus sini ursprüngligi Funkzioon as Kulturblatz für d Arbäiterschaft verloore und isch zum hütige Freizitzentrum für alli worde.
Kwelle [ändere]
- D Website vom Volkshuus Basel
- Volkshäuser uf dr Website vom Historische Lexikon vo dr Schwiz
