Ursula Brunner (Aktivischti)

Us der alemannische Wikipedia, der freie Dialäkt-Enzyklopedy
d Ursula Brunner (1977)

D Ursula Brunner-Storz (* 7. Jänner 1925 z Frauefäld; † 23. Meerz 2017 au deert)[1] isch e Schwyzer Aktivischti fir Faire Handel gsii. Si isch d Grinderi vu dr «Banaanefraue»-Beweegig, Bfaarfrau un Tuurgauer Grooßreeti (FDP) gsii.

Lääbe[ändere | Quälltäxt bearbeite]

d Ursula Brunner (eerschti vu links) mit dr Banaanefraue bim Schwätze iber e Banaaneakzioon z Frauefäld (1977)

D Ursula Brunner-Storz isch as Doochter vun ere Bröuereiunternämerfamilie z Frauefäld TG (Actienbrauerei Frauenfeld AG, hite zue Heineken) ufgwagse. Anne 1943 het si d Matuura gmacht un het derno ne Mediziinstuudium z Gämf aagfange, wu si abbroche het un dr 1946 dr Bfaarer Eugen Brunner ghyroote het. D Bfaarfamilie isch an verschiidene Oort gsii, zwische 1949 un 1962 sin aacht Chinder uf d Wält chuu. Anne 1966 isch d Familie uf Fraufäld retuurchuu un d Ursula Brunner-Storz het si in dr Chilchegmai engaschiert, allmee aber au bolitisch.

D Ursula Brunner-Storz isch di eerscht Frau, wu fir d FDP im Grooße Root vum Kanton Tuurgau ghockt isch.[2] Si isch zwamool vum eerschte Yysatzblaan noogrugt (1975/1978) un isch 1980 bi oordelige Waale wiidergwellt woore.[3] Vier Joor speeter isch si us dr Beziirksbartei uusdrätte, wu s zue Ussenandersetzige chuu isch. D Brunner-Storz isch Mitorganisatoori vun eme Brotescht un Friidescamp geege d Weerschau vu dr Armee z Frauefäld gsii un het e Gruppe vu dr «Fraue fir dr Friide» grindet ghaa.[4]

Verschottlet dur dr Film Bananera Libertad vum Peter von Gunten,[2] wu di soziaale un ekeloogische Missständ bi dr Banaanebuure z Zäntralamerika thematisiert woore sin, het si d Brunner ab 1973 fir e «gräächte Handel» mit Banaane un andere Brodukt us Entwickligsländer yygsetzt. Si un iri Mitstryterne hän si as «Banaanefraue vu Frauefäld» organisiert un d Effetligkait fir d Broblääm vum Wälthandel un vum Banaaneaaböu sensibilisiert. D Ursula Brunner-Storz isch e baar Mool in verschiideni Länder vu Siidamerika graist un 1986 het s die Gruppe vu engaschierte Fraue gschafft ghaa, di eerschte fair ghandlete Banaane in d Schwyz z impertiere. Anne 1988 isch us dr Gruppe vu dr Banaanefraue dr Verain Gebana („Gerechter Bananenhandel“) woore, 1994 het mer aagfange die faier ghandlete Banaane via VOLG z verchaufe. Anne 1998 isch d Gebana AG[5] fir gräächte Handel mit Brodukt us dr Dritte Wält grindet woore. D Ursula Brunner-Storz isch dr Organisazioon bis in s hooch Alter verbunde bliibe. Gräächtigkait isch fir sii aber vyyl mee gsii wie nume faire Handel, ire Yysatz fir e gräächteri Wält isch us ire Verwuurzlig im Glaube chuu.

D Brunner un d «Banaanefraue» gälten as die, wu dr Wääg frei gmacht hän fir dr Fair Handel in dr Schwyz. Si isch anne 2003 mit em Zuger Kulturbryys[4] un 2014 mit em Women’s Business Award vu dr Hoochschuel Lozärn[6] uuszaichnet woore. Si isch im Meerz 2017 im Alter vu 92 Joor z Frauefäld gstoorbe.

Wäärch[ändere | Quälltäxt bearbeite]

Literatuur[ändere | Quälltäxt bearbeite]

  • Barbara Fatzer: Die neue Frauenbewegung hebt ab. In: Bodenständig und grenzenlos. 200 Jahre Thurgauer Frauengeschichte(n). Hrsg. vom «Verein Thurgauerinnen gestern – heute – morgen» aus Anlass des Jubiläums 150 Jahre Bundesstaat / 200 Jahre Unabhängigkeit des Kantons Thurgau. Verlag Huber, Frauenfeld / Stuttgart / Wien 1999, ISBN 3-7193-1171-6; S. 229: Weh dir, Chiquita: Die Bananenfrauen; S. 234–236: Ursula Brunner: eine Frau eckt an.
  • Valerie Zaslawski: Dem fairen Handel den Weg geebnet. In: Neue Zürcher Zeitung. 5. Augschte 2013.
  • Anna Miller: Die Bananenkönigin. In: Ostschweiz am Sonntag. Nr. 37, 13. Septämber 2015, S. 23–24.
  • Nooloss vu dr Ursula Brunner im Staatsarchiiv Tuurgau (ThurgauerFrauenArchiv, StATG F 0'23).

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. ↑ Nooloss vu dr Ursula Brunner im Staatsarchiiv Tuurgau (ThurgauerFrauenArchiv, StATG F 1'23).
  2. ↑ 2,0 2,1 Simona Stalder: Ursula Brunner: «Wir waren empört über so viel Ungerechtigkeit.» In: Das Magazin, Hochschule Luzern. 4. Februar 2015, S. 28–30 (Interview).
  3. ↑ Uuschumft vum Staatsarchiiv Tuurgau, 22. Mai 2022
  4. ↑ 4,0 4,1 Tatjana Stocker: Fairtrade: Die Bananenfrau. In: Beobachter. 9/2009, 22. April 2009.
  5. ↑ Das Unternehmen Gebanan, uf gebana.com
  6. ↑ «Bananenfrau» Ursula Brunner erhält den Women’s Business Award 2014. Hochschule Luzern, 18. November 2014 (Medienmitteilung).
Dä Artikel basiert uff ere fräie Übersetzig vu dere Version vum Artikel „Ursula_Brunner_(Aktivistin“ vu de dütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Ursula_Brunner_(Aktivistin)&oldid=1041428"